二十三
二十三
所以…
Year 1 Annual Dinner 果日對我黎講…係人生入面最難以忘懷既一日。
果一日…即使Camp草仲未親口對我表白，但係我已經確切咁樣感覺到佢既心意。
而且…果日係第一次同佢以情侶身份渡過既日子。
第一次同佢接吻既日子。
呢一日，無論對我黎講又好，對Camp草黎講又好，都係一個畢生難忘既日子。
估唔到…而家竟然再有機會比我同Camp草再享受多一次果日既經歷…
淨係呢一樣野，我今次返到過去已經值回票價~
其實，已經要好感恩了~
我同Camp草再一次咁默默地響海傍散步。
唔知行左幾耐…天色都逐漸昏暗落黎。
「我好開心~冇諗過可以再次同你咁樣響呢度散步~」我輕快地道。
講既都係真心話呢～
「我…都係。真係好開心。」Camp草R一R個頭：「不如…我地去其他地方行下？」
「嗯！」我用力點一點頭~
*
就係咁，呢一日，我同梁建威再一次以情侶既身份渡過。
我地開開心心咁走晒啲堂~開開心心咁去拍拖拖~就好似一對平凡既情侶咁~
冇做啲乜野特別野，只係好似其他普通既情侶咁行街同食飯~
但係對於我黎講，已經好好好滿足，係非常充實又開心既一日~
真係好耐都冇試過咁開心啦！
同Camp草一齊，成個人都充滿愛意~心入面甜絲絲咁！
真係冇諗過可以再有機會同佢以情侶既身份再渡過~
從Camp草既笑容笑睇，我知佢既感覺都係一樣~
至少呢一刻，佢真係暫時放低左Jenny。
呢一日…真係好開心好快樂咁渡過…
直至到…
*
回程了。
我拖住Camp草步出西鐵站，慢慢咁步向嶺大個校園。
我真係拖到佢實一實架~沿途好似引黎唔少人既目光~
呵呵~羨慕我幸福哩？
「傻妹，妳做乜拖到我咁實？」Camp草拍一拍我個頭：「我唔會走左去架喎！」
「哼！」我谷起面頰扮嬲，再好似嬲嬲地咁甩開佢隻手：「咁我唔拖囉～」
「拖拖拖~」Camp草捉返住我隻手：「妳唔拖，我拖！」
「哼！算你啦！」我扮晒嬲咁講。
我地一路打情罵俏，不經不覺間已經去到校園門口。
咦？
咦？
點解…
有個可以話係熟悉既身影企左響門口周圍望既…？
明明我記憶之中…過去既時候…我同佢響分手之後已經冇再見過佢架…
係Jason。
佢企左響學校大門出面。
我下意識dup低頭，拖住Camp草既手轉為橋實佢，慢慢向正門行過去。
我儘量唔想比Camp草察覺到有異樣咁，繼續我地既步伐前進。
不過…我突然唔出聲，又dup低頭咁，Camp草好似都察覺到我有小小唔妥，問：「妳冇事吖嘛？」
我搖一搖dup低左既頭。
「妳唔舒服？」Camp草問：「我地不如快啲返去hall休息？」
我點一點頭，想加快速度經過Jason。
我地加快步速，眼尾見到Jason既身影已過。
我鬆一口氣。
「梁冰冰！」Jason把聲響我背後響起。
我震左一震。
始終都係比佢發現到。
Jason從從後快步迎頭趕上，黎到我同Camp草既面前。
佢上上下下咁打量左Camp草一陣，再望住我，語帶不屑咁同我講：「唔怪得知今次咁堅持要同我分手喇，原來走左去搵男人！」
冷靜…冷靜…已經過左六年以上，我可以handle到的。
「我同你已經冇晒關係，我同邊個拍拖都唔關你事。」我保持冷靜咁同Jason講。
「梗係啦，妳一早已經搵左個男人啦嘛，咁同我分手好正常！點呀，我冇搵妳搞到冇人響床上面餵飽妳呀？」Jason一臉輕挑咁講。
原來佢講野可以咁核突。
同佢一齊兩年幾我都唔知。
周圍好似越黎越多人望住…
冷靜…冷靜…
「隨便你點講，你心知肚明究竟係邊個唔啱。」我繼續保持冷靜咁講。
「妳隻…」Jason仲想講落去。
「夠啦！」Camp草突然好惡咁講。
Camp草高高大大，惡起上黎個樣真係可以好惡。
Jason明顯比Camp草呢一喝嚇左一嚇，但旋即變返啱啱果個語氣：「呢位先生，我同我女朋友傾緊計關你乜事？」
「阿冰講左啦，佢同你已經冇關係，唔該你行開，唔好阻住我地返Hall。」Camp草平時個樣傻下傻下咁，但係認真上黎個樣真係好Man…
好有型呀~
「哦？點呀大舊衰，你用咩身份同我講野呀？」Jason把口原來可以咁衰。
「我係阿冰既男朋友。」Camp草堅定地道：「唔該借借。」
我突然間覺得面上一紅。
Camp草話…佢係我男朋友呀！
就算比Jason點話都好，有呢句已經抵返晒了。
Camp草冇再理Jason，轉為拖住我一齊走向學校正門。
「男朋友？你執我二攤架咋！佢下面比我屌到鬆晒先到你食咋，傻仔！」Jason刻意用好大既聲音咁向住我地講。
佢係特登要所有圍觀既人都聽到晒既。
反正佢都唔屬於呢度，對佢冇乜影響。
反而…我同Camp草有機會會比人響後面閒言閒語…
Jason…好賤呀你！
我返到黎過去先見識到你另一面！
Camp草突然停低腳步，有小小大力咁fing甩我隻手，擰轉身目露凶光咁望住Jason。
唔好呀…佢就係想你打佢呀…佢就係想玩大佢呀…
（待續）
