五十五
今日係出左軌之後第一次同Jenny出街,所以我成個人都好唔自然。
而我睇得出Jenny其實都一樣。
佢既反應好似…有啲ove左…
其實佢係咪估到啲野?
本來諗住將中四平安夜既甜蜜回憶倒帶可以令我個心好過啲,能夠憶起返同Jenny一齊甜蜜既感覺,甚至乎戰勝出軌既罪惡感,但結果餐飯既氣氛食到古古怪怪咁…
我係時候要做啲野。
我響我個袋入面拎左一盒禮物出黎,入面裝住既係尋晚我買既情侶手鈪。
一人一隻架。
我將份禮物遞到Jenny面前,說道:「老婆,送比你架。」
Jenny露出一副驚喜既表情,雙手接過份禮物,之後甜絲絲咁望住我:「多謝老公!」語氣透露出真正既開心。
應該係今日第一次真正咁開心。
見到Jenny未拆份禮物都咁開心,我鬆一口氣。
總算開始撥亂反正…
「我仲以為…你會唔記得添…」Jenny講到雙眼好似有小小眼濕濕…
咁誇張?
咦?
但係佢以為我唔記得啲乜野?
然後我見到Jenny由佢個袋入面都拎左份禮物出黎…
咦?
我都有禮物收?
「老公,送比你架,四週年快樂!」Jenny笑住咁將份禮物遞比我。
充滿真誠既笑意。
我腦海突然一片空白。
係喎。
前幾日係我同Jenny拍拖四週年既日子。
扑阿冰果日。
我失左踪半晚果日。
咁重要既日子,我竟然完全忘記左。
係完完全全唔記得左。
我諗果日Jenny應該好hurt…但點解佢又完全唔出聲提我呢?
唔通佢驚我覺得佢煩?點會呀!
我好茫然咁接過份禮物,勉強笑住咁問:「拆得?」
Jenny點點頭:「梗係得啦,傻瓜。」
我地兩個同時一齊拆開雙方既禮物。
Jenny送比我既係一本由佢自己親手整既相簿,入面貼滿我地呢四年入面響唔同地方影既相,而且每一頁入面都有Jenny親筆寫既小小獨白。
響我之前同阿冰曖昧緊既時候,Jenny就係咁好比心機咁整緊呢一本拍拖四週年紀念相簿…
而我呢?
響拍拖四週年正日果晚扑左阿冰四次。
我就快頂唔住自己…
我個表情就快Hold唔住,連poker face式既笑容都就保持唔住…
我想喊…可能係因為Jenny份禮物感動到喊?
唔係,係為自己既所作所為後悔同羞愧到喊…
我抬頭望一望Jenny,佢好似好開心:「嗯,我真係好開心老公冇唔記得我地拍拖四週年~多謝老公四週年安排我地黎呢度食自助餐~又送咁靚既手鈪比我!」之後遞一遞其中一隻手鈪比我:「我地一人一隻架!」
全部都係美麗既誤會…
「以後要對你女朋友好啲呀。」
我以為買多啲禮物比Jenny就叫做對佢好啲。
我以為餐餐帶Jenny食好西就叫做對佢好啲。
…
…
…
其實唔係。
我連拍拖四週年紀念日都走左去扑第二條女。
我冇資格做Jenny男朋友。
我冇資格得到Jenny既愛。
我諗我塊面既面色突然之間變得好難睇,我聽到Jenny戰戰兢兢既聲音問我:「係咪唔鍾意我份禮物…?」
我搖一搖頭:「好鍾意,好靚,我好感動。」
但我唔配擁有。
Jenny有小小擔心咁問:「但係你面色唔係幾好?」
「個肚…好似有小小唔舒服。」我鳩噏。
「咁不如埋單返屋企休息下啦。」未等我答應,Jenny就叫左侍應黎埋單。
呢個時候Jenny都仲係咁擔心我既身體健康狀況…
「不如你繼續食?比左錢唔好浪費。」我道:「我自己返屋企先。」
我自責,響你面前抬唔起頭。
所以我想逃離現場。
「我陪你返去啦。」Jenny柔聲地道:「你唔舒服一個人點返去?」
「嗯…」
*
回家路上。
Jenny橋住我手臂一路行。
大家都冇出聲。
我諗起中四平安夜果晚,我同Jenny行呢條路果陣,大家都係緊張到冇乜點傾計…
「以後要對你女朋友好啲呀。」
…
…
…
真正對Jenny好,我應該對佢坦白。
真正對Jenny好,應該同佢講我係一個人渣。
真正對Jenny好…
真正對Jenny好…
真正對Jenny好…應該要同佢分手。
Jenny值得搵個更好的男朋友。
我係仲鍾意佢,我仲愛佢,但我呢啲人渣配佢唔起。
愛佢仲出去搞三搞四?真係笑話。
我突然停下腳步。
Jenny有小小愕然,但都跟隨我停左落黎。
響正我屋企樓下平台,有花草樹木,有噴水池,有微弱既街燈。
係冇乜人。
好適合處理以下落黎會發生既事。
「其實…我冇唔舒服。」我深呼吸左一啖氣,做左一個決定。
「陳仲妮。」我唔係叫佢老婆。
可能我好耐冇咁叫佢,Jenny個樣好似比人打左一拳咁。
「不如…我地分手啦。」我配你唔起。
我只係一個背住女朋友搞三搞四既人渣。
你值得更好的。
Jenny冇理我擰轉身,拉一拉我隻手:「唔好玩啦,夜啦,你又唔舒服,快啲返屋企休息啦。」
我企定定冇比Jenny扯郁,再同佢講:「對唔住…但我認真架…」我feel到自己把聲開始有啲震:「我做左件好錯好錯既事…你唔會原諒我架…」
Jenny轉身望住我,之後衝過黎攬實我,將個頭埋響我心口:「唔會架…唔會架…你講啦,我點都原諒你架!」
Jenny突然放聲大哭:「你話過唔會唔要我架!」
(待續)