十三
夜晚，我同阿熙都響房。
「喂，你有冇諗住上莊呀？」我坐響床上面問阿熙。
「你指Cathy媽食飯果陣講果樣野？」阿熙問。
「係呀。」
「唔撚上啦，又辛苦又冇錢收。」阿熙答得毫不猶豫。
「噢，你唔諗住燃燒下青春？」我問阿熙。
「錢都冇，燃你老味咩！」阿熙好現實。
人各有志，似乎阿熙由頭到尾都冇考慮過要上莊。
阿熙唔考慮上莊，咁我呢？
算，問埋阿冰遲啲先至再決定。
轉移下話題先。
「咁你諗住返兼職搵錢？」我問。
「可能搵多幾份補習啦。而家身份係大學生，我諗應該都可以搵到呱。」阿熙諗下諗下咁。
我諗到一幅一個小朋友做補習老師同啲中學生上堂既畫面。
好有違和感。
「咁唔玩下啲課外活動？」我問。
「邊鳩個話我乜撚都唔玩呀？」阿熙反問。
咦？又係你話自己要搵多幾份補習既？我仲誤會你諗全力搵銀添。
「噢，你又好似冇講過…咁你諗住玩乜？」
「去選下足球校隊，踢下波咁囉。」
我上下打量下阿熙。聽講大專盃既對手好多都唔野小，你成個小朋友咁款會唔會撞死你。
「我都諗住去選。」我同阿熙講:「你踢開咩位？」
「前鋒。」
噢，同我唔同。我因為由細開始都幾高大下，所以一路都係踢中堅。
「我踢開中堅。」我再望一望佢，寸下佢:「你咁細粒驚唔驚比人撞撚死呀？」
「邊個撞得死我？」然後佢扮晒好驚奇咁望住我:「唔係你下嘛？」
屌，咁睇小我?如果選拔有分組賽既話我實撞撚死你。
「到時如果選拔有分組賽等我撞撚死你~」我笑住咁同佢講。
「好呀，我拭目以待。」阿熙咪住眼笑笑口咁答。
*
住左hall之後，我同Jenny講少左電話。
咁又唔係唔想講既，不過如果以我同佢放暑假果陣傾電話既密度，唔駛一個星期一定爆晒分鐘。
我year 1果陣又未流行whatsapp，再講，果陣whatsapp都冇電話功能，所以我總算可以暫時唔駛講咁多電話。
不過調返轉，我地多左send短訊。
其實Jenny唔係幾想咁，但畢竟都有現實上面既考慮，所以都要妥協。
不過，我鍾意咁既相處模式。
我以前同佢一齊準備會考高考果陣其實都冇講咁密電話，大家有時會一齊去自修室溫書，返到屋企傾一陣電話就訓覺。
而家一來我住左hall，二來佢又開始開動返讀書模式，咁樣相處幾好。（雖然佢傾親電話都係唔捨得收線)
至於同阿冰，都係keep住每日聯絡，仲開始會傾一陣電話。
*
叮！
阿冰send左個短訊黎:"聽日下晝有冇堂？得唔得閒陪我去睇下notebook^^?"
woo，難得camp花約我出街，有堂都話冇堂啦～
雖然我真係冇堂…
"ok呀" 我覆返佢。
"順便請埋你食飯啦^^ 上次講過，我唔會走數既;P" 阿冰覆返黎。
喔喔，你唔講我都差啲唔記得添。阿冰話過因為我幫佢頂左獸父Simon一吻，所以請我食飯。
估唔到阿冰今次會自投羅網~
上次同Simon呢一吻終於有價值啦！
就係咁，阿冰約左我出街，陪佢去睇下手提電腦，兼找數話要請埋我食飯話。
我地約好左第二日12點響campus門口等。
我早到左15分鐘。同靚女出街早到是常識吧。
不過我自己都唔記得左，阿冰遲到都係常識吧…
最後等左45分鐘，先見到阿冰急步咁行緊過黎…
「唔好意思，等左好耐？」阿冰行到黎問，因為佢急步行過黎既關係，仲有小小喘氣。
「等左陣啦～慣架啦～慣架啦～」我寸下佢…
佢輕輕咁一下拍落我手臂，伸一伸脷:「Sorry囉，冇下次!」
道歉有用要警察黎做乜…
…
呢句野係唔識用響靚女身上既。
「哈，唔緊要，等下靚女是常識吧。」我一路行一路答佢：「同camp花行街喎，等幾耐都抵返啦~」
阿冰又拍一拍我手臂，同我講：「口花花呀你!」
「真心話黎架。」其實我認真架。
於是我地就出發去附近屯門市中心睇下電腦。唔好問點解唔去旺角深水埗，因為其實我都唔係好識電腦既野，阿冰搵我幫手睇其實真係搵錯人。
基本上我同阿冰都係響啲大型連鎖店亂Q咁行，問下啲sales呢樣果樣，但其實最後都係搞搞震冇幫襯。
我懷疑如果得我一條友問，啲sales應該會黑面兼唔理我。但我而家同camp花一齊行街，個個都好似烚熟狗頭咁爭住答阿冰，但就完全當我冇到。
另外，同阿冰一齊行緊既時候，好似有好多人望過黎我地度…正確啲黎講係好多男人望過黎阿冰度。
雖然我覺得Jenny都好靚好可愛，但同阿冰相比其實係真係唔同級數，至少路上狗公佢既數目起碼多過Jenny一倍以上。
真心，阿冰個外表真係女神級。
唔好話我膚淺，有邊個男人唔係睇樣架啫~
雖然咁樣同阿冰行街有小小拍拖feel，但係可惜我唔可以好似拖實Jenny咁拖住佢行街。
不過面對數百狗公既妒忌目光，我又真係有啲優越感。
行下行下都成差唔多兩點半，已經有啲肚餓，但就仲係冇乜收獲。
「行左咁耐不如食啲野啦！」阿冰提議：「都開始有啲肚餓。」
等你呢句好耐啦~由暑假等到而家就係等住同你食飯呀～
（待續）