十一
十一
同Jason分手果晚我係飲左小小酒…但其實…我由頭到尾都冇醉過。
而Camp草對我既心意…我諗我自己唔多唔少都感覺得到…果晚叫佢上黎會發生乜野事，其實…都預計得到…
結果，果晚我確認左Camp草既心意…但同時…我都令佢背叛左佢既女朋友Jenny…
我睇得出Camp草其實仲好在意Jenny…再加上，我自己好明白男朋友比第三者搶走係乜野感覺，我唔想另一個女仔因為我而受到傷害…
所以，我主動退出呢場三角戀。
或者…其實我由頭到尾都冇諗住踩隻腳入去Camp草同Jenny既關係入面。
果晚…只係因為我受左失戀既打擊，先好想見一見Camp草…
但都係因為咁，所以累到佢出軌…
之後既六年入面，雖然我有唔少既追求者，但係啱feel既真係一個都冇…
或者，呢啲就係報應？
我望住自己部電話，Jason不斷打黎又比我拒絕接聽…不斷重覆又重覆…
其實，佢都幾煩。
不過，諗諗下今次難得返到黎，對於而家既我黎講件事又過左咁多年，其實真係一早已經放低晒，所以我就聽Jason電話睇下你想講咩。
「喂。」我終於接聽Jason個電話。
「冰冰~嬲完未呀～唔好嬲啦～」已經成六年冇聽過Jason把聲。
明明前一日已經同呢個男人分左手，點解佢而家打黎仲可以咁厚顏無恥，用啲咁油腔滑調既語氣同我講野？
「何先生，我同你已經冇晒關係，可唔可以唔好用呢啲語氣同我講野？」我冷冰冰咁回應Jason。
當然，我係用左六年時間去沉澱件事先可以咁冷靜。
當時既我未必做得到。
所以，我以前選擇左唔聽Jason電話。
之後仲要熄埋電話。
「唔好咁啦～妳知道妳響我心目中先係最重要果個黎架嘛~果幾個女仔，我玩下架咋！同佢地冇感情架！妳唔好當真啦。」
哦？到而家分左手先同我講我響你心目中係最重要？咁之前我苦苦哀求既時候又唔見你分啲時間出黎比我？
你真係當我呼之則來，揮之則去果種女人？
呢件事，我已經沉澱左六年，我唔敢講如果當日既我接聽左Jason電話之後會唔會比佢氹返（雖然我自己覺得應該唔會），但今日既我一定唔會。
你都係唔捨得有個隨傳隨到既床上伴侶啫。
係以前既我咁蠢，先會響第一次分手之後仲會同你復合，仲要響床上面聽聽話話，就係為左要你唔好走。
但係到頭黎，你都係一樣…背住我搵第二個。
再講，我今次返黎過去唔係為左同你復合，而係為左Camp草…
「你冇第二句喇嘛？咁我收線架喇。」諗返轉頭接聽呢個電話真係浪費左我呢三日入面幾分鐘寶貴既時間。
「喂…喂…」我冇理Jason，就咁㩒個制停止通話。
我本來想熄左個電話，但轉念一想，我仲等緊Camp草個電話，所以唔熄得。
不過，iPhone可以Block左指定電話號碼，我研究左一陣之後好快就block左Jason。
將呢段我人生中既黑歷史block左。
我放低部電話，拎返起條毛巾同內衣褲同清潔用品，準備去沖個涼。
沖完涼先慢慢再考慮之後點做吧。
我一出房門口，就見到我系o camp既組媽Cathy媽媽，佢同佢同房Jessie一樣拎住毛巾同衫果堆野，似乎都係準備去沖涼。
佢地間房就響我隔離。
「早晨媽媽~」我輕快咁對住Cathy媽媽講。
好懷念呢，我讀大學既時候最close既就係Cathy媽媽了~
而家見返佢心情即刻靚返晒~
「早晨阿女。」Cathy媽媽面露微笑：「妳好似心情好好咁喎。」
「邊係喎…」唔知點解聽落去Cathy媽媽好似另有所指咁…
「喂，妳同妳條仔下次搞野果陣不如細聲啲啦！」Jessie望住我陰陰咀笑：「我地響隔離聽到晒喇。」
我面上一紅：「邊有喎。」
「好啦，唔好玩阿女啦，我地去沖涼先。」我最愛既Cathy媽媽幫我解圍~
「好~」Jessie聽到之後即刻橋住Cathy媽媽隻手，但唔知點解Cathy媽媽好似有啲尷尬…
其實女仔之間橋下手都好正常啫~
「嗯，我都係去沖涼。」我都應左佢地一下。
「梗係要啦～尋晚妳玩得咁勁一定成身汗啦，要沖既，要沖既。」Jessie又對住我陰陰咀笑。
「喂呀！」我抗議。
Jessie個人有陣時總係比人一種…淫淫地既感覺…
但奇怪既係我又好似冇見過佢響大學既時候拍過拖…
「阿女，一陣一唔一齊去canteen食早餐？」Cathy媽媽突然問：「咁啱Jessie話想同我去食早餐，唔爭在多一個人一齊去？」
「好呀！」我隨口答應。
難得返到過去，再體驗下當年既hall life都係一件美事。
不過我話去之後，我留意到Jessie有一剎那谷一谷起佢塊面…
其實我以前已經覺得…Jessie個人有時好似古古怪怪咁…
但…只係有時…多數時間都係正常既。
尤其是Cathy媽媽唔響佢身邊既時候。
我地三個入到浴室，我地既浴室得三格浴格，其中一個浴格有人用緊。
咁即係我地是旦一個要等一陣啦。
「妳地老鬼過我，妳地用先啦。」我半開玩笑咁講~
「唔駛啦，大家都係女仔，一齊沖啦！」說完就想將Cathy媽媽拉左入其中一格浴格。
Cathy媽媽則一副手足無措既樣…
（待續）
