五十二
「呢幾日已經開始覺得你好唔妥…尋日仲離譜，問你既野十問九唔應，好似變到野都唔識講咁。」阿熙皺住眉咁問。
我都知我尋日冇乜精神，但原來阿熙都留意到，反而我冇乜印象阿熙有同我講過野…
…
其實我係冇印象尋日有人同我講過野…
就算係Jenny，我都唔記得我同佢講過啲乜…
同唔同阿熙講發生咩事好呢？
唔…雖然我想有個人同我分擔下，比下意見我…況且阿熙唔知點解比到我一種戀愛專家既感覺…
但係我唔想比阿熙知道我同阿冰既事…
我唔想比佢知道我當佢之前比我既勸告係耳邊風…
於是，我下左個響今日睇返係一個錯既決定。
阿熙其實應該可以比到個有用既建議我。
「冇野，尋日我發燒呀。病到short左。」我鳩噏。
「…咁你前晚去左邊？」阿熙個樣唔係幾信。
「…我…返左去屋企果面睇個相熟既醫生。」我繼續鳩噏：「你知，聽日要比賽，睇返個信得過既醫生好啲既。」
「…你唔當我係兄弟所以唔肯講？」阿熙都係一臉狐疑既樣。
「邊係呢？咁我真係冇野吖嘛。」我堅持。
阿熙屌左一聲，之後嘆左口氣：「唔緊要，到你想講既時候我會肯聽。」
「哈哈，我都話我冇事咯！」我強顏歡笑。
由阿熙全程只係唔小心屌左一次之外都冇講過粗口黎睇，我相信佢真係當我好兄弟，想用心幫我。
但，對唔住，我辜負左你之前既一番好意，走左去屌阿冰…
然後搞到而家唔知點再去面對Jenny…
「以後要對你女朋友好啲呀。」
我，又做唔做得到呢？
*
翌日。
旅遊巴緩緩駛到去球場門口，再慢慢停低。
我地一班嶺大足球隊既成員著住嶺大運動校隊風褸，魚貫地由旅遊巴落車再慢慢行入球場去到更衣室。
中途經過看台。
我見到…我見到Jenny已經坐左響看台度。
個look…好似同平時有啲唔同？
離遠都望得出佢化左妝，加埋佢著左條短裙，show晒條腿出黎，上身有件薄褸，但都睇得出佢入面件衫有啲低胸…
係好靚好吸引。
但對比起佢平時一身女文青既讀書人look，佢今日既衣著同平時既對比真係好大…
我都係鍾意返佢著長裙皮鞋多啲…
Jenny似乎見到我望住佢，好開心咁對住我呢邊笑。
睇落…完全冇唔開心。
但係，佢笑得越開心，我就越擔心…
加埋佢今日個look…
「喂，你睇下，果條女望住我笑呀！」麻甩司徒鳩叫出黎。
「睇過，又真係幾撚正喎。」守門員Steven答嗲。
「好撚想走上去扑佢。」另一個隊友阿全附和。
喂屌，Jenny個男朋友大大個棟響度，你班仆街收下口啦…
「喂，收下口啦，果個我女朋友黎架。」我忍唔住講。
「嘩，又港大妹又阿冰，你食得幾多件呀？」司徒好明顯唔信Jenny係我女朋友，仲以為我講笑。
「你唔信？」我問。
司徒搖一搖頭。
唉。
於是我向Jenny揮揮手，Jenny即刻向我揮手回禮。
「咁信啦？唔好再打佢主意喇。」
「嘩，你一腳踏兩船呀！食撚死你呀！」司徒一臉不屑咁道。
我聽到，心中一痛。
我同阿冰已經唔再係果種關係…
而且我都覺得…自己冇臉再去見Jenny…
阿熙呢個時候突然出現拍一拍司徒膊頭，拉走佢：「夠啦，入去換衫啦。」
之後向我打左個眼色。
阿熙係咪估到啲野？
Jenny…
「以後要對你女朋友好啲呀。」
阿冰既說話又再次在腦海中響起。
*
我今日係正選。
頂替左靭帶傷左既隊長阿東。
今日場上隊長一職落左響我今日既中堅拍檔森遜上面。
陳sir講解完戰術之後我地圍埋左一個圈。
「今年我地實力好過上年，今次分組賽對住港大並唔係冇得贏的。」阿東雖然踢唔到，但有同我地一齊黎到球場的：「今次，我地係以3分為目標，ok？」
隊長風範。
「好！」大家和應。
除左我…
「以後要對你女朋友好啲呀。」
「以後要對你女朋友好啲呀。」
我個腦好似得返呢句說話…
大家圍住一個圈，將手掌向中間撘埋一齊。
「3分，ok？」阿東大叫。
「好！」大家怒吼：「嶺南！嶺南！嶺南！」
然後正選球員全部散開。
森遜走過黎拍一拍我膊頭，道：「唔好緊張，忘記尋日練波時緊張既表現吧。」
之後就走左去中圈擲銀決定開波次序同揀半場。
其實…我比第二樣煩到自己一啲都唔緊張…
「以後要對你女朋友好啲呀。」
「以後要對你女朋友好啲呀。」
我情不自禁咁望向看台上面既Jenny…
「以後要對你女朋友好啲呀。」
我做得到嗎？
已經背叛左Jenny既我，有資格對佢好嗎？
…
咇！
…
咦，好似吹響左哨聲既？
乜開左波啦咩？
我發左咁耐吽哣咩？
我即刻抬一抬高個頭，但個波已經響我頭頂飛過。
同時我感覺到港大個前鋒響我身邊閃過…
「喂！追波呀！」森遜從我旁邊稍遠既地方向我前面包緊位…
屌，係我掛住發吽哣連開左波都唔知！
距離人地個前鋒最近既係我，發夢比佢過左既都係我，我再唔做啲野就會比佢單刀，一對一咁對住Steven！
森遜就算速度再快都包唔切的！
屌！
我轉身起步慢左好多，唯一可以做既係跳起雙腳飛剷埋去，要中個波呀！
…
啪！
我中左…
成功中左…
…
…
…
…
對面隻腳…完全唔中波…
港大個前鋒比我踢到撻左響度…
咇！
哨聲響起。
球證拎住張牌向我衝緊埋黎…
紅牌！？
（待續）