三十三
三十三
「我知妳諗緊乜野。」我向Jenny撐起個笑容:「因為就算響學校都好多人誤會我同佢係情侶。」
Jenny仍然係淚水汪汪咁望住我,等我講落去。
「點講呢…佢同我係O camp同組既朋友,好難得叫做傾得埋。妳應該都知道,響大學要搵到個知心既朋友唔容易,咁啱我同我男朋友之間出左問題,所以就想搵個男仔朋友傾下,問下佢男仔角度既意見。」我講左個大話。
我清楚知道自己之後一定會後悔。
因為…我已經後悔過一次。
但係…或者係我自己有本身既諗法,而自己都爭扎左好耐…
我曾經諗過…
我要自私一啲,將人地既男朋友搶過黎。
但呢一刻,我面對面咁對住Jenny,我好肯定自己做唔出呢啲野…
就算我搶左梁建威返黎,我同佢既良心都唔會好過…
就算真係一齊左,可能呢一世大家都會有條刺響度。
而且…我仲好記得佢果個隱藏住沉重內疚既表情。
…
所以…
…
我再一次選擇放棄…
Jenny聽完我講之後止左小小喊聲,再半信半疑咁問:「真係咁…?」
我點一點頭。
「冇呃我…?」
Jenny個語氣好惹人憐憫…
「我如果要搶妳男朋友,仲會同妳講咁多野?」我同Jenny講:「要搶既話,我同妳就唔會心平氣和咁講野,係唔係?」
我一路講,其實一個心一路乸住乸住咁痛…
我將會再一次,將梁建威由我掌心中流走…
Jenny好似有小小相信我咁,但諗左一諗,又喊住口咁問:「如果妳同佢真係冇野,點解佢唔話比我知妳同佢係好朋友?」
呃…
係囉,點解呢?
嗯…
不如試下咁答喇…
「可能…佢係驚妳誤會?」我繼續講:「可能佢驚妳知道佢同一個女仔朋友咁close,妳會亂諗野。」
「就係佢唔講我先亂諗野…」Jenny開始止住眼淚,但仲有幾滴眼淚沿住臉頰流落黎,個樣依然係一副可憐兮兮咁既樣…
「嗯,我明白妳既感受。但妳有冇諗過,可能係佢真係好愛妳,好驚妳誤會,所以先至用咁既方式去處理呢件事呢?」
「但係…」Jenny仲想追問…
其實…
我已經冇力氣再答…
因為…我知道之後會發生乜野事…
我今次真係走左出洗手間,一面答佢:「總之,妳要相信佢。」
今次Jenny冇再阻止我,我直直咁走出洗手間。
個天一片灰暗。
唔係。
事實上係我既內心一片灰暗。
但係…
我覺得我做左個正確既選擇。
我已經再冇留響球場既理由,因為梁建威唔再係我男朋友。
我決定返屋企,咁梁建威想搵我都唔會搵得到。
於是我慢慢咁離開球場。
響回家既車程,響巴士上面,我拎出左電話,向Camp草打左最後一個短訊。
本來想寫好多野,但係最後決定咁寫:
「威威:
好多謝你,為左保護我而選擇做我既男朋友。
呢三日雖然好短,但係我好開心,因為我期待已久既願望,終於成真。
不過我諗我地都好明白,你既心目中有另一個好重要既人存在。
我地唔可以咁自私,將我地既快樂,建築響人地既痛苦之上。
所以,好多謝你呢三日以來既照顧,但以後記得要好好咁對你女朋友。
以後要對你女朋友好啲呀,咁樣就係對我最好既禮物。
再見。
冰」
我望住個短訊send左出去,再無法收回。
我相信佢會響見到Jenny之前睇到個短訊,然後好好咁處理佢地既關係。
我熄左個電話。
「以後要對你女朋友好啲呀。」
估唔到我會講第二次呢…
人生…真係一個大玩笑…
但係…
既然咁好笑…
點解我既眼淚會無法停止咁流出黎既…
我響巴士上層既座位上面無力咁用雙手掩埋塊面,孤單咁啜泣…
直到返到屋企…眼淚都無辦法停落黎…
屋企依舊空無一人…
我拖住疲累既身軀,響床上面訓低…
然後…
我都唔記得自己係點過…
好似喊下停下又再喊下停下…
冇食過野…冇飲過水…
過左唔知幾耐,我終於冷靜返小小。
然後,我再一次諗返呢三日發生既事。
好似發夢咁。
不過…都有過甜蜜既部分。
至少曾經擁有過,已經不枉此生了,係咪?
我望一望個鐘,原來都差唔多十二點,意味住我既旅程就快要結束。
我都係時候要收拾返心情。
返到去人地既婚禮上面,冇可能再淚流滿面…
要喊既,啱啱都已經喊晒。
我已經成長左。
我知道今次返到黎過去,已經好有得著。
至少我已經享受過三日甜蜜既日子。
已經足夠響我人生入面回味。
個鐘慢慢咁指向十二點…
再一次…一陣強光迎面而黎…
再一次…全身感到灼熱…
再一次…我好似被吸入另一個空間咁…
再一次…我失去意識…
(待續)