二十九

 

一如所料，響尋日既高強度比賽之後，今日既訓練以輕鬆恢復同埋檢討尋日既表現為主。

 

雖然尋日大敗一場，不過似乎除左完場果一刻之外，大家都冇乜頹廢既心情。

 

我最初都有啲怪，不過後尾我忍唔住向司徒八卦下既時候，得知原來上年我地響大專盃分組賽果陣輸過比理大6比0，所以相比之下，響上年year 3既主力球員走晒，新人又未上位（除左阿熙）既情況下，尋日既戰果其實係顯示我地有進步既。

 

當然同我地唔係追求爭標既成績都有關係，不過我諗比人大炒點都應該唔會開心。

 

之後司徒提醒我，話通常淫龍盃上面強隊都未出盡全力，如果響大專盃再遇上理大，到時好可能會更加難踢。

 

我唯唯諾諾咁同意左。

 

司徒最後同我講：「隊長受左傷，可大可小，隨時你要頂硬上，畢竟成隊之中只有你一個同類型既中堅。」

 

我望一望坐左響場邊冇換衫，齋睇我地練波既隊長阿東，受既傷似乎仲未好返。

 

咁當然啦，比完賽之後只係過左一日。不過阿東尋日同我講野時比我既感覺似乎佢知道自己傷得唔輕。

 

我照樣向阿東慰問左幾句，不過佢似乎對自己既傷情唔係咁樂觀。

 

「之後可能要靠你啦。」阿東搭一搭膊頭咁講。

 

飛雲，機會黎啦！之後我就係長期正選…

 

…

 

呢種想法，我係唔會有既。

 

我唔想係因為有人受傷而攞到正選既席位，我想靠自己既實力上位。

 

不過如果隊長受左傷要我頂上既話，我都會全力以赴既。

 

練完波之後，我同阿熙仲有司徒一齊返hall。一返到去沖個涼換埋衫之後，阿熙又話要出去同人補習。

 

錢就搵唔晒既，駛唔駛咁搏老命呀？但學阿熙話齋，家家有本難唸的經，都係唔好對人地既生活方式指指點點咁多。

 

阿熙夜晚唔響hall，咁我就有另一個難題，就係夜晚唔知搵邊個食飯好。

 

通常大部份hall mates都係星期日響屋企食埋飯先至返，而家成個hall比較熟既得返司徒。雖然我之前都試過星期日練完波夜晚同佢出去食，但而家呢一刻或者係因為驚佢會係咁問我同阿冰啲野，我又懶得再同佢解釋，所以真係唔係幾想同佢出去食。

 

可能真係自己響房食頹麵算。

 

咦，係喎，唔知阿冰返左hall未呢？如果佢返左hall既不如搵佢去撐枱腳。

 

定係佢同其他人一樣都係同屋企人食完先返hall呢？

 

之前既星期日都冇搵過佢，係因為估佢可能會同男朋友過啫。今個星期佢男朋友又放佢飛機，咁不如試下搵佢做飯腳？搵下又冇死既。唔得咪算囉～

 

響度齋諗都冇用，不如真係打一打比佢問下啦。就算真係未返我咪最多留響房食頹麵囉~

 

好，就咁話啦。

 

我拎起電話打比阿冰。

 

嘟…嘟…

 

電話接通了。

 

「喂～Camp草，呢個時間搵我，唔駛陪女朋友咩？」阿冰聽電話之後劈頭第一句。

 

「練完波返左hall吖嘛～」哎呀，阿冰唔記得左我要練波？

 

「咁練完波都可以返去陪女朋友架嘛~你個廿四孝男友~」好彩，佢都唔係唔記得左…

 

阿冰頓了頓，續道：「尋晚有人有異性冇人性喇，掛住陪女朋友到而家都唔覆我messages~」

 

呵呵~阿冰唔通係呷醋？但係…我今朝check過冇notification彈出黎架？

 

「係咩？可能部iPhone short左冇彈個notification出黎啫~」因為Jenny一向唔check我電話既，唔會㩒走我啲messages既，所以我諗應該係呢個原因呱。

 

「哼哼！」

 

「係喎，你返hall未呀？」我都係快啲進入主題啦。

 

「返緊啦～做咩呀？」聽到咁既語氣，我彷彿見到佢古古惑惑果個樣。

 

好想快啲見到阿冰呀…

 

「咁早既，我以為你食埋飯先返黎添~」

 

「咁屋企人出晒去都冇人響屋企，咁我咪早小小返黎睇下有冇人同我食夜晚囉～」原來同是天涯淪落人呀！

 

「我都搵緊飯腳，一唔一齊出去食？」我問。

 

「呵呵，camp草叫到，就同你出去食啦～」阿冰好爽快咁答應。

 

「同camp花食飯係my pleasure~咁你陣間返到黎打比我喇。」

 

「嗯，轉頭見。」

 

「拜拜。」

 

收線之後，我第一時間check下sms對話記錄，發覺阿冰真係send左幾個sms比我。

 

"多謝你今日食tea既時候陪我同埋聽我呻呀^^"

 

"做緊咩？"

 

"我返到屋企食飯喇，你呢？"

 

"哼！掛住陪女朋友唔覆人啦！"

 

…

 

如果Jenny見到會點呢？

 

其實以我角度睇黎，都唔算係一啲乜野瞹眛既messages，就算睇到我覺得都冇乜特別，最多咪普通異性朋友既對話~

 

雖然佢真係click到入去既睇返晒所有聊天記錄可能會呷小小醋？不過啲對話都冇乜特別…

 

最多係話下我點解同第二個女仔傾計啫~

 

不過現實係唔會啦，一來佢唔會check我電話，二來如果佢真係見到仲唔即刻問我咩!

 

應該係我㩒錯制off左notification，又或者iPhone hang左機，甚至乎係我自己唔小心click左但係唔知。

 

下左結論之後，我就響間房度hea下打發下時間等阿冰打比我。

 

*

 

其實…

 

過左好多年之後既今日諗返起，究竟點解果陣我會下個咁既結論既呢？

 

可能係人既心理，偏向將一件事合理化，只往自己希望既方向諗。

 

然後不斷否認自己唔想發生既事情既可能性。

 

呢啲係咪人類心理上既自我保護機制？

 

如果果陣時我有將Jenny都睇到我既訊息呢個可能性考慮埋既話，之後發生既事又會唔會有唔同呢？

 

噢。

 

離題了。

 

*

 

我響房入面等下等下…

 

砰!

 

門突然被人一腳粗暴咁踢開! 司徒個麻甩樣就在眼前!

 

「仆你個街嚇撚死人咩！下次敲門先入黎啦…」我真係嚇親架…

 

順帶一提，我地個hall唔興鎖門。據聞有啲hall直情係打開晒門添。

 

「點呀，阻住你打飛機？」司徒不懷好意咁笑。

 

「打你老母呀！」我對住司徒舉中指：「真係嚇死人架…」

 

「呵呵…估唔到你對我老母都有興趣…」司徒越笑越猥瑣…

 

邊有人攞自己老母黎玩架…

 

（待續）