二
二
好唔容易終於到左目的地既地鐵站，我一出閘就急急步咁向目的地前進。
哎呀…要快啲先得…新郎新娘好似係下午五點鐘舉行證婚儀式…而我落地鐵既時候已經係差唔多五點十分…
不過證婚儀式未必咁準時開始既，係咪？
唯有希望係咁啦～
最後，由於港鐵壞車加埋我要搵路既關係…我差唔多成五點半先至去到間婚宴酒樓既門口…
因為遲到左既關係，我行得有點急…希望個證婚儀式仲未完啦…
有時證婚儀式delay都好正常既。
我繼續快步咁行入大門…
然後…
我見到一個熟悉既身影…坐左響接待處附近既一張疏化上面玩手機…
我突然間覺得個心跳得好快…塊面…同身體…仲開始有小小熱…
我明明應該已經放低左佢架喇…
佢…已經過去式黎架喇。
唔知係咪因為聽到我急促既腳步聲呢？呢個身影既主人抬起頭望向我呢邊既方向…
梁建威。
果位曾經同過我有一段親密關係既o camp同組…
冇見幾年，佢好似…大隻左…啲肌肉…著住恤衫都現晒出黎…
之前睇佢Facebook，知佢做左消防員。嗯…做左消防員果然係唔同左，大隻左。
我強攝心神，儘量鎮定落黎，對住梁建威甜甜一笑。
我應該已經放低左對佢既感情架啦…冇問題既…輕鬆面對佢啦～
佢呀…連婚都結埋架喇。
但係…我對腳好似唔係好受控制咁…快步行左過去佢面前…
我唔想尷尬，所以一早已經諗定開場白…
「證婚完左未？」呢樣其實我都想知：「我趕得切吖嗎？」
「完左啦。」梁建威由疏化企起身，再伸手拍一拍我頭頂：「冇見咁耐，camp花都係咁鍾意遲到~」
心頭突然感到一陣暖意…
梁建威…佢叫我做camp花…真係好懷念呢～
呢個花名…
係我同佢讀大學仲曖昧緊既時候，佢好鍾意咁叫我架…
其實…見唔見證到阿熙同新娘結婚…我真係冇乜所謂喇…
我早啲黎睇證婚…其實…都係想睇下可唔可以早小小見到你咋…
不過，冇見咁耐，死人頭梁建威竟然夠膽拍我個頭，哼！
「喂呀！」我谷起面頰扮嬲，一手打落梁建威果隻充滿肌肉既手臂上面：「死人頭camp草，咁耐冇見第一句就窒住晒！」
講真，阿威佢唔算係靚仔。
但係果陣，因為佢鍾意叫我做camp花，所以我又會叫下佢做camp草~
諗返起，心入面突然湧起甜絲絲既感覺…
呢種感覺…我到底有幾耐未感受過？
「你簽到左同比左人情未呀？」camp草見我淨係傻傻地咁對住佢笑既時候突然提一提我。
哎呀！
係喎，我一見到camp草就走左過去搵佢，差啲唔記得要做人情添。
「係喎，爭啲唔記得添！」我答。
之後我即刻急急腳咁走過去接待處簽到同比人情。
報到同比人情既時候，接待處有個大大隻隻既兄弟係咁望住我，搞到我比佢望到唔係幾舒服…
不過，我好似出親街都成日比人望，其實都慣架啦。
而家教書果度，連啲男同學都人細鬼大咁成日望我…而啲男同事尤其是個死人訓導主任直情會借機抽我水…所以我都慣架啦…
我比埋人情，同新娘果面見到既同事寒暄幾句，之後轉身準備返去同camp草會合…
咦？
個傻佬好似傻傻更更咁望住我既？
嘻嘻，其實…佢咁樣好得意~
「喂，你做乜呆左咁望住我呀？」我古古惑惑咁望住camp草。
「我？冇呀，我望住你前面啲空氣咋嘛。」camp草呢句回應佢好似以前都有咁講過。
你個爛gag王~
我忍唔住笑左出黎：「點解你個人可以咁搞笑？」
camp草聳聳肩，不置可否。
短時間既沉默。
我突然之間，好想趁呢段短時間，同camp草兩個人單獨相處下…
我諗…有超過五年冇試過同佢單獨相處喇…
或者，亦都可以試下趁呢個機會，測試下自己係咪真係放低左對camp草既果份感情吧…
我試探性咁問一問佢：「距離開席仲有小小時間…不如出去行陣？」
好緊張。
我好驚…camp草會拒絕我，再同我保持返距離…
「好呀。」估唔到佢好輕快就答應了。
嚇得我吖~
於是我地就出左商場行下。
肩並肩咁行。
不過…大家都冇出聲…
果然…可能大家心底入面仲有小小尷尬呢…
「係呢…你最近好嗎？」首先出聲既係camp草。
唔，好唔好呢？
其實麻麻啦，又多課外活動要帶，校長又諸多要求，仲有個死人禿頭訓導主任又成日趁機抽人水…
不過，啲學生都叫幾聽話~對我都算唔錯。係鍾意下我咁囉～
所以我答：「ok啦，學校都好忙下，好彩啲學生都唔算曳。有時都幾大壓力架。」
「嗯。啱啱你好似都識新娘果邊既人？」camp草有啲疑問。
係喎，佢唔會知道我同新娘教同一間中學架喎。
「呵呵，你應該唔知。」我笑一笑：「我同新娘教同一間中學架。」
「而家咪知囉。」camp草抗議。
又黎短暫沉默。
其實…我都好想知道你既近況呢…
我鼓起勇氣，問：「咁你既生活呢？」
「冇嚴重火警就得啦。」camp草隨口答：「日子都過得還可以。」
其實我唔係想知呢啲。
我想知你而家生活得幸唔幸福。
如果幸福既話，當年我既退出就有價值了。
呢個時候，camp草停左一停，再深深咁吸左一啖氣。
嗯？
「係呢…而家…你有冇拍拖呀？」
我個心突然跳得好快。
點解…你會想知我有冇拍拖？
我掩飾心中泛起既漣漪，望住死人頭camp草，之後古古惑惑咁一笑：「你真係想知？」
佢冇出聲。
隔左一陣，佢搖一搖頭：「都係唔好比我知。」
嗯…其實我都唔知點答好。
「唔理點都好…」camp草續道。
嗯？
我望住佢。
佢又深呼吸，再好認真咁望住我：「我希望你幸福。只要你能夠幸福，我自己都會覺得好幸福。」
我感覺到…
camo草係認真架。
佢係真心想我幸福。
個心…突然間好甜…
但…我幸福嗎？
我最幸福…係當年曖昧緊既時候，因為前男友Jason既事心煩，而你睇穿左我既心事，主動響我低落既時候同我一齊響海傍散心。
失去左你之後，我先發覺原來果段時光，真係畢生難忘。
好想返去果陣時…
咁…
不如比我任性多次…
我抬頭望住camp草，甜甜一笑，再伸手橋住阿威既手臂：「咁…借你手臂用一陣？」唔等佢回答，我就將頭挨埋落我手臂度。
之後一路響商場散步，大家都冇再出過聲，好好享受呢份偷來的時光。
好想回到過去…
好想返到大學year 1既時候…
好想返去仲同緊死人頭梁建威曖昧既時候…
如果有得返到過去，我今次一定…
（待續）
