三

三

時光彷彿倒流了數年，返到去我讀大學year 1既時候。

彷彿回到我同camp草…果日發生左關係之前咁。

我地默默咁響商場散完步，之後返到酒樓，同主人家打聲招呼影幅相，就坐返響我地果圍枱度閒聊。

我地今日係o camp所有同組一齊坐，但係而家六點幾差唔多七點，都只係得我同camp草到左。

上天就好似造就多一次機會比我同camp草獨處一樣。

所有回憶同感覺…好似由心深處湧出黎一樣。

我以為自己已經放低左呢段感情，但其實我只係將呢段感情鎖左響我個心既深處，而今日見到camp草之後，呢個潘朵拉的箱子就被打開了。

或者因為咁，所以儘管我有好多追求者，但我到而家都仲未拍拖吧…

…

…

…

唔係既唔係既，只係啱feel既未出現啫~

不過…而家同camp草傾計，就好似係個天比最後一次機會我感受呢段感情…

一路同佢閒聊互道近況，但係我既目光好多時都停留左響佢左手既無名指手上。

一隻結婚戒指。

我知道，今次無論如何都要放低梁建威啦…

唔好再有任何妄想啦…

不過，呢個唔係正正係我希望既結果咩？

我當年退出就真係為左成全佢同佢太太Jenny，而家唔係成功喇咩？

唉…

個心…

好似仲隱隱作痛…

*

隨住越黎越接近開席既時間，大家都陸續入席，我同camp草既二人時光都要真真正正地結束了…

兩位婚宴司儀都走左上台準備播新郎新娘既成長片段…

「事不宜遲，等我地一齊欣賞下新郎新娘既成長片段先啦！」男MC好交行貨咁講。

個個既來賓既注意力都集中響段成長片段上面，唯獨係我…

我既注意力一直集中響camp草左手無名指上面既結婚戒指上面…

如果我當日冇退出到呢段三角關係既話，呢隻戒指另一半既主人…會唔會係我呢？

我今日見返camp草之前冇諗過…原來可以有種好後悔既感覺襲上我心頭…

好想返到過去…

好想再來一次…

再來一次…

如果有機會再來一次…

今次…

我一定唔會再放手…

「咔嚓！」

我好似聽到熄燈聲…明明播成長片段之前已經熄晒燈架啦？

但個場又好似再暗左，連成長片段個mon都暗埋…

仲要周圍既環境好似定格晒咁既…？

「哈利路亞！哈利路亞！哈利路~呀！」

耳邊突然響起呢首聖詩既聲音既…？

莫非阿熙同佢太太信教，所以成長片段既配樂係聖詩？又好似唔係喎…

因為阿熙一講親信教既人就「耶撚」「耶撚」咁叫…

又突然有一陣強光射向我…

但係…點解呢個情景好似…似曾相識咁既？但一時三刻我又醒唔起邊度見過…

「王爾德曾經說過…」一把中年男人既聲音突然響我背後出現：「男人希望成為女人的第一個戀人，而女人希望成為男人的最後一個戀人。」

我嚇左一嚇，好快咁擰轉頭望向聲音既來源。

原來係一個樣貌好似日本男明星三上○史既男人，著住黑色禮服企左響我後面講野。

「而你，」三上○史指一指我：「就好想成為佢最後一個戀人。」再指一指camp草。

好奇怪…而家周圍既人好似定晒格咁，靜晒，亦冇人望過黎呢面望呢個奇怪既男人。

唔…呢個場景咁熟悉既，但我一時間真係醒唔起邊度見過…

「唔好意思…」我禮貌地問：「請問你係呢度既工作人員？」

「工作人員？」三上○史哈哈一笑：「乜我個樣似咩？」

「都幾似架。」我好誠實咁答。

三上○史拍左一下我個頭：「工你個頭！我係咁啱路過黎幫妳架！」

我扁扁咀咁摸一摸我個頭頂：「好痛…唔駛咁大力下嘛…」

三上○史冇理我，繼續講：「你地人類都幾得意…我做左呢一行好多年，都見過好多響婚禮上面垂死爭扎既人…」

呢個中年男人越講越奇怪…

「不過通常都係對新郎或者新娘充滿悔恨想重新黎過。」三上○史指住我：「但係好似妳咁竟然係對住另一個賓客流露出咁強烈既悔意我都係第一次見…」

咦？我開始醒起我響邊度見過呢個場景喇…

「妳想唔想回到過去，再去塑造返一個如妳意願既人生？」三上○史續問。

呢句台詞…

應該冇錯喇…

我大學果陣住左三年宿舍，但係我算係摺友，通常閒時冇堂上冇野做都會留響房度煲劇。

唔記得係大學邊一年喇…我睇過一套日劇叫求婚○作戰，入面有個由日本男星三上○史飾演響教堂入面居住既妖精，幫男主角山下○久回到過去追求長澤○美…

而家所有既場景咪同套劇入面一模一樣？

唔通…

我真係響現實世界遇到呢個妖精？

「答你之前，我想問一個問題…」我戰戰兢兢咁問：「可以嗎？」

「隨便。」

「你…係咪唔係人類？」我講出呢句匪疑所思既問題。

（待續）