十九

十九

你問我信唔信名偵探遙遙既說話？

…

其實…

我心底裡面好清楚知道佢講緊既都係事實…

我心入面湧起好多唔既情緒…

有傷心、有無助、有失望、有感到被背叛…

但係，即使我好唔開心，都冇再好似上次咁覺得崩潰，亦唔再覺得係世界末日既大事，更加冇再覺得絕望…

或者我潛意識黎講根本一早都預計到呢件事既發生。

尤其是Jason上左大學之後陪我既次數越黎越少，果陣我心底裡可能已經起左疑心，只不過我自己選擇去相信佢…

而家遙遙撞破佢既好事，我其實都冇得唔信…我唔信遙遙會呃我。

我攤左響張床一陣，合埋雙眼休息。

我攤左響床唔知過左幾耐…望一望個鐘，原來不知不覺已經三點半了。

係時候要起身了。

因為心情欠佳，我今日已經走晒所有堂架喇。不過，我o camp既同組朋友肥仔賢幫我地成組報晒名參加學系既Annual Dinner，我都係時候要起身裝扮下了。

其實，我心情差到乜都唔想做，連去Annual Dinner都唔想…

但係我約左Camp草上黎一齊出發去搭車，所以我不得不勉強打起精神換衫…

Camp草一陣黎陪我都好既，好過我自己一個響度胡思亂想。

最近，我既生活好似已經離唔開佢咁。

唔知佢係咪有心，但我覺得最每當我唔開心既時候，佢都會出現陪住我。

上次Jason失左約冇同我去海○公園玩哈囉喂，Camp草知道左之後即刻拖住我去玩大學宿生會舉辦既鬼屋，彷彿要補償返Jason對我既失約咁…

其實…我最近諗起Camp草既次數…係咪多過諗起Jason？

不過…我地大家都各有愛侶…如果再有進一步既關係，對我地大家都冇好處…

唉。

雖然我估我同Jason好快就會分手。

我好快咁樣化左個淡妝，然後再換上一件黑色既連身裙，響塊鏡面前襯左一襯，然後又坐返低響床，繼續乜都唔想做，儘量放空個腦乜野都唔去諗…

但越係唔去諗野，遙遙既說話就不斷咁響我個腦入面盤旋…

咯！咯！

唔知過左幾耐，我間房既房門傳來敲門聲。

應該係Camp草。

我由床起身，走過去一打開門，見到既係Camp草果張充滿暖意既面容。

佢今日著左一件普普通通既黑色西裝。

佢目定口呆咁望住我。

見到佢，我既心情好似好返小小。

唔可以比佢知道我唔開心，等我引一引佢先。

於是我掛起個笑容，問：「我靚唔靚呀？」

Camp草即刻堆起滿臉笑容：「Camp花喎，著乜都靚架啦！」

「哼，口花花！」我指住Camp草扮左個嬲樣。

「唔係啦～真係咁覺得架！」Camp草又問：「妳響度搞緊乜野呀？」

「冇呀。睇下書咁囉。」我強撐起個笑容答佢。

其實我成個下晝乜都冇做過…不過，我唔想比Camp草睇得出我既心事，所以求其作啲野敷衍過去。

雖然我好勉強撐起笑容，但係之後唔知係咪Camp草始終都留意到我唔開心呢？佢開始不斷咁搵話題同我傾計，氹我開心。

不過比起平時，我回應得唔多…

嗯…其實…我想自己靜下…所以我都覺得佢有啲煩…

不過，咁樣比佢煩下煩下，又好似真係少左時間去諗Jason既事…

再加上佢努力搵話題氹我開心個樣又幾可愛…（唔係指佢個樣貌，係指成個動作）

唉，都係嬲佢唔落。

況且，佢都只係想氹我開心啫。

佢每次估到我唔開心，總係會好落力咁去氹我…

傾左一陣，我地都出發行去main campus既大門口集合地點，而沿途Camp草仲依然係不斷搵話題同我傾。

我地既系莊租左架巴士，比我地呢啲由main campus出發既學生乘搭。

我同Camp草去到集合地點，會合埋其他同組既組員仲有組爸組媽…

好似好耐都冇咁齊人…不過係咪少左個人？

唉，不過我都冇乜心情去理…

我成個腦都比Jason既事同埋遙遙既說話佔據晒…

好快我地一行人就上左巴士，起程去尖沙咀既一間酒店，即係今日Annual Dinner舉辦既地方。

其實去到會場之後，我都仲係好心神恍惚，淨係記得好似有好多男仔過黎搵我影相…

不過有樣野我有印象，就係每當啲男仔過黎搵我影相既時候，Camp草個樣好似有小酸溜溜咁~

其他野…就冇乜印象了…

成餐飯，我坐左響Camp草隔離，淨係好心不在焉咁樣食…食…食…

然後，就係不斷咁留意自己部iPhone…

沒有。

完全沒有任何黎自Jason既訊息。

遙遙倒是send左幾個WhatsApp比我。

不過…我冇開到。

我唔敢睇。

我驚係有一啲關於Jason同第二個女仔出街既消息。

哈，我自己同自己講，對Jason可能已經心淡，唔會比佢影響到我，但而家竟然連打開遙遙send比我既WhatsApp既膽量都冇…

我自己算唔算自欺欺人？

兩年幾既感情…真係可以話冇就冇咩？

（待續）