二十八

二十八

一覺訓醒先知，尋日梁建威響大門口舌戰Jason既事，唔知點解好似好多人都知…

好似今朝刷牙既時候響洗手間遇到Jessie，佢一望到我就話：「估唔到妳男朋友咁勁喎~」

「下？」我果陣反應唔切。

「妳同妳條仔呀。尋晚響學校門口大戰妳前男友。」Jessie繼續道：「我諗應該傳到好多人都知~」

「下？」我呆左一呆：「乜我地都有新聞價值咩…？」

我好摺架咋喎…

點解會傳到周圍都知架…

咁Jason將我同佢以前既…床事講晒出黎，咪傳到成間大學都知？

嗚…我點見人…

「妳其實知唔知自己響呢間學校靚女到好出名架？」Jessie冇我咁好氣地道：「有啲人直情話妳係校花添呀！」

「下…有冇咁誇張呀？」我覺得自己算靚，但點到未至於校花下嘛？

「妳真係冇自知之明！」Jessie繼續冇我咁好氣…

唔好糾纏響校唔校花呢個問題上面先…我想知…Jason口中果好賤既說話究竟傳成點…

哎呀…我好好地一個淑女仲點見人呀…

「妳快啲講，妳究竟知啲乜野！」我作狀去捏Jessie條頸。

唉…

希望唔好傳得太過分…

「冇呀…不過估唔到妳個ex咁過份！」Jessie有小小氣憤咁講：「分左手都仲想非禮妳！」

下？

非禮我？

「又估唔到妳條仔受過嚴格既中國武術訓練，同妳個ex大戰左幾個回合再將佢擊退…」Jessie繼續講…

嚴格既中國武術訓練？

衛斯理咩！

「下？妳聽邊個講架？」我一臉愕然咁問Jessie。

「我都係聽Cathy講架咋，佢又係聽其他同學講囉！」Jessie答。

「冇其他拿？」我有小小擔心咁問。

「係咁多喇。」Jessie追問：「係咪當事人仲有咩補充？」

「冇…冇喇。」我梗係唔想補充…

睇黎…

呢啲就係以訛傳訛既威力…

過多幾日之後，可能接受過嚴格既中國武術訓練果個就會變左我~

再過多幾個星期，衛斯理可能會出埋場~

*

既然我既目的已經達成，咁我同Camp草星期五就已經冇走堂去拍拖啦～

相反，我同男朋友仔就拍住拖咁上每一堂~就算佢要上果堂我冇選修到，我一樣走入去sit堂，嘻嘻~

坐響佢隔離一齊靜靜咁上堂，已經好開心好滿足啦～

總之我地由朝早就黏埋一齊~

一齊食早餐同午餐~一齊上堂~

落堂之後，因為嶺大足球隊聽日有場大專盃對住港大既比賽，所以今日有訓練，而身為足球隊成員既男朋友都要去練波。

我身為跟得女友，就梗係跟埋去睇佢地練波啦～

其實都幾悶…響烈日當空既時空睇住成廿幾個男人圍住個波追黎追去…

不過唔緊要~廿幾個人入面我都係望住一個人啫~

果個咪梁建威囉～

好唔容易等到練完波，男朋友仔走埋黎同坐左響觀眾席既我講：「等我一陣，好快！」

「嗯！」

「阿嫂妳好！」係果個叫司徒既男仔。

「妳好！」我向佢笑住回答。

Camp草啲隊友都好熱情咁向我打招呼，除左阿熙…

佢既目光令我感到有啲…唔舒服。

準確啲講，係望到我…有啲內疚。

佢尋日同我講果番說話響我腦海入面揮之不去…

其實…比起過去既我既做法，今次我真係好自私。

今次回到過去咁樣做，係咪真係正確呢？

*

男朋友沖完涼換完衫，走過黎觀眾席同我會合。

「不如去屯市行下囉，好唔好？」佢提議。

「好呀！」我一邊點頭一邊回答。

我自從畢左業之後都冇再入過屯門，趁今次回到過去順便去懷緬下都好喎~

記得當年同梁建威曖昧既時候成日兩個人一齊去屯市行街的~

今次返到黎，都係同佢一齊去，不過身份已經變左真正既情侶喇~

開唔開心？

梗係開心啦！

只係…

只係…

咁樣以第三者既身份去搶佢返黎再同佢拍拖，呢種關係真係我想要既？

…

…

我…唔知…

但我返到黎過去，唔係就為左改變未來既咩？

我而家既然成功咁改變左過去，達成左目的，唔係應該開心先啱架咩？

嗯…

我係開心既！

「快啲出發啦～」我逼自己拖住男朋友隻手，再拉佢向西鐵站既方向行過去。

嗯，今次，一定會開開心心咁返去未來既。

一定要。

（待續）