三十六
哈囉喂旅程去到尾聲了…
「係呢？大家仲有冇下場？去唔去銅鑼灣附近食個宵夜？」Alan問大家。
我望一望隻錶，原來已經夜晚十點半，聽朝仲要晨早起身練波，所以下場就應該不了。
我眼尾好似睄到Cathy用既殷切又含蓄既目光望左阿熙一眼。
哼哼，呢啲動作係唔會逃得過本座既法眼既。
不過我都係無謂過份解讀呢啲動作。你估我係讀心淫探咩？
我個樣都唔似林保怡啦！
「我同Amanda仲要返去搞上莊啲野唔去啦，你地玩得開心啲啦。」肥仔賢第一個回答。雖然佢既答覆係拒絕。
乜上莊真係會咁忙咩？
我望一望阿熙，之後答：「我同阿熙聽朝都要練波，我諗我地都係唔去嘞。」
呢個係其中一個理由喇，同埋我都費事去得太夜要Jenny擔心。
阿熙望一望我，再望望Alan，諗左一諗，竟然講：「阿威，我想去同大家食個宵夜，一齊去？」
咦？阿熙身為一個專業既運動員，竟然會響練波之前一日玩到咁夜？
莫非佢想回應Cathy既美色？
不，我覺得佢純粹係因為好少同咁多人一齊玩，所以想一大班朋友一齊hea。
無所謂啦，難得佢咁合羣，所以佢高興就好。
但我就不了。
冇阿熙你咁好波，我唯有養精蓄銳希望練波果陣練好啲，等球技有進步啦。
「唔啦，我想早啲休息。」
「屌，咁我自己去啦。」阿熙回答。
「咁你聽朝唔好唔知醒起身練波呀。」我提一提阿熙。
「屌，你叫醒我咪得囉。」阿熙答。
呃，又幾有道理。
之後我地大家一行八人就出返銅鑼灣，我同肥仔賢仲有Amanda就搭忙命小巴返嶺大，其他人就去食宵夜。
坐響小巴上面，見到斜前排既Amanda個頭挨左落肥仔賢既膊頭上面，睇落好似攰到訓著左咁。而肥仔賢都好似好攰咁合埋雙眼養神。
係忙上莊啲野太攰，定係啱啱玩到好攰？
另外，我仲見到…Amanda既巨乳壓左響肥仔賢既手臂上面…我屌吖，肥仔賢呢個毒L咁好艷福既。
偽毒可恥!
望住依偎住既兩人，除左懷疑緊佢地係咪一齊左之外，我仲諗起Jenny…
仲有阿冰。
一諗起Jenny，就諗起我要向佢報平安。
打比佢先。
嘟…嘟…
電話接通了。
「老公~等左你好耐電話啦～」電話傳來Jenny悅耳既聲音。
「係呀～冇計啦，哈囉喂係玩到咁夜，哈哈。」我答。
「咁我係等左你好耐吖嘛~」Jenny又撒下嬌~
「要我老婆等添~等我錫返老婆先~啜~」屌，響小巴度做我都覺得肉麻…不過要氹Jenny冇計。
好彩我講電話既時候係細細聲，睇落小巴上面冇其他人（包括我斜前方既肥仔賢同Amanda）留意到我講緊啲肉麻野。
「算你啦。」Jenny又比我氹返：「係呢，而家你響邊呀？」
「搭緊忙命小巴返hall呀。」
「你自己一個？」Jenny問。
「仲有兩個組mates囉。」我望一望隻錶，都成11點半：「你訓未呀？」
「想同你傾多陣電話先呀～」Jenny又撒嬌。
不過事實係…我有啲攰。
同埋我唔鍾意響公共交通工具傾電話，因為我覺得好似比人聽到晒我講野既內容。尤其是同Jenny傾電話間中都會講肉麻野，比人聽到好尷尬。
「但係我而家搭緊忙命小巴，搖黎搖去有啲暈。」其實我就冇暈既，但我自己都想休息下，再講，一傾都唔知傾幾耐，一陣傾足成程車就大檸樂。
「吓…」想像得到Jenny又扁咀了：「咁一係你返到hall打比我吖，好唔好？」
有小小哀求既語氣…
但係返到hall都成12點幾，沖埋涼都成1點有多…我聽朝仲要練波架…
「其實而家都夜喇，不如你早啲休息訓覺啦。」我儘量用溫柔既語氣去氹Jenny：「同埋聽朝我又一早起身要練波，返到去都想休息下。」
「但係我等左成晚就係想同你傾陣電話…」Jenny用個可憐、哀求既語氣講。
唉，我開始有啲心軟啦。
不過我真係想休息一陣，所以我都係答：「乖啦老婆，聽日練完波我即刻飛過黎陪你~係飛~飛~飛~」
聽到我用戇鳩既語氣講「飛~飛~飛~」呢句野之後，Jenny噗哧一笑：「嗯，咁…好啦。」
「放心，我返到去都一定會send message比你既。」我堅定地道。
「嗯。」
「咁唔講住啦…我真係開始坐到頭暈，想恰一恰。」我老作既，我係眼訓，但冇頭暈。
「冇事吖嘛？咁你快啲休息下啦。」Jenny語氣中有小小擔心。
我女朋友真係好。
放心，你男朋友我冇事，係眼訓左啲啫。
「知道。咁老婆你都早啲休息。」我說道。
「嗯，早抖老公。」
呀，我仲有句野未講。
「老婆，我愛你。」我溫柔地向Jenny說道。
「傻瓜。」Jenny應該笑返：「我都愛你呀。」
「嗯，拜拜。」我道別。
「老公？」
「係？」
「我真係好愛你…好鍾意你…」Jenny既語氣好似有小小怪怪地咁…
最近同佢講電話間中佢既語氣都會係咁…
可能好似佢之前所講既一樣，擔心我地讀兩間大學好易分手。
我唯有儘量以發自真心既語氣同佢講：「傻妹，唔好亂諗野。我~愛~你~梁建威最愛陳仲妮！」
「嗯！」Jenny又開心返~
之後就真係收線了。
有陣時一句真心既我愛你可以比到另一半安心。
真心？
嗯，起頭有一半係真心既。
我突然又諗起阿冰。
究竟我係咪真係可以令Jenny安心？
都係果句，我有時係覺得Jenny好痴身，但係我仲係愛佢的，只係希望自己都可以多返啲私人時間。
而由住hall開始，我地既相處模式出現左根本既變化，因為地理位置既關係，雙方都再冇好似以前咁有咁多雙方共處既時間。再加上電話分鐘都有限，冇可能好似以前咁響屋企用固網電話瘋狂傾電話。果陣雖然有WhatsApp，但仲未係好普及，我記得大約係我year 2果陣，先至開始個個都有WhatsApp。再講，當年WhatsApp係未有電話功能的。
但係，我其實幾享受呢種相處模式。我好享受適當既私人空間，然後雙方保持適當既聯繫。
過左熱戀期既大家其實都需要搵一個啱大家既相處模式。我覺得而家咁樣好好，而呢兩個月習慣左咁既相處模式之後，我好似越黎越抗拒煲電話粥。
唔係真係感情淡左下嘛？
諗到呢度，再加上阿冰既出現，我開始對Jenny感到內疚。
我一定要好好對Jenny。
我由中四個平安夜開始就認定左要娶佢做老婆。
（待續）