十八
十八
好快我地就響甜蜜既氣氛之下食完個tea~
好耐冇試過咁開心啦～
Camp草拖住我行左出Canteen門口，之後問我：「咁…妳而家想去邊？」
我諗都冇諗即刻回答：「尖沙咀海傍！」
Camp草聽到之後微微一愕，但隨即意會過來：「嗯…尖沙咀海傍…真係一個好地方…」
係呀…係當年Social Sciences Annual Dinner 果晚完左之後…你陪我散心既地方呀…
「咁~」我好似有啲興奮咁講：「我地出發啦～」
正當我想行既時候，Camp草拉一拉我：「妳諗住咁著就出發？」
我望一望自己個look，hall tee短褲加拖鞋…
Camp草續道：「妳至少換返對鞋先出去…」
我伸一伸脷，橋住Camp草隻手：「咁我地返hall換衫先喇~」
*
我返到hall既時候撞倒Cathy媽媽同埋Jessie。
Jessie見到我同Camp草十指緊扣之後露出一個「妳得左喇」既笑容。
其實…
只係得左兩日…
不過好過冇啦。
而Cathy媽媽一開始望住我地既時候個樣有小小驚訝。
佢知道我同Camp草好close，但我從來冇將自己對Camp草既感情完完全全咁透露比佢聽。
所以…Cathy媽媽會知道我同Jason出現左問題，但應該唔知我同Camp草曖昧緊。
或者佢多多少少會估到啲既…尤其經過尋晚…我唔知佢聽到我地床戰幾多聲音啦…
但佢應該估唔到我地真係會響埋一齊。
同佢寒喧左幾句之後我留意到 Cathy 媽媽既眼神…好似改變左啲…
係一種決定左堅定地去做一樣野既眼神。
我突然間感覺到…我今朝同佢講既野，加埋而家我同Camp十指緊扣既畫面…可能啟發左Cathy媽媽…？
然後…我直覺覺得…唔通未來會有改變？
*
「喂，妳咁就叫換左衫？」Camp草問。
我…其實淨係換返對出街鞋…
身上照舊都係hall tee同短褲…
因為…我想快啲同camp草出去拍拖拖~
再講，響鍾意既人面前可以無拘無束咁做自己，其實都係一種福份~
我知梁建威唔會嫌我著得hea既~
「係呀～換左架啦～我地快啲出發啦～」我拉住Camp草出房~
「哈哈~不過妳著乜野都好，都係咁靚~」Camp草又氹下我…
「衰人！」唔知Camp草對住Jenny果陣係咪都係咁口花花呢？
於是我同Camp草就由嶺大出發去尖沙咀了~我地搭西鐵，由兆康搭向尖東站，沿路有講有笑~
好sweet呢～
如果之後日日都可以係咁，你話幾好呢…
*
下午響尖沙咀海傍度散步同夜晚散步好唔同，又係另一種風味。
我橋住Camp草隻手慢慢咁行…我地一路散步既時候大家都沉默不語…
唔知…
我地諗緊既係咪同一樣野呢？
「Camp草，你諗緊乜野？」我首先開聲問。
「下？」Camp草R一R頭：「我諗起…Annual Dinner果晚同妳講要做妳一晚男朋友果一晚…」
「我都係…」我將頭挨落Camp草既手臂上面…
或者，果一晚對大家黎講，都係人生中記憶最深刻既一晚…響呢個時間點黎講，其實只係早幾日發生既事，但對於而家既我黎講，就好似年代久遠發生既事一樣…
我既記憶回到果一日…
*
果一日…朝早…響房…
「我今次見到妳個Jason拖住另一個女仔…係另一個！」電話入面傳來遙遙氣急敗壞既聲音：「唔係上次果個呀！」
我坐左響hall自己房入面，聽到呢個消息…頹然咁坐低左響自己張床度…
「妳…會唔會睇錯左？」我有氣無力地回答：「可能角度問題睇錯左啫…佢地冇真係拖手呢？」
我諗左一諗，又話：「我上次問過佢…佢話係同個女同學傾present咋…」
講完…其實我自己都唔係幾信…
「阿冰…上次急得滯我影唔到相…不過今次我準備好晒，連相都影埋呀！」遙遙繼續說服我：「阿冰，妳唔好再自己呃自己啦…」
「…」
「佢已經唔係第一次，佢都講左無數次個大話去呃妳，妳仲信佢？」遙遙把聲開始有啲嚴肅：「我轉頭send埋幅相比妳睇，妳自己決定仲信唔信佢！」
「…」
「唉…梁冰冰，妳醒啦好冇？我唔係特登去撞佢，但咁都比我見到佢搵第二個女仔，又拖又攬又行街又去玩，呢啲佢有冇同妳報定案吖？」
「…冇。」我無力地拋低一句…
「如果佢唔係身有屎，佢做乜野唔夠膽講？」遙遙咄咄逼人。
「我地…佢…佢話佢讀書同上莊忙到冇時間搵我咋嘛！」我想幫佢搵藉口。
但其實呢個藉口連我都覺得牽強…
「哦？」遙遙冷笑左一下：「忙到同其他女仔周圍去玩？」
「…」
「總之…我轉頭WhatsApp張相比妳睇下啦。」遙遙繼續話：「我而家要上堂先啦。我落堂之後繼續幫妳去跟蹤佢，等妳有多啲證據睇！」
順帶一提，當年WhatsApp仲未係好受歡迎，響App Store仲係收緊0.99美金。
「嗯…」我依然有氣無力咁回應…
「阿冰，」遙遙語重心長咁同我講：「唔好做裝睡的人呀。」
「知啦。」我勉強一笑。
「拜拜啦咁。」
「嗯，拜。」
收線後我成個人無力咁攤左響張床上面…
（待續）
