十六
十六
「唔係你諗咁樣架…」至少我真係唔係想玩弄Camp草既感情…如果唔係我都唔需要特登返到黎過去…黎改變一切…
但就算我同阿熙講我係來自未來,佢都唔會信架喇…
突然,我唔知邊度黎既勇氣,向阿熙坦白地道:「我對佢認真架!我…真係鍾意佢!」
我都唔知點解我要同阿熙坦白…
對佢坦白,對件事又有乜野幫助?
阿熙望實我…望左好耐…
彷彿睇穿我內心…
佢嘆左口氣:「我信妳,但支持妳搶人地男朋友呢句說話,我真係講唔出。」
我無言以對…
阿熙將啲notes同教材放好落個袋,之後同我講:「有啲野…時間唔啱就係唔啱…而且唔一定可以補救得到…」走過黎拍一拍我膊頭:「搶得人男朋友預左第時會比人搶返,妳好自為之。」之後出門而去。
…
…
我就係比人搶走左男朋友呀…
…
…
我呆滯咁坐左響張凳度,久久不能仔細地思考…
因為,我明白比人搶男朋友係乜野感受。
我正正係因為呢樣野而猶豫。
難得Jessie啱啱比我既勇氣隨住同阿熙既談話煙銷雲散…
我而家咁做…係咪真係好自私呢?
我想再次退出,但一諗起婚宴上面既時候我心入面既後悔感…果種心痛既感覺…
我真係好鍾意梁建威…好想同佢響埋一齊呀…
我繼續坐…
時間慢慢咁過去…
唉…
我都係做唔出決定…
我起一起身,準備離開…
咔嚓。
開門聲。
企左起身既我同準備返房既Camp草撞個正著。
我地四目相投。
Camp草個樣…好攰…好冇精神…
而佢見到我既表情…好似好驚訝咁…
唉。
我明明坐左響度好耐,但乜野解決方法都諗唔出…而家…都唔知可以講乜野好…
「呃…係阿熙比我入黎架。」我儘量扮到自然咁行埋去拍一拍Camp草個頭:「喂,死人頭,見到我個樣唔駛好似見到鬼咁樣吓嘛!」
「呀,係,係,係。Sorry。」Camp草個樣仲好似痴痴呆呆咁…
其實…佢呢個樣好得意~
見到佢,我唔想再錯過佢呢個念頭又再出現…
嗯…
或者…
不如…
「我唔係黎逼你做決定…」其實我本來係…「但係因為某啲原因…」我講講下dup低左頭:「你…可唔可以做多我三日男朋友先?」
其實細心一想,就知道Camp草既決定可以話冇可能逼出黎…
啱啱睇佢既神情…
如果逼佢而家做決定,隨時弄巧反拙,最後又係乜野都改變唔到…
既然…我自己呢一刻都做唔到決定,不如試下有冇機會,好好享受呢三日吧…
之後既事,或者留待下兩次去更加前既時間點睇下Camp草究竟會做個乜野決定吧。
雖然係有啲自私,但我唔想做決定果個…
或者咁樣都可以將我對破壞Camp草同埋Jenny既關係既內疚減低…
雖然同今朝我既焦慮同埋Jessie向我鼓勵既說話既野有小小矛盾,但或者呢個係目前最好既決定…?
係唔知Camp草會唔會答應?
Camp草低頭不語…良久,佢先緩緩地道:「其實…我已經覺得好對Jenny唔住。」
唉,似乎響Camp草心入面畢竟都係佢女朋友重要啲…
定係,呢樣野只係黎自佢既罪惡感?
諗起妖精先生既說話,我問:「其實…響你心目中,我重要啲定你女朋友重要啲?」
梁建威抬起頭…望到我實一實,對眼好似有野想講…
係錯覺?我見到佢既目光中有我。
「唉…我…唔知…」Camp草dup低頭,最後都係冇講個答案出黎…
但我啱啱…好似…感覺到啲野?
我走埋去Camp草面前,輕輕咁握住佢手臂搖兩下,再淚眼汪汪咁望住佢:「我真係唔係逼你落決定…你響呢三日入面鍾意幾時去搵Jenny都得…我淨係…想你呢幾日陪下我…」
Camp草望一望我,嘆左口氣:「兩日得唔得?第三日…即係今個星期六,我要比賽…Jenny會黎睇…」
嗯…
兩日…都好過冇啦…
不過我唔可以將呢啲失望顯露出黎既…
我gut高腳,吻向Camp草雙唇,再古古惑惑咁笑住同Camp草講:「嗱~你應承左,冇得反口架啦~兩日就兩日啦~男!朋!友!」
Camp草應該係比我既反應反差嚇到呆左一呆~
好搞笑呢~
「喂!乜我做你女朋友好失禮你咩!做乜咁既樣!」我鼓起塊面扮嬲,再拍一拍Camp草手臂~
Camp草乾笑左幾下:「唔係…唔係…」
「喂!你都應承左做我男朋友兩日,之後一唔一齊就之後先再算,而家你快啲同我打起精神!」我繼續鼓起塊面同Camp草講。
而呢個…都係我呢一刻既諗法…
「嗯,咁好啦!」Camp草打起精神同我講,之後對我笑左一笑:「妳話點就點啦,女朋友!」
我裝作睇唔出佢只係強打起精神,捉住佢雙頰,再深深吻向佢咀唇…
「啜!」仲要特登錫到好大聲,嘻嘻~
既然決定左要enjoy,就等我帶頭去enjoy~
咁Camp草好快都會真真正正咁打起精神~
(待續)