十
我自己代阿冰錫完獸父Simon之後企左響度呆左響度。
咦？
我啱啱究竟做左啲乜？
而身邊伴隨既，係大家既笑聲。
除左一個人冇笑。
「你玩野呀！」獸父Simon而家先識反應，企起身對住我咆哮。
我都要收拾心情回應佢。
「嗱，呢下我代阿冰比你錫，咁就打和啦！Super!」我故作輕鬆咁同獸Simon講。
「你…你…梗係唔得啦!咁邊到計數呀？邊可以搵人頂架？」獸父講到塊面有啲紅，屌，係嬲到面紅定發情果隻紅呀?
咁當然隻game就唔準搵人頂既。如果真係可以搵人頂，可能龍哥一早已經搵左獸父Simon頂自己食返自己啲（鼻）屎。
「算啦～唔頂都頂左啦！當罰左阿冰架啦！」阿熙講。佢係企響我呢邊的。好兄弟。
我望一望阿冰，啱啱好佢呢一刻都望緊我，一臉感激之情。
嗯，淨係呢個表情已經值返晒。
「係啦，錫左咪算數囉！」肥仔賢竟然都係企響我呢邊。啱啱叫人食屎果陣你唔係企硬既咩？
可能係毒L唔想見住女神比第二個人錫既天性呱？
之後，估唔到其他人都加埋把口，仲要全部企響我果邊。
組媽同奶爸不在話下，連組女們都幫我呢下我有啲驚奇。
我仲以為獸父響o camp既時候對住班組女獻殷勤，會有組女幫住佢添。
呀，諗諗下，可能佢響獻殷勤果陣抽班組女水？唔，如果係獸父既話的確有可能。
同埋今晚開口埋口都要罰錫錫，係女仔都唔鍾意啦。
最後響眾人圍攻下，獸父Simon無奈咁放棄佢既計劃，死死氣又嬲爆爆咁去廁所，我估佢係去洗口。
鬆一口氣。
「唔該…」阿冰行到去我隔離細細聲講。
我本來想同佢講返客咩氣，但係啱啱谷起道氣同獸父Simon硬撐完之後而家鬆一口氣既時候，我發覺我個肚好似有啲野經由食道好似想湧出黎咁。
屌，我錫完組爸之後突然想嘔（而家諗返起佢個口都真係幾臭）。不過好彩比我用意志力壓制落黎。well，應該話至少頂到去廁所。
我響個馬桶嘔果陣仲隱約見到啱啱入廁所既阿熙指住我黎笑。
*
歡樂既時光過得特別快。
今次re u其實大家都玩得幾開心。尤其是比我半逼半就咁夾左黎既阿熙，我覺得佢玩得好開心。
雖然我就睇唔出佢對Cathy媽媽有冇興趣啦…話晒佢都有女朋友。
「你好廢架，人地阿龍食撚屎都未嘔啦，你嘔。」臨分別前阿熙對住我講。
「屌你啦，我對住個馬桶吐痰咋嘛。」我死都唔認。「再講，阿龍邊係食屎，佢食鼻屎咋嘛!」
「係啦係啦…你話係就係啦。」阿熙笑到好衰咁講。佢停左一停，突然同我講:「估唔到你會幫阿冰頂左去錫Simon…唔通…」
佢古古惑惑咁望住我。
唔通佢睇得出我成日留意住阿冰？或者知道我對阿冰有興趣？
喂等陣，邊個話我對阿冰有興趣！冇呀！
「唔通…」阿熙望住我，又點下點下頭。
「唔通咩呀？」我唔耐煩。
「唔通你真係基佬！？」阿熙突然爆左句出黎。
「你就基佬！」
「似啦似啦…唔怪得仲要夾埋我出黎啦…先旨聲明，我鍾意女人架。」阿熙雙手交叉放響胸前。
「收皮啦！」我對住佢舉中指。
*
返到屋企，沖完涼同Jenny傾左陣電話，又講下今日re u啲野。
當然，我冇同Jenny講我幫阿冰頂左錫左獸父Simon。廢事佢誤會我就唔好啦。
好唔容易傾完電話，都成一點幾。
咦，有個未讀既訊息既？
我望一望，係阿冰send比我既？係11點幾果陣send過黎既，果陣我仲同Jenny傾緊電話。
我即刻click入去睇佢究竟send左啲咩比我。
阿冰send左段文字比我:"威，多謝你今日幫左，等我唔駛比組爸錫:)其實我真係唔想比佢錫。你今日起身幫我擋果陣真係好man呀^^總之，我就好感激你啦*"
噢噢，阿冰專登send個sms多謝我。心中一甜。
"唔駛客氣呀，呢d係我應該做既~仲有呀，錫組爸呢件事核突都嘔呀…man乜呀～"我send返比佢。事實上我果陣真係嘔左出黎…
我send完之後放低左個電話，畢竟阿冰都係差唔多成兩個鐘頭之前send比我，而家都應該訓左，我都唔預佢會睇到個sms。
我攤響床度，都準備訓覺，但一諗返啱啱個sms，會心咁笑左一笑。
叮！
我電話突然響左一下，應該有人sms我。
可能係Jenny臨訓之前send個good might message 比我。
我起身望一望個電話，咦，竟然係阿冰send既？佢又會咁夜都未訓？
"你咁夜都未訓既？唔核突啦，真係幫左我好多^^我真係好唔想比男朋友以外既人錫呀:("
係喎…阿冰係有男朋友的…
嗯…
不過，我夠有女朋友啦！況且我又唔係想媾阿冰，佢有冇男朋友關我乜事！
嗯嗯，就係咁咋嘛！我都係想識多個靚女朋友啫！
我唔想靚女等所以即刻覆返佢。
"你夠未訓啦！真係唔駛多謝喎~要真係多謝既，搵日請我食返餐飯啦～"
借呢個機會半開玩笑咁叫佢請食飯，我真係天才~
叮！
又收到訊息。
"放假梗係唔會咁早訓架喇:P可以煲下劇~好呀，遲d請你食飯當多謝你啦^^"
仲諗住你話係等埋我個回覆先訓添。
咦…等等…佢真係話請我食飯？我其實都係諗住講下咋，冇諗過佢真係會應承…
你知啦，而家啲港女淨係會叫你請食飯既啫…
之後我又覆返佢message，問下佢煲啲乜野劇，又問下佢平時做啲乜野咁。佢又會覆我同我傾下計，又會問返下我啲野咁。
果晚，我地互相send sms傾計傾到成四點幾五點。
由果一日開始，我開始日日都同阿冰互相send短訊傾計，冇一日間斷。
當然，有陣時果日傾得密啲，有陣時又冇咁密；有時係佢主動搵我，有時係調返轉。但係冇變既係，我地每一日都會用短訊傾下閒計，風雨不改。
有陣時，細妹見到我響屋企㩒電話既時候會同我講:「你睇你笑到個死人樣，好心你同Jenny姐姐唔好咁痴纏啦，啱啱先傾完電話，而家又狂send sms，仲要一路send一路笑到隻狗咁。」
「屌，你識條鐵咩。」我冇同細妹講我唔係同Jenny sms。
當然呢件事，我都冇同過Jenny提起過。
（待續）