三十

三十

我懷住不安既心情返到房…

聽日要到夜晚先至見到我親愛既男朋友…

而響見面之前佢又會去再見一見佢而家既正印女朋友Jenny…

佢話會同Jenny講清楚所有事，然後再同佢分手…

…

…

一諗到呢度，我竟然感到極度不安…

除左擔心我同梁建威係咪真係會有未來之外…

仲有…

係內疚同罪惡感…

呢幾樣野加埋，響我心目中既不安持續擴大…

我忍唔住拎起個電話。

我本來想打比遙遙訴下苦，但轉念一諗佢除左我同Jason既事之外其實好多野都唔知，而且一時三刻又好難解釋，於是只好作罷。

況且…我而家係做緊第三者。

因為我既關係，遙遙最唔鍾意既第三者。

然後我為左減低心中既罪惡感，我打開電話入面既相簿，睇下呢兩日同Camp草影既相。

…

希望咁樣可以提醒下自己，我係幾難得先可以爭取到幸福，唔可以因為罪惡感同內疚而放棄…

不過…我越睇唔知點解個心越有一種「將自己既快樂建築響人地既痛苦之上」既感覺…

為左唔好令自己亂諗野，我決定即刻去沖個涼，等自己清醒一下。

一路沖涼既時候我一路諗…究竟聽日梁建威係咪真係會同Jenny講清楚？

而男朋友仔唔想我去睇佢比賽又代表乜野？

聽日係我留響過去既最後一日，我係咪真係應該聽梁建威講，要留響hall等佢返黎？

我其實好想同佢共渡埋最後一日呀…

…

定係…

我聽日偷偷地入場睇佢比賽好呢？

一諗起呢個念頭，我就加快速度沖完個涼，之後即刻入房打開電腦。

我記得Camp草講過聽日場比賽響港大踢。

於是…我即刻響Google搜尋下比賽既場地，然後好輕易咁就比我搵到球場既地點。

嗯…

咁我聽日係咪真係偷偷地去睇佢比賽？

我淨係唔想錯過呢三日入面任何一個可以同心目中最重要既人共處既機會…

同埋，我覺得踢緊足球比賽既梁建威好有型~

如果有機會，我想再睇多一次~

嗯…

去就去啦！

不過因為Jenny都會去，加上Camp草可能會望向觀眾席，所以我要有小小裝扮先得！

我響衣櫃入摷呀～摷呀～終於比我搵到頂冷帽出黎。

好彩果陣覺得頂帽靚，順便帶埋返hall啫~

之後…仲要搵副黑超~

唔…我好似冇…

不過見過Cathy媽媽間房Jessie個位好似有，一陣去問佢借先~

跟住…係喎，仲要有口罩！呢個我有！

然後搵套唔係成日著既衫…不如都係直接問Cathy媽媽借喇…佢同我身材好似差唔多~

之後，我就走左去Cathy媽媽間房，而又好好彩咁，佢同Jessie星期五都留左響hall。

Jessie好似聽日都有大專盃籃球比賽，Cathy媽媽就話佢純粹想今晚響hall抖下，聽日先返屋企。

於是我問佢地借完野之後就返房試下裝扮下。

其實…又帶口罩又帶黑超又帶冷帽…仲要著埋Cathy媽媽既衫…相信正常情況之下都唔會有人認得出我…

我照完鏡，發覺自己都唔認得自己…

呵呵~

咁就得喇~

之後我send左個message同男朋友講晚安之後，我都攤上床訓了…

*

第二日起左身冇幾耐梁建威就同佢既隊友會合，一齊食完午餐之後就集合埋一齊出發。

至於我呢？我響Canteen食完午餐之後就換衫裝扮了。

換完衫之後我再對住塊鏡照一照，淨係望自己個樣既話，真係連自己都認唔出自己…

不過呢個係理所當然的吧？基本上我塊面至少有80%係遮住左既，連頭髮都紮起左放左入冷帽入面。

諗下諗下…

我而家既裝扮好似做緊賊咁…

同埋香港既十一月，其實都唔係好凍，我而家帶住頂冷帽，其實幾熱…

而且冷帽襯埋我由Cathy媽媽借黎既連身裙，其實唔係好夾…

然後，我突然間醒起，我係唔想比Camp草同Jenny認出響觀眾席上面既我啫，我做乜要響Hall間房入面開始喬裝？

我自己拍一下自己個頭，自言自語咁講：「梁冰冰，乜妳咁蠢架。」之後就將冷帽、口罩同太陽眼鏡除低。

我望一望隻錶，都係時候要起程。

因為我係路痴既關係，所以自己預早左小小出門…

（待續）