五十九
我再環顧全場一次，都係唔見阿冰踪影，心下嘆左一口氣。
至於Jenny，我諗起分手果一刻，其實都真係好對佢唔住，而且處理得好差。
明明做錯野既係我，明明佢先係受害果個…仲要比我呢個仆街講分手…
我到呢一刻仲鍾唔鍾意Jenny？
唔駛問啦，一定係鍾意。
相比起阿冰，我對Jenny更加多左一份刻心既歉疚。
我合埋雙眼，再次回憶起當日同Jenny分手既情形…
*
「…梁建威…你係咪點都唔會同返我一齊…？」Jenny哽咽地問。
「唔會。」我扮晒冷漠咁答。
以後要對女朋友好啲？
離開我對你黎講應該係最好既選擇。
Jenny征征咁發左一陣呆，突然將手上面我尋日買比佢既情侶鈪除左出黎，好大力咁掟落我心口，邊大哭邊大叫：「梁建威，我憎死你，我憎死你！」之後轉身即刻向我相反方向跑走左！
我暗嘆左口氣，眼淚唔爭氣咁缺堤而出。
不過，我係罪有應得的。
我坐左響樓下平台既一張長凳上面慢慢整理情緒…
諗起啱啱Jenny邊轉頭而去邊大喊個樣，我好心痛，Jenny根本唔應該受呢啲苦。
阿冰呀…
我聽左你講，將我認為對女朋友好既決定做左出黎…
唔知啱唔啱呢？
Jenny啱啱走果陣既表情，真係好絕望…
絕望…
絕望…
…
…
…
仆街啦，Jenny會唔會做傻事架？
一諗到呢度，我即刻拎起個袋，向住Jenny啱啱離開既方向跑過去。
*
我一路向住Jenny返屋企方跑，一邊不停地打電話比Jenny。
嘟…嘟…
「你已經接駁到9876 5432既留言信箱，請響咇一聲之後留低口訊…」
冇人聽。
再打。
都係冇人聽。
再打再打再打…
Jenny…你千其唔好有事呀…
你出左啲乜野事，我會內疚一世架…
跑呀跑呀跑…
好彩今日一早比人紅牌趕左出場，而家我跑極都唔攰…
要快啲搵到Jenny先得…
最好既就梗係佢其實已經返左屋企啦…
又或者因為佢只係因為嬲我而唔聽電話…
不過我響我確定佢安全之前我唔會停落黎既。
係喎，我打去Jenny屋企問下未來外父外母咪得囉！
…
仲係未來外父外母嗎？
…
我硬住頭皮都要打架喇。
嘟…嘟…
「喂？」係未來外母…係Auntie聽電話。
「喂！Auntie！阿妮返左屋企未？」我有小小氣急敗壞咁問。
「未呀…係咪發生左咩事？」Auntie好似有小小緊張。
呃…點答好呢？
「我啱啱同佢嗌左架，佢粒聲唔出走左去，而家搵佢唔到呀。」我照直咁講左出黎，當然修飾左小小。
「咁駛唔駛我地都落黎幫手搵呀？」Auntie問，語氣中有啲擔心。
有多兩個人幫手搵係好既，但係…我唔想咁快比Uncle同Auntie知我地分左手住。
但呢件事關乎到Jenny既安危，點算好呢？
「唔駛住，應該好快搵到佢，如果10分鐘之後我再搵唔到佢再打比你地啦。」我比多10分鐘自己。
Jenny你唔好有事呀…
「咁…好啦。」Auntie應該有啲唔情願，但最後都選擇左相信我。
或者係覺得年青人既事交返比年青人去處理會好啲？
「冇問題！」我準備收線。
「威仔。」Auntie叫住我。
「係？」
「兩個人相處難免有磨擦，要平心靜氣兩個人好好咁解決件事呀。」Auntie語重心長咁同我講：「我同Uncle都已經當左你係半粒仔架喇。」
我心中一酸，不經意咁又滴左滴眼淚出黎。
冇架喇…返唔到轉頭架喇…
不過我依然好感謝你地既厚愛。
「知道。」我把聲應該有小小哽咽。
*
收左線之後我繼續搵。
好好彩地，我終於響Jenny屋企附近一個公園仔入面最角落既一張長櫈搵返Jenny。
佢坐左響張長櫈上面，伏低左個頭響膝頭上面，應該係喊緊。
暫時鬆一口氣。
但見到此情此景又好心痛。
全部都係我搞出黎。
我行唔行埋去好呢？
我驚我行埋去會火上加油咋…
於是我決定企埋響一邊睇實佢，同時打比Auntie報平安。
「咁阿妮就交比你睇實佢啦。」唔知頭唔知路既Auntie交低左Jenny比我。
唉。
就等我盡埋Jenny男朋友最後一份責任吧。
我靜靜咁離遠睇住Jenny坐響長櫈上面喊…雖然心痛，但至少要確認到Jenny個人係安全的。
*
夜深。
已經成深夜一點半。
但Jenny仲係坐左響度伏低個身完全冇意思離開。
已經踏入左十一月，雖然天氣未明顯轉涼，但係一去到夜晚，冷風呼呼地吹，你都咪話唔凍。
我其實比風吹到有小小頭暈，但比起Jenny受既傷，我既頭暈又算得係乜？
我都好彩仲穿住件嶺大校隊風褸，我見Jenny仲伏緊響度喊緊，得件薄褸，又短裙咁，諗緊好唔好出去比件風褸佢著好。
佢都喊左好耐好耐。
我驚佢凍親。
響我猶豫不決既時候，我聽到有人聲。
我向住聲音既來源望過去，見到有兩條仆街mk仔行緊去Jenny果度。
（待續）