十五
十五
我行左出就原地咁企左響電梯大堂度。
我發覺我衝上黎既時候係靠Jessie鼓勵我而激發起既勇氣。
但細心一諗原來我淨係記得Camp草話過自己住三樓，但冇話過佢住幾號房…
我呆左咁企響度，望住前面一班響common area度打緊機既男仔…
佢地似乎注意到有人出，全部人望晒過黎我呢面…
我有啲尷尬…
其中一個突然跳左起身，大叫：「阿嫂！」
我呆左一呆，乜我識得呢個男仔既咩？
我望住呢個好麻甩既男仔，有啲尷尬…
個男仔呢個時候已經走到我面前：「阿嫂，黎搵阿威呀？」
我好尷尬，問：「你係…？」
眼前呢個麻甩既男仔若無其事咁道：「我係佢同層兼足球隊既隊友~我成日見到妳同佢響campus拍住拖咁行，有時仲會同阿威打招呼，仲以為妳會認得我添~」
我都唔識你，點可能認得你呀…
「係…」
「黎搵阿威？」麻甩同學問。
我點一點頭。
「等我黎護送妳啦，阿嫂！」麻甩同學冇理過我想唔想就自作主張。
響呢個時候打緊機果幾個男仔都走埋過黎…
我感受到佢地既目光…其實我覺得佢地行過黎主要係想望多我幾眼…
麻甩同學一馬當先：「行啦！」
…
…
咁…都不失為一個好方法…
反正我都唔知Camp草住邊間房，就當有人帶路啦…
我跟住麻甩同學起程，但行行下發覺後面果幾個男仔都跟埋過黎…
搞到我好似啲皇后出巡咁呀…
好尷尬呀…
麻甩同學去到一間房前面，連門都唔敲，一腳踢開度門：「梁建威你條仆街仔，你條女黎搵你呀！」
緊張既時刻終於來臨了…
哎呀，我仲未準備好對白添…
「喂屌你老母嚇撚死人咩！」唔係Camp草把聲，係佢同房阿熙把聲：「條撚樣出左去上堂呀！」
麻甩同學即刻轉左個sorry樣：「熙哥對唔住！我地純粹係護送阿嫂過黎啫…」
之後仲要作狀讓條路比我入房…
但阿熙發緊嬲喎…我仲入唔入房好…
仲響我猶豫緊既時候，阿熙把聲又嗌左出黎：「你又up乜撚野？」
我輕輕咁探一探頭入去，同阿熙打個招呼：「你好，係我呀。」
阿熙見到我，呆左一呆，之後個樣若有所思咁。
「請問…我可以入黎嗎？」我試探性咁問一問。
阿熙緩緩地點一點頭。
我就慢慢咁行左入房。
點知我一行入去，後面班男仔都跟埋入黎。
「係咪呢～嚇親阿嫂啦！」麻甩同學好似火上加油咁講，仲要一面斯斯然咁走埋入黎。
其他男仔緊隨其後…
…
…
…
其實佢地入埋黎做乜？
「出去！」阿熙發火：「我響度備緊課，一陣出去幫人補習，你班仆街入黎我仲邊可以專心備課！」
「咁你又唔趕阿嫂走~」麻甩同學好似唔係幾想出返去…
阿熙由書枱度企起身，推佢地走。
「喂…阿嫂再見啦…」麻甩同學把聲漸行漸遠…
趕走左班人之後，阿熙用個好怪既眼神望我一眼，之後道：「傻仔威冇咁快返，妳坐響度等佢一陣啦。」佢指一指Camp草書枱張凳。
「嗯。」我有啲唔好意思咁坐左響凳上面，開始有啲緊張一陣同Camp草講啲乜好…
諗左一陣，我突然發覺阿熙佢一句聲都冇出過…個氣氛好似有小小尷尬…
我擰轉身望一望佢，佢好似好專心咁響度做緊notes。好似係啲DSE教材…
順帶一提，我地呢一屆其實差唔多已經係末代高考生，而家既中學已經轉晒DSE課程。
估唔到阿熙幫人補習又幾有心機喎…
反而身邊有唔少朋友都係好求其上去教就算，而家身為老師既我不禁要批評佢地誤人子弟呀…
諗左啲無聊野一陣，阿熙突然企起身，我即刻擰返轉頭，驚比佢知道我望住佢望左咁耐。
「唔駛縮喇。」阿熙指一指佢枱頭塊鏡：「妳都望左我好耐啦，有啲乜野想問就問啦。」
我大為尷尬，原來阿熙已經留意到我望住佢咁耐…
「冇野…」我扮作不經意咁古惑一笑：「睇下你做緊乜野啫。」
「妳咁笑對我冇用架。」阿熙直直咁望住我：「妳都係唔好轉彎抹角喇，妳係咪想問阿威啲野？」
其實…我真係咁啱諗緊無聊野先望左阿熙咁耐…
不過，或者呢個不失為一個打聽消息既途徑？
「嗯…咁…」我吸左一口氣，問：「阿威…佢…今朝…返左房之後…有冇同你講過啲乜野？」
阿熙望住我搖一搖頭：「佢今日好似神不守舍咁…十問九唔應…」
突然好認真咁問我：「妳係咪對佢做左啲乜野？」
我嚇左一跳，心虛地道：「我…尋晚好唔開心…叫佢陪左我一晚…」
阿熙望住我，眼中有啲懷疑：「就係咁？」
我點一點頭…
其實我只係講左一半真話…
「唉…其實我唔知妳點諗…」阿熙嘆左口氣：「妳同佢既事，其實我估到小小…阿威最近應該好苦惱佢同佢女朋友既關係…如果妳只係玩玩下既，不如妳放過佢喇…如果妳都係認真既…不如妳都考慮下退出？我驚…大家都會受傷。」
頓左一頓佢先至講：「佢…係我好難得先識到既好朋友，我唔想佢咁，更加唔想佢傷害到身邊既另一半…甚至乎係妳…尤其…佢同佢女朋友之前既感情真係好好…我聽佢地講電話都聽到好妒忌…」
然後佢雙眼出神，好似諗起啲往事咁，喃喃地道：「可以唔傷害到身邊既人就最好…」
阿熙…唔通佢都有啲往事？
（待續）
