十三
十三
著住呢個住hall look響campus入面行，呢種感覺真係令人好懷念呢～
身邊仲要係我大學既好姐妹Cathy媽媽~
咁樣諗一諗，我既心情都好返唔少~
難得返到黎，就算最後我同camp草既結局係點都好，就當比個機會我懷緬下過去，好好咁享受下啦～
…
…
…
嗯…其實我唔應該咁諗…畢竟時間無多啦。
不過難得身邊有兩個朋友，至少我唔會有空間去胡思亂想先…
Canteen距離我地住既hall一啲都唔遠，所以我地三個好快就去到Canteen，而且時間尚早，都唔算難搵位，我地三個好快就買埋早餐坐低食。
見住對面坐低既Cathy媽媽同Jessie，我隱約覺得佢地之間應該發生左啲事…
Jessie好似好熱情咁向Cathy媽媽獻殷勤，反而Cathy媽媽就好似尷尷尬尬咁…
以前佢地既關係好似唔係咁…而只係一對出雙入對既好姐妹…
而家反而似…Jessie好進取咁追Cathy媽媽？
唔…
我諗唔係冇可能…尤其是經過啱啱響浴格既經歷…我都幾肯定可以推斷Jessie其實係Lesbian…
過去既我冇察覺得到係因為我果陣時因為失戀（唔止Jason，主要係因為…Camp草…），所以摺得太過份，而且個人又好低落，反而要Cathy媽媽日日陪住我去開解我…
而冇幾耐之後Cathy媽媽就同阿熙拍拖了，Jessie亦都再冇出場既機會。
面對住Jessie不斷既攻勢，Cathy媽媽唔知係頂唔順定真係急，食食下走左去洗手間…Jessie可能見我響度，又冇做得太過火咁跟埋去…
「Jessie，妳同媽媽搞咩？」我飲左一啖奶茶，之後忍唔住心中既好奇，問一問對面嬌小既Jessie。
「我媾緊佢囉～」Jessie毫不猶豫咁回答，我差啲將口入面既奶茶噴返出黎。
唔得唔得…我要保持返個淑女形象先得…
「咳…咳…」為左唔噴返啲奶茶出黎，我濁親…
「唔駛咁大反應下嘛~而家呢個世代，同性戀好正常啫~」Jessie奸笑左下，伸一伸脷。
「唔係~唔係~妳誤會左，我以前讀女校，les見唔少~」我都伸一伸脷：「我係估唔到妳答得咁直接啫~」
「呵呵~」Jessie咁率直既性格…又真係幾可愛既。
如果我係鍾意女仔既，都可能會鍾意佢~
不過…
「唔…我唔知應唔應該講妳知好…」我猶豫左一陣，再道：「或者妳應該都知…媽媽佢…鍾意我地o camp果組入面既其中一個組仔…」
Jessie同Cathy媽媽咁熟，應該會知Cathy媽媽而家鍾意既係阿熙架？
再者我地都冇特別響Jessie面前避忌講呢樣野，我諗Jessie知道呢件事既機會都好大…
「我知吖~熙仔吖嘛~」Jessie一臉輕鬆咁講：「我仲知佢根本唔會鍾意女仔，淨係鍾意男仔添~」
「下？」聽到Jessie一臉輕鬆咁回答既我有小小吃驚：「咁妳仲要媾媽媽？」
「妳理得我吖~」Jessie一臉得戚咁回答：「幸福係要靠自己去爭取架！就算最後唔得都好，我至少已經盡過力去爭取我既幸福吖~」
「嗯…」我若有所思…
「而且，我地已經，嘿嘿嘿…」Jessie淫笑。
「下？」我諗到佢暗示既係…唔會既？
「我地已經好好朋友呀～」Jessie伸一伸脷，調皮地笑一笑：「總之冇野阻到我既！」
「呼…」好彩妳係講笑…
不過呢啲其實只係老生常談，但當下聽到Jessie講既呢一刻，我突然覺得好震撼。
因為…以我所知既未來，Jessie根本唔會有任何機會，就算Cathy媽媽同阿熙分左手之後，佢都只係同過男仔拍拖。
而Jessie，就一直以好姐妹既身份陪住Cathy媽媽。
但原來…Jessie從來未試過一開始就放棄…
或者咁講，佢已經儘左全力去追求自己愛慕既人，就算唔得都冇遺憾。
而我咁難得有機會返到過去，係咪應該做返啲野去爭取自己既幸福呢？
「妳又點呀？」Jessie突然奸笑咁望住我問。
「乜野點呀？」我扮左個無知樣出黎…
唔通佢知道我為左Camp草而煩惱？我同Jessie其實未熟到會傾心事，佢應該唔會知架…
「尋晚果個…應該唔係妳男朋友黎啦？」Jessie笑笑口咁望住我：「其實我今朝響我地果層既Lobby見到佢響妳間房行出黎，佢個表情好苦惱，又好爭扎咁。同埋…佢個樣好似做錯野既小朋友咁…如果佢係妳男朋友，應該唔會露出呢啲表情。」
嘩…Jessie妳不如搵埋遙遙一齊去開偵探社啦，遙遙負責搵線索，妳就負責推理…
我…無言以對…
「唔出聲即係我講中左啦。」Jessie又奸笑地道：「我睇妳而家既表情同佢今朝既表情，你地又唔似係純粹搵床伴咁簡單喎。」
嗯…
「妳地一定係有啲野既~」Jessie再笑一笑：「見妳今朝肯陪我沖涼…等我比個勸告妳啦。」Jessie既表情突然正經起黎：「唔好令自己後悔，呢個時代，女仔做主動好正常。」
咁係因為妳鍾意既都係女仔啫…
「就算係妳咁靚既女仔做主動，都好正常呀～」Jessie又調皮地笑一笑。
我主動其實唔係問題…個問題係…
「但係佢有女朋友。」唔知點解我對住Jessie好坦白咁講左個問題出黎。
「搶佢返黎囉～」Jessie拍一拍我個頭：「妳咁靚女~要搶人男朋友有幾難啫~」
我就係煩緊呢樣野囉…
不過，Jessie…好多謝妳咁鼓勵我…
「多謝…」我向住Jessie甜甜一笑：「我…會諗清楚點做。」
「妳係先好講呀~」Jessie笑住咁回答。
（待續）
