九
九
聽到Jenny個名，Camp草成個人停左。
我個胸口好似比人打左一下咁，好痛…不過我冇放棄，繼續主動咁吻向Camp草既咀唇…
Camp草用手輕輕咁推開我…面色變得十分難睇。
「不如…我地停啦…」Camp草好似好用力先講得出呢句：「我…唔想再錯落去…」
點解…
我眼淚忍唔住奪眶而出…
我記得…呢一晚，梁建威應承做我一晚男朋友架…
我短短時間入面經歷回到過去，又再經歷多一次失戀，個人好似變得越黎越唔冷靜…
我以為自己過左咁多年，個人會成長左…
原來…冇…
我淚眼汪汪咁望住佢，說道：「你…應承做我一晚男朋友架…」一滴眼淚沿住我既面頰流落黎：「點解你要講大話…點解你要比個假希望我…」
其實尾果兩句…我係對妖精先生講既…
原本既我…或者咁講…當時既我，其實一早有晒心理準備…所以縱使唔開心都可以坦然接受梁建威返去Jenny身邊…
不過今次返黎過去…即使我唔知係咪應該做第三者去搶Jenny男朋友，但我諗我潛意識我真係相信左妖精先生既說話先決定返黎過去…
無奈…天氣不似預期…
點解…要比個假希望我！
仲要咁多野，將我送返黎過去！
Camp草雙手抱頭，道：「我…好亂…」
我抹一抹眼淚…把心一橫，既然都黎到過去…我決定…豁出去！
「梁建威，我鍾意你！好鍾意好鍾意！」我再一次吻向Camp草…
Camp草好似好愕然：「吓？」
我雙唇離一離開，再一口氣講晒出黎：「由你幫我開始響Re U果陣頂左Simon爸爸既懲罰，我已經開始留意你…之後你陪左我渡過好多唔開心既時光，慢慢咁慢慢咁我真係發覺自己鍾意左你！」
「妳…」Camp草欲言又止…
我唔比時間佢拒絕我：「你都鍾意我既，係咪？」
Camp草情不自禁咁點一點頭。
呢點其實我知…淨係唔知…究竟係Jenny既份量重啲定係我既份量重啲…
「嗯…其實…我感覺得到架…」我心情稍為平伏落黎…然後伏落Camp草結實既胸肌上面…「不如…比個機會我地…試下一齊…好唔好？」我再試探性咁問一問。
沉默。
不過…至少比即時拒絕我好？
我抬一抬頭望住Camp草，佢眼神好迷茫…
我再次伏響佢心口，冇逼佢即刻做決定…
「可唔可以…比我諗一諗先…」Camp草有氣冇力咁講：「我好亂…我覺得我已經好對Jenny唔住…我…過唔到自己呢一關…」
「嗯…」至少我可以暫時暗暗鬆一口氣…我啱啱真係以為…自己今次返黎…反而令到件事更加差…
雖然我可以留響呢度既時間只有三日，但都唔可以逼得Camp草太緊…
我驚…隨時有反效果…
呢一晚，我地冇再做到愛…
或者係因為個氣氛突然變得有啲沉重？
定因為Camp草真係好認真咁諗緊我地既問題？
我唔知…
總之，我同佢兩個赤裸裸咁攤左響張床上面…我攬住佢…佢又攬住我…我地雙目合上休息…
不過…我唔想真係訓著…亦乜野都唔想諗…我淨係想趁仲有呢個機會，好好咁享受同Camp草一齊既呢一個時刻…
無論個結果係點都好…至少我講左我既諗法出黎，呢一次回到過去都叫做有啲價值…
呢一刻…就等我好好享受響情人懷中休息吧…
拖住疲累既身軀…我最後都係忍唔住沉沉入睡…
*
陽光從房窗透入。
我微微睜開雙眼…
身邊既Camp草已經起左身，眼光光咁望住天花板，好似沉思緊咁…
「早晨。」我望住佢甜甜一笑。
「嗯，早晨。」Camp草反而好似有啲尷尬。
睇真啲，佢個樣好攰…好似成晚都冇訓過覺咁…
我冇打擾佢，繼續攬住佢想訓。
不過呢個時候佢企左響身，響地下搵返啲衫褲，之後一言不發咁著返晒…
我記得…上次我地既告別既溫馨又傷感…
今次好似唔同左，睇黎…歷史已經開始改變？只係唔知會向好定壞既方向啫…
Camp草一言不發咁背住我行去門口…
唉…似乎唔係向緊好既方向改變…
「對唔住。」Camp草開口了。
我心中一痛，似乎我都係改變唔到任何野…
「尋晚既問題…妳可唔可以比小小時間我諗諗…我都好鍾意妳…」Camp草依然係面向住度門：「但我覺得自己好賤…我冇資格去得到妳同Jenny之中既任何一個。」
嗯？似乎又壞唔晒噃…
我從床上面起一起身，一絲不掛咁響背後攬住Camp草…
「唔係咁架。」我柔聲地道：「不過…我會等你既答案。」
「嗯。」Camp草終於都肯回攬返我。
攬左一陣，Camp草都係走左…
*
我坐左響自己張床度，環顧一下當年我自己間房。
好懷念呢。
書架上面整整齊齊咁放左幾本書，然後一切既日用品放左響書枱隔離個櫃仔入面。
我打開衣櫃，入面都整整齊齊咁放好左我啲衣物。
我再望一望對面…我同房個位好似乜都冇咁…
我依稀記得，佢連第二個sem都冇乜點返黎…
所有所有既感覺…真係令我好懷念呢…
尋晚一返到黎就同緊梁建威上床…令我根本黎唔切反應…而家我先真係感覺到…我真係返左黎過去呀！
（待續）
