六十六
我拎住紥花企左響Jenny屋企門前呆左好耐。
我而家先發覺我掛住衝出街，身上既衫都冇換到，仲係著住件校隊風褸運動褲波鞋…起碼我係咪應該返屋企換套老西先呢？
我隻手不斷來回門鐘，想㩒又唔夠膽㩒…唔知過左幾耐…
啪。
門突然打開左。
咦？
我明明未㩒鐘架。
我望一望門前。
Auntie企左響度望實我，雙手拎住兩袋垃圾。
Auntie應該係諗住去倒垃圾…
呢一刻，我其實好心虛…我唔知Jenny有冇將我地分手既事話比Uncle同Auntie知，更加唔清楚佢有冇將我同阿冰上床件事講出黎。
最壞情況係Auntie而家會拎起兩袋垃圾打我，之後再趕我走 。
我閉起雙眼等死…
「威仔，黎搵阿妮？」
我睜開眼，見Auntie眼中冇敵意，只係不斷咁望住我紥花。
我點點頭。
「你入去坐坐先。」Auntie既語氣我真係聽唔出佢有冇嬲我。
我想入去屋入面，但隻腳好重，好似舉唔起咁。
明明我已經入過去無數咁多次。
「入去先啦，威仔。」Auntie微笑：「你阻住我倒垃圾喇。」
「係既。」我硬住頭皮入屋。
Uncle本身響坐響疏化度睇電視，而家轉頭望住我。
而Jenny就已經企左響度。
可能佢聽到我同Auntie既對話，一早走左出黎。
我望實佢，佢望實我。
我地雙方對視左三秒。
我好緊張。
Jenny望住我手上紥花，個樣開始變到想喊想喊咁。
呢個時候我應該做乜好…？
當住Uncle Auntie面前求婚咁刺激？
大鑊，其實我一鼓作氣衝左上黎其實都冇諗過點做…
不過響我猶豫緊點做既時候…
Jenny已經撲前攬住我，完全冇理過Uncle望住…
「我以為你真係唔要我呀…」Jenny既眼淚已經缺堤咁湧左出黎。
我其實有啲尷尬，唔知Uncle聽完呢句之後會點睇我呢…
腳步聲。
我比Jenny攬到實擰唔到轉頭望，但應該係Auntie掉完垃圾返黎。
「嗲哋，我地落街行陣，唔好阻住啲後生喇。」Auntie好識做咁同Uncle講。
「吓…」
「行啦行啦。」Auntie扯左Uncle落街。
咔嚓。
門關了，Auntie同Uncle 應該都出左街了。
我望一望攬住我既Jenny，喊到好似豬頭咁出唔到聲，不過…今次應該係喜極而泣既眼淚？
「傻妹，你攬到我抖唔到氣喇…」Jenny攬得我好實。
「我…唔比你再走…」Jenny反而攬得我更緊了。
其實我冇乜記憶有向Jenny落過降頭…點解佢會咁鍾意我，連我出軌呢啲天大錯誤都可以原諒既？
真係我前世唔知積左啲乜野陰德，又或者Jenny前世做錯啲衰野，先會對我呢個賤人咁傾心吧…
至於我既心情…仲係有啲緊張，因為要開始準備正式既求婚了…
我深呼吸一下…
輕輕咁推開Jenny，不過Jenny真係攬得好實，我細細力推唔開佢…
「傻妹，你唔放開我點收我紮花呀？」我微笑道。
Jenny雙眼仲掛住淚痕，噗哧一笑：「係喎。」
Jenny接過我紮花之後，我深呼吸左一啖氣，之後好認真咁同Jenny講：「對唔住。我知道我做左件天大既錯事，我唔知你而家冷靜左落黎之後係咪仲係會原諒我。」
Jenny又開始喊住咁搖搖頭。
「即係唔原諒我？」我大驚，仲以為今次道歉可以好順利添…
點知Jenny又搖搖頭。
唉，我諗佢都好亂，等我將啲台詞講埋出黎先：「我做既另一件錯事，就係以為就咁同你分手，等你唔駛同我呢個賤人響埋一齊，就係贖罪，我同細妹傾完之後先知原來我呢個諗法好蠢。對唔住。」
Jenny仲係喊住咁搖搖頭，好似而家佢淨係識做呢個動作咁。
好，最緊張既時刻黎啦。
我由風褸袋入面拎出左啱啱買既求婚戒指，單膝跪響廳既地下，打開個盒：「我知我配你唔起，但你可唔可以比個機會我，等我用一生既時間黎補償返我做錯既野，亦等我可以好好咁用一生既時間照顧你。陳仲妮，你可唔可以嫁比我，做我真正既老婆？」
其實諗返我都幾厚顏無恥，出完軌之後仲咁厚面皮對住（前）女朋友求婚…
Jenny仲喊緊，但今次冇再搖頭，而係雙手掩面咁樣係咁點頭。
我伸手捉起佢左手，將隻戒指帶落佢隻中指上面。
「嗱，你應承左，冇得反口架啦。」我攬實Jenny。
我淨係感覺到Jenny響我心口係咁點頭。
其實我以前唔明點解倪○係咁出去滾，之後分手唔夠一個月再求婚周○敏都會應承嫁比佢。
但係，而家望住懷中既Jenny，我唔多唔少都開始了解…
或者…愛情就係盲目架啦。
而我呢？
我當然鍾意Jenny，但我諗佔更加多既，係想補償返Jenny既心意。
我知咁講好賤格，但其實我內心深處，或者最想係同阿冰響埋一齊。
不過，我真係下定決心架喇，我唔會再做出任何對Jenny唔住既事，唔會再背叛佢，唔會再做任何辜負Jenny既事。
我吻向Jenny既咀唇，而佢都好熱烈咁迎合我。
「我唔會再掉低你架啦，老婆。」我溫柔咁同Jenny講。
「…你…今次…唔準再反口啦…」Jenny攬到我實一實，一路索鼻一路講：「講得出…要做得到…」
「嗯，我唔會再離開你。」我答：「我愛你呀老婆。」
「嗯…老公…我都愛你…」Jenny講完之後再主動錫上黎。
（待續）