二十

二十

響我成餐Annual Dinner都響度胡思亂思既情況下，個Annual dinner不知不覺已經進入尾聲…

個人精神恍惚之中，突然感覺到有人拍我膊頭…

咁樣比人拍一拍，我就好似突然比人驚醒咁，望一望拍我既人。

原來係梁建威。

「咩事？」我有啲如夢初醒咁問。

Camp草望一望我，諗左一諗，都係話：「冇野啦。」

我望一望周圍，見到有個人好似邀請緊大家Annual Dinner之後落下場繼續玩。

我望一望個電話，仍然冇任何黎自Jason既訊息，心下嘆左口氣，然後冇理到周圍既環境，繼續自己響度胡思亂想。

然後唔知過左幾耐，周圍既人陸續起身離開，而我就跟住Camp草一齊起身，慢慢咁離開會場。

我一路跟住響Camp草身後面行，響呢個時候，唔知點解我覺得Camp草龐大既背影，特別有安全感。

我跟住佢後面行就覺得好安心。

我地行緊去搭系莊安排既巴士返hall。

呢個時候，Camp草好似突然行慢左，慢慢咁變左同我平排肩並肩咁行…

呢一刻，唔可以見住Camp既背影黎行，唔知點解我心中閃過一絲失落感…

就響我地差唔多去到排隊要上巴士既時候…

我感覺到Camp草既手背輕輕咁掂左一掂我既手背，然後再突然拉起我隻手，將我拉出排緊隊上巴士既人羣，向相反方向離去！

我有啲愕然咁望住Camp草，問佢：「你帶我去邊？」

Camp草微微一笑，好溫柔咁樣回答我：「當係我要妳陪我去行下、散下心啦。」

我冇出聲。

或者我呢個時候都需要散下心，去排除一下心中既屈悶。

我由得Camp拖住我隻手，向住尖沙咀海傍行過去…

Camp草隻手又大又溫暖，比到一種莫名既安全感我…

而且…

而且…

我個心入面湧起左一陣甜絲絲既感覺。

好溫暖。

我唔想鬆開手。

如果…如果…

只係如果…

如果梁建威係我男朋友，你話幾好呢…

行到去海傍，Camp草突然扮晒輕鬆咁講左句：「呼，吹下海風真係爽！」

咦？

其實…

會唔會係Camp草其實係睇穿左我有心事，所以先至主動帶我黎散心？

佢…

好似成日都能夠睇得穿我幾時係唔開心咁既…

有時即使我掛住滿面既笑意，佢都係能夠一眼就睇穿我既唔開心，再響我身邊陪住我…

如果…佢既女朋友係我…就好了…

海風不斷緩緩地拍打在我地身上…我地依然保持沉默…

雖然心中依舊會想起Jason既事，但唔知點解呢一刻企左響Camp草隔離，我冇左果種焦慮，就連傷心既感覺都淡左好多…

佢就好似一個避風塘咁。

…

…

我決定…向Camp草訴苦。

「Jason可能有第二個。」響Camp草既身邊，我竟然可以用一個好平淡既語氣講出黎。

「點解咁講既？妳見到？可能妳有誤會呢？」Camp草冇表露出任何驚訝，冷靜咁問我。

其實，佢一直同估到我有唔開心，或者唔多唔少都推測到我既唔開心係同Jason有關。


「誤會？」我搖一搖頭，有啲落寞咁講：「我都唔知。係我一個響港大讀書既姐妹話我聽，佢見到Jason拖住第二個女仔，仲要唔止一次，唔止一個。」


「哦？」


「其實…我一早知佢係個點既人…」我儘量冷靜咁講：「好耐之前我發現過一次，佢話會改。我信左，以為之後會一直相安無事，以為佢真係會為我而改，點知今時今日先知，原來佢根本由頭到尾都冇變過。」

其實…我內心深處又係咪真係相信過佢會改過呢？

「其實都未確定，可能只係誤會呢！」Camp草安慰我。

「嗯…可能啦。」其實，我知道唔會係誤會。

遙遙係一個十分可靠既人，佢唔去到確定一樣野既時候，佢係唔會亂講出黎。

唉…

…

…

正當我仍然思潮起伏既時候，Camp草突然同我講：「 不如…今晚你當住我係妳男朋友先，我同妳一齊響度散下心？」


我個心突然跳得好快，塊面同個身都好似突然好熱…

Camp草…叫我當住佢係我男朋友？

事出突然，我冇諗過Camp草會咁同我講，所以完全比唔切反應。

我變得除左識一副愕然咁望住Camp草之外，好似完全唔識比其他反應咁。

只係短短十幾秒既時間，但響我既感覺入面好似過左好耐咁。

Camp草突然間甩開拖住我既果隻手，指住我傻笑咁講：「講笑咋~有冇開心返啲呀！呢招係咪work呢？」


佢個樣、佢既表情傻下傻下咁，好好笑。

Camp草，多謝你響我咁唔開心既時候咁儘力去氹我開心呀。

同埋…

我知道…

你唔係講笑架…

我唔係傻既，我感覺到架。

至於我對你既感覺呢？唔知…你又感唔感覺到呢？

（待續）