十四
十四
呢個時候，我見到Cathy媽媽慢慢行緊返黎。
「媽媽返緊黎，唔講呢啲住啦！」我提一提Jessie。
「好啦好啦～」Jessie點一點頭。
不過我有啲野想知道…趁Cathy媽媽返到位之前快啲問埋佢先…
「問埋妳最後一樣野…」我古古惑惑咁向Jessie笑一笑，再問：「妳真係淨係鍾意女仔？」
Jessie低頭諗左一諗，好快咁答我：「唔知呢？總之…我淨係同女仔拍過拖。」
Cathy媽媽呢個時候都行到返黎了。
「妳地咁好傾咁既？」Cathy媽媽微微笑住咁問我地：「傾緊乜野？」
「冇野~冇野~」響我眼中毫無羞恥之心既Jessie竟然有啲面紅，再向我係咁打眼色。
其實妳都已經做到幾出面，再加埋Cathy媽媽某啲反應，我懷疑Cathy媽媽都應該知道妳做緊乜野…
咁妳就唔好突然咁怕醜咁喇！
我向佢古古惑惑咁笑~
今次仲唔到我可以整古返妳~
「哦~我地講緊…」我故意拉長黎講，等Jessie估唔到我下半句講乜野，哈哈~
Jessie雙眼矋住我…
「…點解媽媽妳去洗手間去咁耐啫~」我講完之後向Jessie伸一伸脷~
Cathy媽媽俏面一紅。
哈哈~
「唉，唔講啦，我夠鐘上堂。」Jessie再向我打一打眼色：「一陣返hall見啦。」之後就轉身走左。
雖然我啱啱咁樣整古妳…但係…多謝妳呀…Jessie…
上天比個機會我遇到妖精先生，再將我送返黎過去，就係比個機會我主動去爭取幸福…
無論最後成唔成功都好，我諗我至少應該再主動啲試一試…
尋晚向Camp草表白其實已經係做左第一步，之後或者應該更加主動去做第二、第三步，而唔係響度等Camp草慢慢考慮…
我得三日時間，就算再加埋之後果兩次回到過去既機會，我都係得九日時間…
其實…真係時間真係得好少…
「阿女？」
好似有人講緊野咁…
「阿女？」
把聲好熟…
「阿女！」原來係Cathy媽媽大聲叫我！
「呀！係係係…」我比Cathy媽媽嚇一嚇之後應一應佢。
「妳諗緊乜野諗到咁入神咁既？」Cathy媽媽微微一笑：「我叫左妳好多聲喇。」
「係咩？」我向Cathy媽媽傻笑左一下：「呀，我諗起有啲事我有走先~」
聽完Jessie一席話之後我就下定左決心。
而家就要去搵Camp草！
Cathy媽媽有小小愕然，不過都係點一點頭：「嗯，咁我地陣間返hall見啦。」
我臨走之前突然醒起小小野。
「係喎，你同阿熙有冇進展？」我問一問Cathy媽媽。
Cathy媽媽面上突然一紅，冇出聲，不置可否。
我心念一動，諗起Jessie啱啱同我講既說話，再諗起呢個時間點之後既兩個月左就到Cathy媽媽同阿熙拍拖…
然後佢地唔係拍左好耐拖就分手…
雖然話佢地分手後都仲係朋友，而Cathy媽媽之後都有拍過拖，但我覺得佢個心入面仲有阿熙…
或者…就好似我既心入面仲有梁建威咁…
然後再諗起尋日去阿熙既婚宴，阿熙既新娘唔係Cathy媽媽…
…
…
…
咦？點解妖精先生唔去幫Cathy媽媽，反而黎幫我？
唔通因為我係呢個故既女主角？
唔好理呢樣野住…
我將身靠一靠前，捉住Cathy媽媽對手：「記住…如果妳有朝一日，真係同阿熙拍拖既話…」我好認真咁望住佢：「千其唔好放手。幸福係要由自己主動爭取，知唔知？」
Cathy媽媽既表情似乎係有啲驚奇我同佢講呢番說話。
我諗起我之後幾日，應該會專注返自己回到過去既目的，未必再有咁多時間理Cathy媽媽，於是再問多佢一次：「應承我，唔好放手，好唔好？」
Cathy媽媽有啲茫然咁點一點頭。
我嘻嘻一笑，道：「陣間見啦。」
之後我就急步咁行左出Canteen。
*
今日係星期四，如無意外黎緊呢兩日我應該會走晒啲堂…
始終我返到黎既目的唔係返黎聽書嘛。
我急急步咁走到去Camp草住緊果棟hall。
其實就響正我住棟hall隔離。
我企左響門口，深呼吸一口氣，然後入左去看更個counter度拍卡，以訪客身份入黎。
我響地下大堂度等，個心跳得越黎越快…
陣間應該點講好呢？
「不如唔好再等啦～我地而家就一齊啦！」
會唔會太主動？
「我知你個心仲有Jenny，但我會等你架。」
但如果Camp草唔同Jenny分手我咪要變老孤婆？
「唔好再理Jenny喇，我知你心目中得我架啫！」
好狐狸精feel…再講，我那來的自信…
突然我感覺到有人拍拍我膊頭：「同學，妳入唔入架？」
我嚇左一嚇，原來響我胡思亂想期間已經有到左。
「Sorry，我入架。」我一入去就㩒左。
然後出果陣我發現左一個大問題。
Camp草就成日黎我間房，但我其實一次都未去過佢間房…
佢間房響邊架？
（待續）
