五十一
由於翌日已經要比賽，所以今日既操練好輕鬆。
但係練習既時候，我心不在焉…
練防守果陣，個波飛緊過黎既時候，我唔係諗緊點樣做好防守清走個波…
我諗緊既係…
「以後要對你女朋友好啲呀。」
一路練波一路諗…
一路防守一路諗…
結果啲防守錯漏百出…
漏踢撻Q樣樣齊…
…
「阿威，精神呀！」森遜大力拍一拍我：「聽日你要頂隊長個位架！」
以後要對你女朋友好啲呀。
以後要對你女朋友好啲呀。
…
咦？係咪有人同我講緊野？
「喂！你有冇聽我講野架！」森遜再叫我一聲。
「啊，係，係。」原來係森遜叫我。
「第一次響大專盃擔大旗係緊張啲架喇。」森遜好似對我既反應表示理解：「一陣返hall早啲休息啦。」
咦。森遜好似誤會左啲乜野…
我心不在焉唔係因為我聽日會正選出場…
…
…
正選？
係喎，隊長既傷都未好返。
但我冇緊張。
我今日直情唔記得左隊長受傷。
我個人雖然好似精神返，但其實心入面仍然好混亂…
以後要對你女朋友好啲呀。
「以後要對你女朋友好啲呀。」
…
*
阿熙走果陣好似想同我傾幾句，但最後都後因為趕住補習所以走左先。
「今晚再傾。」佢臨走時拋低左句。
我同司徒一齊返hall。
佢一路吱吱喳喳咁講野，但我好似全部左耳入右耳出，完全唔記得佢講過啲乜。
「以後要對你女朋友好啲呀。」
點先為之對女朋友好啲？
我返到hall打左個電話比Jenny，順便邀請佢聽日黎睇我比賽。
對手係港大，比賽地點係港大既足球場。
我諗讀港大既Jenny應該識自己去？因為我聽日同其他隊友一齊響campus搭學校book既隊巴出發，所以唔可以接佢…
「我一定會黎睇我老公比賽！」Jenny「好似」好興奮咁講。
只係好似…
我好似聽得出佢既語氣入面有一絲不安。
其實…
都好似唔係最近先發生，點解我好似呢一刻先如夢初醒咁發覺得到呢？
同阿冰「分手」之後，我好似先察覺得到，我之前對待Jenny既方式…有啲問題？
雖然我唔鍾意同佢傾電話，但我最近直情好似係hea鳩佢交行貨咁，你問我先答，但Jenny完全冇發脾氣，亦冇半句怨言，最多只係哀求我傾多陣…
點解我之前竟然完全察覺唔到既？
因為我成個腦都係阿冰？
「以後要對你女朋友好啲呀。」
我要做返啲野補償先…
要對Jenny好啲，比多啲安全感佢…
「嗯，不過我唔可以黎接你呀。我會同啲隊友食埋飯，再響學校撘隊巴一齊出發。」我回答。
其實呢一刻我好想好想去接佢。
當係補償既一部分。
不過正如啱啱所講，學校真係book左架旅遊巴比我地足球隊，所以我地既集合地點係campus。
「…」
「唔好唔開心啦，我之後夜晚會同你拍拖行街架喇。」我氹返佢。
「…真係同隊友？」Jenny把聲好似變左小小。
「係呀。」奇怪，點解Jenny會咁問？
「嗯，我冇問題呀…我諗我識去…」Jenny好似勉強打起精神咁講。
我本來想追問落去，但我心入面有樣野好驚知道…
好驚…
諗都唔敢諗…
「嗯，咁你聽日要黎架喇！」
「嗯，我老公正選喎！一定會黎睇！你要比心機呀！」Jenny既語氣好似又回復返正常。
之後我地繼續好似平時咁傾電話…
唔係，今次同平時有啲唔同。
我冇諗住cut佢線…
*
夜晚，我自己一個人去左屯門市中心。
我今次去，係想買返一啲小禮物比Jenny，氹下佢開心。
以前中學果陣我間中都有咁做，但升左大學只係好似乜野都冇送過比佢。
除左送左頂帽比佢。
不過Jenny從來唔要求我送啲乜野比佢。
話說回來，我好似係第一次自己出黎屯市。
之前次次都有阿冰陪。
無論係行街、買野、食飯…阿冰都係陪響我左右…
第一次自己行屯市，無可避免回憶起同阿冰響呢度渡過既日子…
一齊行街…一齊食越南野…一齊搵電腦…
回憶開始變得有啲苦澀…
屌，唔好再諗啦，再諗就流眼淚架喇…
況且買野比Jenny，諗起阿冰托咩…
我途經過間越南野，但我冇入去…我驚我一入去回憶更加不可自制咁湧晒出黎…
我自己都唔覺得肚餓，所以只係好求其咁食左個快餐就算數…
之後周圍行…周圍行…
最後用左幾千蚊買左對有牌子既情侶手鈪，希望Jenny會鍾意啦…
買完之後此地都無謂久留，於是我直接返hall了。
*
返到hall，同Jenny傾左陣電話，跟住阿熙就返來了。
「以後要對你女朋友好啲呀。」
我訓左響床上面，郁都懶得郁，淨係望住天花板，腦海中仍然係充斥住呢句說話。
「阿威，你係咪有乜野心事？」阿熙收起晒所有粗口，好正經咁問。
「吓？」我冷不防阿熙有此一問：「吓？冇…呀？做乜野咁問？」
（待續）