三十二

三十二

我同Jenny響鏡入面四目交投。

我個樣好愕然…而Jenny個身都好似震左一震…

點解…會咁巧合既？

而且睇Jenny既反應…莫非佢都認得我？

而家要響社交網站搵一個人出黎其實唔難，莫非…佢已經知道左…或者至少估到…我同梁建威既關係？

冷靜呀梁冰冰…

我而家要做既，係扮到唔識佢咁…

於是，我低下頭繼續扮晒無事發生咁繼續洗面…

然後…

我感覺到隔離企左個人…

我眼尾望一望…

係Jenny。

佢會特登走黎我旁邊，我相信唔係洗手咁簡單…

我突然間有啲心虛，於是即刻扮晒野咁洗完面準備備走人…

就響我擰轉身既時候…

「妳係咪…叫做阿冰？」Jenny既聲音由我後面傳黎。

我不由自主咁停低左腳步…再緩緩咁擰轉身…再勉力響面上擠出個笑容…

「係呀…我識妳？」我扮晒唔識Jenny咁向佢問道。

Jenny好柔弱咁搖一搖頭…

…

…

梁建威既女朋友…好似比我想像中更加柔弱…

「咁…如果冇事既，我出去先喇。」我向門口一指，而且一路指個人一路向門口移動…

我希望儘快逃離現場…

「等一陣！」Jenny既語氣有啲急：「妳識得梁建威架呵？」

其實Jenny問得出呢句，我都冇辦法再扮唔識Camp草…

其實我大可以選擇無視Jenny直接走出洗手間…不過一來佢可能都會追上黎，二來係我對Jenny有一份內疚，所以我做唔出…

我擰轉身再點點頭：「我識佢呀。佢係我大學同學。」

同埋佢係我而家既男朋友。

但係…

呢句我講唔出口…

「嗯…我叫Jenny…」Jenny毫無氣勢咁講：「我…係佢既女朋友…」

嗯…真係好柔弱…

如果妳對住既第三者唔係我，而係真係有心搶妳男朋友既妖女，妳咁既氣勢真係會比妖女食返轉頭…

不過…

我唔係妖女。

我呢一刻都希望自己係妖女。

咁樣，我至少可以當住受害人既面去明正言順搶佢男朋友而絲毫唔受良心責備。

可惜我係梁冰冰。

只係一個受過妖女傷害既普通女人。

我心下嘆左口氣，不過面上依然不動聲色：「妳就係Jenny？我聽阿威提起過妳好多次。」

Jenny面上既神色好似放鬆左小小，不過依然崩緊：「佢…有向妳提起過我？」

我內心其實響度爭扎緊。

我其實可以響呢度直接同Jenny講，話梁建威已經同左我響埋一齊。

不過，由我講呢番說話出黎恐怕唔係太合適…

於是，我選擇左向Jenny講大話。

「嗯。佢有向我提起過妳呀。」我對住佢笑一笑。

「真係？」Jenny個樣突然間好似有啲迷茫。

不過，我冇講大話。Camp草係有向我提過妳。

突然間大家又沉默起黎…

「如果冇乜野…」我繼續移動：「我都係走先。」

「等等。」Jenny個樣好似好多野想問。

「妳…同阿威…係乜野關係？」Jenny到最後終於忍唔住問。

「普通朋友。」我講出左一早預備既答案。

「嗯。」Jenny個樣好似…唔係好信。

然後…佢情不自禁咁扁一扁咀…

「妳同佢…好好朋友？」Jenny繼續問。

完全冇一個正室應有既氣勢。

「一般啦。」我簡短地答。

因為講得越多越容易露出破綻。

睇見Jenny一副楚楚可憐既樣，我唔忍心傷害呢個女仔…

咁…梁建威傷害佢就得？

冷靜，冷靜。

記住愛情係自私架。

「妳係咪成日都同佢一齊架？」Jenny問：「我冇聽過佢提起過妳既？」

咦？Camp草冇提起過我？

咁Jenny點會知道我既？

不過，咁樣我就可以順勢講埋個大話：「普通朋友，唔係好熟，所以冇提呱？」

「咁…妳同佢又日日都send messages同講電話既？」Jenny問，開始有啲質詢既感覺。

而且佢一路問，個樣已經開始想喊咁既樣…

我完全明白呢種感受。

…

而家我同男朋友仔既關係，真係我想要既？

我既快樂，真係要建築響其他人既痛苦之上？

我回憶左一下，就連Camp草話要同我一齊之後，佢間中都會露出痛苦既神情…

其實…

一段關係既開始已經唔正常既時候，大家走落去都會好痛苦…

Jenny見我冇出聲，忍唔住問我：「其實…你地…係咪有野？」

講完眼淚已經忍唔住流左出黎…

其實…以一個正室同第三者對質既氣勢黎講，Jenny真係好弱。

但係…

當我真係太內疚…

我完全冇諗過要反擊佢。

而呢一刻，我作出左一個決定。

我諗…呢個可能會係令我一世都後悔既決定…

（待續）