十七

十七

雙唇分離。

我望住Camp草，佢一副不知所措既表情…

嘻～呢個表情，同annual dinner當日個傻佬自告奮勇話要做我一晚男朋友黎開解我唔開心，然後好似估唔到我會應承咁，一副驚惶失措既表情一樣~

我果陣仲諗緊…你咁既表情，唔通你冇諗過我會應承既咩？

…

…

…

或者呀…

果陣我就已經好鍾意好鍾意你了…

無法自拔咁鍾意你…

「喂，乜你比女朋友錫係咁既樣既咩！」我扮嬲。

「唔係，唔係…」Camp草傻更更咁R一R個頭：「所有野發生得太快，我load唔切啫…」

「你上晒堂未？」我轉一轉個話題。

「下…？」Camp草繼續呆下呆下咁：「呀，係，黎緊仲有堂四半既lecture要上…」

「唔…」我伸手橋住Camp草果隻強而有力既手臂：「不如…走堂唔好上，我地出去玩咯～」我煽動Camp草走堂陪我出去拍拖拖~

「下？」梁建威呀…你到底回復神智未呀…

我拖住Camp草隻手，就咁拉左佢出房門…

「喂喂～等陣…」Camp草截一截停我。

下…

唔係連走堂陪我出去玩咁少事都唔得下嘛…

我開始扁扁咀，個樣開始唔開心，眼淚開始有小小想湧出黎…

Camp草望一望我個想喊樣，啞然失笑：「出去玩妳都要比我鎖好度門先得架~」

咦？

係喎。點解我醒唔起既？

我破涕為笑，拍一拍死人頭梁建威隻手臂：「衰人！」

Camp草鎖好門，轉身主動拖起我隻手仔~

「唔鎖好度門阿熙返黎殺死我都似！」Camp 草解釋：「行喇傻婆~」

Camp草既面上終於有返小小笑意。

我地行到出Lobby既時候，班男仔仲打緊機。

「喂！傻仔威！出去拍拖呀？」麻甩同學一見到我地即刻彈起身，再望一望Camp草拖住我果隻手：「不認不認還需認，都話你地拍緊拖架啦～」

「收皮喇司徒！」Camp草一副冇佢咁好氣既樣：「你都快啲正正經經搵返個女朋友喇…你而家咁樣…好戇鳩呀！」

「屌，講呢啲！拍拖真係咪搞我！打飛機仲好過拍拖啦！」呢個叫司徒既麻甩男仔望一望我：「阿嫂唔好意思~原諒我呢啲粗人講野係咁粗俗！」

阿嫂…

阿嫂…

阿嫂…

梁建威既朋友叫我做阿嫂呀～即係望落去我同Camp草都好襯？

個心好甜添~嘻嘻～

我對住司徒由心咁笑左一笑，再搖一搖頭：「唔會呀！」

我一對住司徒笑既時候唔知點解佢突然間呆左…

呢個時候都有到，Camp草主動拖住我隻手，拖我入~

「食屎啦司徒，你眼甘甘咁望住阿冰做乜！」道門一路關Camp草一邊大罵。

我…

比人叫做阿嫂呢～

呵呵~

「又嚇親妳添。」Camp草一臉歉意。

我搖一搖頭，向Camp草甜甜一笑：「唔會呀！不過…你班朋友都幾搞笑…」

我諗起佢地成班人護送我入Camp草間房…再比阿熙一路講粗口一路趕返出黎…

噗！

真係忍唔住會笑出黎~

「唔好提班痴線佬喇…」Camp草歎左口氣：「妳有冇邊度想去？」

「唔…」我其實同Cathy媽媽同埋Jessie食完早餐之後就冇食過野，響Camp草間房等左幾粒鐘，真係開始有啲肚餓：「不如我地去食個午餐先？」

Camp草望一望隻錶，微微一笑：「仲午餐？Tea都黎啦！」

我橋住Camp草，半拉住佢咁向Canteen出發：「Tea就Tea啦～快啲行啦～好肚餓呀！」

*

唔係第一次同Camp草黎Canteen食野。

不過…咁樣確立左情侶關係之後，我都係第一次同Camp草黎Canteen食Tea。

今次可以好親密咁坐埋一齊呢～

我特登揀左Canteen一個比較靜既角落既位置坐低，諗住可以同Camp草安安靜靜咁享受下二人世界~

點知…我同Camp草坐低左之後仲係感覺得到好多人既目光…

都冇計啦…

之後Camp草就出去買Tea先~我就坐左響度比人望…

最後我決定調一調位背住晒佢地…

睇下你地仲點望，哼！

諗返起平時比你班人都算，我今次返到黎過去想享受下二人世界架嘛！

「做咩背住晒個Canteen咁坐呀？」Camp草買完Tea返黎。

「哼，我咁坐睇下其他人仲點望住我地！」我扮嬲咁講。

「哈哈！唔係我地，佢地係妳啫~」Camp草哈哈一笑，響張枱上面放好Tea之好坐響我隔離：「咁妳係靚女先多人既啫~我女朋友梁冰冰唔靚女邊度會有人望呀？」

我感到面上一紅，道：「口花花。」

Camp草話：「我講真話都口花花？」

「哼！」

我雖然哼左佢一下，但心下甜甜的…

之後我地開始食Tea…我將啲西多士、雞翼果啲切開，然後用叉拮起黎餵Camp草食~

我甜起上黎仲用口唇咬住舊西多士餵Camp草，好似接吻咁餵佢食呢～

而Camp草就笑笑口咁接受~

「喂，妳好核突呀！」Camp草笑住講。

似乎佢都開始放鬆…慢慢享受呢兩日既情侶身份了…

（待續）