三十四 (結局)
三十四 （完）
嘈雜既人聲…
司儀講野既聲音…
我慢慢再次睜開雙眼…
返到黎我第一時間即刻望下梁建威既無名指…
佢無名指依舊帶住結婚戒指。
而我既無名指？乜都冇。
「好喇，我地係時候睇下新郎新娘既成長片段喇！」男MC又係好行貨咁講…
然後周圍熄晒燈，屏幕上面開始播成長片段…
…
…
咦？
Cathy & Andrew？
Cathy媽媽同阿熙？
我望一望原本Cathy媽媽應該坐緊既位…
Jessie？
妳黎左既？
我再望一望女家啲賓客…全部唔同晒既？
正當我疑惑緊既時候…
咔嚓！
噢…又來了…
哈利路亞~哈利路亞~
周圍既人又再一次停止移動。
…
「妳真係多管閒事。」妖精先生既聲音由我背後傳出黎：「但係…妳改變左人地既人生，反而改變唔到自己既人生。」
佢諗左一諗，再講：「應該係話…妳放棄改變。」
我無言。
心痛既感覺又再次侵襲我全身。
「妳點解要放棄？」妖精先生再嘆一口氣：「妳明明只差一步…可能根本連第二同第三次機會都唔駛用。」
「我…都唔知…」我轉過身望住妖精先生：「我只係…順從我果一刻既內心而行動…」
妖精先生上下打量左我一下：「妳覺得…原則真係咁重要？」
我諗左一諗…其實…原則唔一定咁重要…
只係…
「如果我咁樣搶走阿威，佢同我就算真係響埋一齊，大家都唔會開心。」我諗起阿威個內疚樣，再答：「以我同佢既性格，大家都會好內疚…既然一齊都未必會開心…咁點解仲要響埋一齊？」
「唉…人類…」妖精先生又嘆左口氣…
沉默左一陣。
「愛情係自私架，細路女。」妖精先生繼續講：「好似妳咁主動放棄已經到手既機會既人類…我第一次見。真係第一次見。」
「我咪自私先至咁決定囉！」我勉強撐起笑容：「我要拍拖結婚，都要拍得結得開心先得架嘛！係咪？」
但點解…我會笑得咁心痛既？
「唉…咁講既話，妳冇機會架喇。剩返果兩次機會，唔用都得喇？」妖精先生嘆左口氣：「點返去以前都好，個男仔既太太既出現點都係響妳識個男仔之前。」
…
…
…
…
係喎！
我記得梁建威話過，佢同Jenny響中四果年識既…
咁我返去中四果年，搶在Jenny之前認識Camp草咪得囉！
點解我而家先諗到！
蠢材梁冰冰！
「我可唔可以返去我中四果年？」我好急咁問妖精先生。
「可以…但…莫非妳想…？」妖精先生一臉愕然：「但係果陣佢唔識妳架喎！」
我知道架…但係我想試下。
「我知道。但係…唔試下又點知唔得呢？」其實我都冇信心架…
不過，試左未必一定得，但唔試一定唔得！
我而家仲有野好輸咩？
「嗯。」妖精先生點一點頭：「咁妳預備好未？」一邊講一邊拎起個乳豬頭咬。
「呀…麻煩你等等。」我記得Camp草提過佢讀果間中學叫乜野名，但我都想上佢Facebook確認一下。
我記得佢Facebook有寫既。
Ok，準備就緒。
「可以喇。」我向妖精先生道。
「祝妳好運。」妖精先生微笑。
「呀，臨走前我有個問題想問下你。」我向住妖精先生微微一笑：「可唔可以？」
「隨便。」
「點解…你會比機會我而唔比Cathy返過去？」我問，指一指新娘。
「唔…妳真係想知？」
我點一點頭。
「佢丈夫…最愛果個並唔係佢。」妖精先生道：「我既原則係，大家都需要互相最愛大家先至可以出手幫忙。」
呀…
咁即係…
梁建威真係最愛我？
我點一點頭：「多謝你，妖精先生。」
妖精先生微笑：「希望妳黎緊呢六日，真係可以令佢愛上妳。」
「多謝。」我由衷感激。
「準備好未？駛唔駛再用日文講？」妖精先生用一個奸狡既表情望一望我。
「唔駛啦～咁經典既野，聽一次夠喇。」其實係我想快啲返去~
今次…一定要成功呀。
妖精先生繼續咬住個豬頭，然後指住我：「說出妳的願望吧，否則不會讓妳如願！」
差唔多到最後了…
我深呼吸，集中精神，再大嗌：「哈利路亞，chance！」
灼熱既光芒、被吸走既感覺…
再一次失去意識…
*
我睜開眼睛…
熟悉既天花版…
我訓左響自己間房張床上面…
我坐直個人，再周圍望下…雖然隔左差唔多十年，不過我間房既擺設都係冇乜點變呢～
我再望一望個月曆，今日係2006年9月1號，即係訓醒覺就要返學…
好~我已經決定左點做架喇~而家首先就要好好咁訓一覺休息一下，養足精神，等聽日可以用最好既狀態見Camp草~
*
我雖然已經提早左起身，但幾乎係衝出門口。
我已經唔想再錯過任何機會。
我並唔係返學，而係趕依住響正式上堂之前去到Camp草就讀既學校門口。
到達佢學校正門前七點都未夠。
因為我唔知Camp草習慣幾點返學校，所以越早過到黎越好。
我要早過Jenny遇上佢。
我一路冇分心，眼光冇離開過正門附近。
學生漸多，唔少同學，尤其是男仔都好好奇望下我。
然後，
出現了。
我冇詳細咁諗過點做，只係知道雙腳已經不過自主咁向梁建威行過去。
「梁建威！」我嗌佢個名。
梁建威既身影停低望實我…眼光入面有啲好奇…
我抬起頭望住佢，面上不由自住咁紅起上黎。
好緊張…
我深吸一口氣…
「我好鍾意你！你…可唔可以做我男朋友？」
（我響婚宴酒樓遇到一個教堂妖精，佢話可以幫我回到過去… 全文完）
