二十一

二十一

Camp草一臉尷尬咁繼續邁開腳步向前行。

而我就繼續響佢隔離並肩咁行。

見到佢為左氹我開心而搞到自己一臉尷尬既樣，我既心入面湧起陣陣暖意…

同埋情意。

呢個傻佬。

我緩緩地將自己隻右手拖返住Camp草隻左手，當係作出我既回應。

響我拖到Camp草隻手既時候，佢個身好似微微一震，然後用一個好愕然既表情望住我。

我感覺到…佢既身體好似突然間僵硬左一樣。

呢個傻佬~

「就比你做我一晚男朋友啦。」我低住頭紅住面咁細細聲地道。

「嗯。」Camp草好似冇預過我會咁講，完全比唔到反應我。

傻瓜，你唔係想咁樣拖住我行既咩？

拖住Camp草繼續響海傍行左一陣…可能因為全日我個腦都響度諗緊Jason出軌既可能，精神上有啲攰，所以好想搵個人比我挨下、抖下。

Camp草結實既臂彎就係一個好好既避風塘。

作為期間限定既男朋友，就算比我挨一下都唔過份啫？

於是，我慢慢將個頭挨落Camp草既手臂上面，輕輕地道：「比我挨下。」

「嗯。」

我覺得…響Camp草臂彎保護之下好有安全感、好溫暖…

呢一刻，我完全將Jason既事完全拋諸腦後…

取而代之既，係心目中湧起既柔情蜜意…

或者…其實響不知不覺之中，我已經慢慢咁愛上左呢個響我一唔開心就會出現響我身邊既人…

我地一路無言咁慢慢行…

真係希望呢段路唔會完…

「你既手臂…好大隻好溫暖…」我抬一抬起頭，笑意盈盈咁望一望Camp草：「仲好有安全感。」

其實…

係梁建威你成個人都比到溫暖我。

Camp草對住我微微一笑，道：「今晚，妳想挨幾耐就幾耐。」

「嗯。」梗係啦～今晚本小姐係你女朋友黎架嘛！

我…以為係…至少呢一晚可以咁樣同Camp草一齊甜甜蜜蜜咁過…

直至Camp草既電話響起。

將我同佢都帶返黎現實。

我望一望到個mon，係Jenny打黎，Camp草既現任女朋友。

我心中突然有種乸住乸住既感覺…

即使今晚Camp草話做我一晚男朋友都好、無論我同佢係咪互相都有感覺都好，但其實佢係有女朋友的。

我而家做既野，同Jason班所謂既契妹，到底有乜野分別？

我突然好痛恨自己…我究竟響度做緊啲乜野？

我…比感情蒙蔽左自己…

我驚…再咁樣同Camp草發展落去…會出事…

我唔敢再諗落去…

我抬頭望一望Camp草，咁啱佢又響呢個時候望住我。

我地四目交投。

Camp草有小小尷尬咁望住我，然後問：「我聽個電話先？」

…

我可以點？

我能做得到既，只有扮作大方咁對住Camp草笑住點點頭。

Camp草好快手咁接左個電話。

佢地既通話內容…大概係Camp草對Jenny講左個大話，話而家佢係同緊一大班人去飲野。

不過…佢講野既時候語氣好緊張好唔自然。

傻佬，你咁唔自然既語氣好易穿煲架！

你同Jason真係兩類人…Jason無論講乜野都好，佢都可以講得好自然，完全唔覺得佢講緊大話。

而你呢？或者係你本性太老實啦，講大話都講得唔好…

希望你個Jenny唔好察覺到啲乜野啦…

我…唔想咁自私…好似當年Jason啲契妹咁，影響到你地情侶之間既關係…

我…明白果種痛…有幾痛…

我一路望住Camp草講電話。

「嗯，早抖。」Camp草向Jenny道別再收線。

Camp草鬆一口氣咁既樣。

我扮作大方咁向佢笑一笑，問：「女朋友？」

Camp草有小小尷尬咁R一R個頭，答：「係呀。」

我諗起佢啱啱講大話果陣果個狼狽樣，於是取笑下佢：「 你啲戲好屎呀~講野一舊舊咁！你諗定返去點同佢解話啦～」

Camp草塊面突然間白晒。

應該係比我嚇到面無血色…

唔知點解我覺得好好笑，噗哧一聲笑左出黎：「講笑咋，睇下你嚇到個樣！」

雖然…嚴格黎講我唔係講笑，不過而家都係唔好嚇Camp草啦…至少…我唔想而家破壞大家既心情…

但係！

我都係要忍唔住取笑下Camp草~

「你成日咁樣呃女朋友架？」我古古惑惑咁問佢。

「梗係唔係啦。見妳今晚係我女朋友先破例咋。」Camp草好似好理直氣壯咁對住我講。

我塊面突然間紅晒，個人都熱起上黎…

哼！「口花花！」

不過…

又真係…

幾冧既…

我心下甜絲絲咁好受用…

我忍唔住又挨落Camp草既膊頭上面，享受住呢一刻佢為我帶黎既安全感…

「真心話黎架！」Camp草抗議。

哼！你對你個Jenny都係咁口花花架？

不過一諗到Jenny…Camp草既正印女朋友…

唉…

係時候，要夢醒啦…

Camp草真正既女朋友係Jenny，唔係梁冰冰…

「咁…返去咯？」我提議。

再甜既夢，都有訓醒既一刻。

（待續）