二十二

二十二

我向Camp草提議返hall。

「咁早？」Camp草對我呢個建議有啲愕然。

同埋…佢好似有啲唔捨得。

唉，其實我又何嘗唔係？

不過，過埋今晚，你都要返去你個Jenny度啦。

如果我地再繼續發展落去，總有一日你會出軌。

我唔想做令你出軌果個罪人。

縱使只係一晚，但能夠做到你既女朋友…我好開心。

真係好開心好開心。

「嗯，有你陪住我，心情好返好多啦。」我抬起頭望住梁建威，不自覺咁笑得好甜：「多謝你呀，男朋友。」

「哈，你都係笑返最靚。」Camp草笑住咁答我。

我塊面又熱起上黎，於是我即刻挨返落Camp草手臂度，希望佢見唔到我面紅啦～

「咁我地而家返去hall喇。」Camp草講完之後就起程。

「嗯，行咯。」我塊面已經紅完，於是我轉為拖住Camp草走。

我見Camp草行到去馬路旁邊伸手截的士。

「搭的士咁貴？」我問：「不如去搵N車搭返去啦。」已經過左十二點，地鐵尾班車都應該已經開出。

「唔緊要啦～話過要做妳一晚男朋友架嘛，梗係要做得好好睇睇啦！」Camp草微微一笑，然後擰轉頭繼續截車。

*

響回程既的士上面，我依偎響Camp草個膊頭上面休息，好好咁享受下同佢一齊最後既時光…

以情侶身份去相處既最後時光。

我同時都決定…返到去之後，應該會同佢保持返距離…

我唔想做果啲破壞人地感情既女人。

唔想做Jason班契妹做既野。

車程上面，我同Camp草都好有默契咁唔出聲。

我唔捨得佢。

我挨下挨下，眼皮越黎越重，明明呢幾日都訓得唔好，但係依偎響Camp草既膊頭上面，真係好舒服…

我慢慢咁沉沉睡去…

*

夜深。

的士停左響校園正門既門口，我拖住Camp草緩緩咁向宿舍行過去。

佢既宿舍響正我住既宿舍隔離，相距唔會超過三分鐘路程。

夜深既校園四下無人，只有零星既學生經過。

我地一路上都拖住手冇再講野，默默咁享受呢個旅程最後既一段路。

其實…我好唔捨得…

不過，再長既路，都有行完既一日。

不知不覺，我地已經到左我住既hall既樓下。

我地響hall既大門口對望左一陣…大家既眼光中儘是不捨。

「我要走喇。」我依依不捨咁望住梁建威講。

今日之後…可能…我都會儘量同你保持返小小距離架喇…

「嗯。」Camp草好似變左一尊雕像咁，郁都唔郁…

「咁…再見啦。」我向Camp草揮揮手，轉身準備走入大門。

天下無不散之筵席…

再見啦，梁建威。

「我…」Camp草隔左一陣之後終於出左聲，好似想叫住我咁。

於是我停下腳步，回身再望一望Camp草。

佢冇再出聲，佢個樣好似好多野想講但又講唔出口咁…

我望住佢…

本來只係想望一眼…只係一眼…

但越望越唔捨得…

我雙腳情不自禁咁向Camp草行過去…

行到佢面前…

雙手忍唔住環抱佢條腰…攬到佢實一實…

我伏響佢結實既胸膛上面，聽到佢既心跳得好快好快…

其實…我又何嘗唔係心跳加速？

我諗起佢今日Annual Dinner之後冇去同其他朋友飲野，反而係主動提出要陪住我散心，我心入面湧起甜甜的愛意…

睇黎…就算我係未同Jason分手…其實我既心靈…都已經出左軌…

我發覺…原來我愛既…係我眼前呢個已有愛侶既男人…

「多謝你陪我。」我好細聲咁多謝Camp草。

「嗯。」Camp草全身仍然好似僵硬咁。

我抬起頭望住佢…

我地再一次四目交投…互相凝視住對方…

我gut一gut高雙腳，將我雙唇緩緩咁印落Camp草既雙唇上面…

我同Camp草…第一次接吻了…

「好喇…我真係要走喇…」我講完呢句之後冇再回頭就走左入宿舍大堂…

我無視看更伯伯望過黎色瞇瞇既目光…只係感覺到…自己雙頰好似火燒一樣咁熱咁紅…

我入果陣好似仲隱約見到Camp草呆呆咁企左響Hall既門口。

再見喇。

錫完Camp草之後，我更加下定決心，要同佢保持距離。

如果唔係…隨時會令佢鑄成大錯…

我返到自己空無一人既房間。

我坐響張床，好有決心咁拎左部電話出黎。

多謝你呀，梁建威，係你比左勇氣我面對自己既內心同埋困難。

雖然…今晚你話做我一晚男朋友唔知係你真係鍾意我定純粹想氹我開心…

但我而家已經有充足既勇氣了。

我唔可以再依靠你架啦。

我解鎖左自己部電話，再㩒入遙遙send比我既幾個WhatsApp訊息入面…

…

*

我從回憶之中再次回到現實。

哈，我諗返當時真係大言不慚~又話要靠晒自己，倒頭來分手果晚我都係忍唔住打左比Camp草~

我回過神來，而家仲響尖沙咀海傍，身邊既依然係我心愛既梁建威。

（待續）