三十一

三十一

當年港鐵既港島線香港大學站尚未通車，所以要上港大其實有啲麻煩。

我選擇左響香港站轉小巴上去。

而且我響中環站轉車既時候已經變左裝，因為我驚響港大撞到識既人。

撞到其他人其實冇乜所謂，我係驚…撞倒Jason。

當然我發覺我咁樣喬裝，其實更加引人注目…不過就算係識既人望到我，應該一時三刻都唔會認得出係我既。

呢個就係變裝既好處~

不過代價就係…好熱…

好唔容易我先去到球場，我就搵左個好角落既位坐低，等其他人唔好咁容易發現我~

唔好比男朋友仔見到之餘，其實我最唔想撞到既，係梁建威既現任女朋友Jenny…

由於我預早左好多出發，所以我去到球場既時候，唔好話觀眾席冇人，就連球場上面都冇人…

估唔到我呢個路痴今次竟然好順利就到達目的地…

我響度等既時候，又㩒下電話，又周圍望下…

過左一陣…

我突然見到有個女仔上左黎觀眾席，佢沿住樓梯行，好快就搵左個中間既位坐低。

我…認得佢。

係梁建威既女朋友Jenny，我響佢既Facebook見過佢既樣。

我突然間好心虛咁縮埋自己。

其實…有小小多此一舉，因為我而家坐左響觀眾席既最角落，如果唔係特登周圍望既話根本唔會見到我。

更何況…

Jenny坐低左之後根本冇周圍望，而係滿懷心事咁低下頭…乜野都冇做，淨係呆左咁，雙眼放空咁望住地下…

真係一副心事重重咁既樣…

而令到佢咁樣既罪魁禍首…就係我。

因為我既出現，先會令佢同梁建威既關係出現裂痕…

因為我…

一諗到呢度，尋晚果種不安感又再次由內心深處湧出黎…

再仔細咁望下佢…

點解…Jenny今日比我既感覺好似…有小小唔同咁既？

雖然我今日先第二次見佢真人（第一次係響未來既畢業典禮），之前只係瀏覽過佢既Facebook，但Jenny比我既感覺，係一個好乖好有讀書氣質既女仔，可以話係一個女文青既感覺。

但今日既佢…著得好青春，甚至可以話有啲…性感。

又化左妝又著短裙，件薄褸下面仲要著住件低胸既衫…

莫非…

佢已經察覺到啲野，所以諗住著得性感啲黎挽留男朋友仔響自己身邊？

…

似啦似啦。

死喇…

不安感越黎越濃…

就響我響度胡思亂想，亂咁諗野果陣，我留意到有第二個女仔行緊上黎…

咦？

咦？

我唔係眼花下嘛？

係Cathy媽媽？

點解佢會黎既？

我又再一次下意識咁縮一縮…

如果比Cathy媽媽望到，我帶晒口罩都冇用…因為我著緊果件衫根本就係佢借比我既…

當然諗深一層，我又唔驚比佢見到既…

但係…佢點解會黎既？

唔通係為左阿熙？佢又會咁主動既？

我…係咪改變左啲野？

Cathy媽媽揀左一個都幾中間既位坐低，同Jenny唔係隔到好遠。

我而家坐緊既角落位既好處，就係除非真係刻意望過黎，否則基本上都唔會望到我。

其實…我係咪應該聽Camp草話唔好黎？

不過，我又真係好想響走之前再睇一次我男朋友比賽既雄姿~

算了，既來之，則安之，我響唔其他人發現既前提下，慢慢咁欣賞我男朋友比賽吧～

*

我見到雙方既球員步入球場了，而梁建威似乎一眼就望見到Jenny，有小小尷尬咁同佢打招呼…

其實…令到佢咁尷尬既人…係我。

唔知點解，同左佢正式響埋一齊既時候，冇我想像中咁開心…

我覺得…主要係因為響埋一齊既開心，比搶人男朋友既罪惡感吞食左。

我嘗試去用妖精先講果句「愛情係自私既」黎說服自己，但我發覺…唔work。

我諗其實我真係唔應該黎睇Camp草比賽，見到Jenny而家個樣，我更加無地自容。

但我會唔會咁輕易就放手？

我諗…唔會。

咁難得返到黎過去，改變到將來，我唔應該咁容易就放手。

至少…我到呢一刻都係咁諗。

然後，響我胡思亂想既時候，比賽都正式開始左。

男朋友仔係正選出場，而佢同房阿熙都係。

我唔算好投入咁去睇，一來個心響度亂咁諗野，二來我又帶黑超又帶口罩又帶冷帽，我個人其實有小小暈暈地…

同埋廿二個人追住個波…我唔係好識欣賞…

算，反正我係黎睇男朋友仔，睇佢追住個波就夠啦～

我見到阿熙上半場入左一球，我地暫時以一球領先緊港大。

一到半場，我已經頂唔順走左去洗手間除左冷帽、口罩同黑超，再響洗手盆前面用水洗一洗塊面。

呼~舒服晒~

然後當我洗完面望住塊鏡既時候…

…

…

…

我見到Jenny入左黎。

我地響鏡入面四目交投。

（待續）