2025年2月3日
喺英國，農曆新年都只係一個好普通既日子。但係，隨住越黎越多香港人移民黎英國，令到周圍都多咗唔少新年氣氛，就好似曼城「和你宵」咁，係一個香港人主導既年宵市場。想唔想睇下我哋一家人係點過農曆新年？今日呢篇就係同大家分享下架喇！
1. 喺英國住咗三年幾，今年係第四個喺英國過既農曆新年。
2. 咁都好老實講嘞，英國呢度過農曆新年係唔會有啲乜嘢太大既新年氣氛。我知好似話唐人街會有啲乜鬼巡遊，我喺Manchester Evening News睇直播，見到佢哋喺市中心果頭，有一大班中國女人化到個臉白晒，著埋啲唔知係咪漢服，跳住大媽舞喺度巡遊，真心唔太開胃。
3. 呢幾年都冇乜特別過，好似有一年初一正日同個中國人鄰里去咗間中餐廳食晚餐，之後跟佢去咗公園放煙花firework，佢哋應該諗住當燒炮仗咁。
4. 果次啲煙花本身係向住天空射既，點知射射下箱煙花倒瀉咗，結果向住四方八面水平咁亂咁射，嚇到我即刻攬實兩個小朋友，用背脊向住啲煙花，不過阿仔返到屋企話唔知隻手臂有少少痛，好似係比啲煙花射中，好彩冇乜事淨係少少痛，真係嚇都嚇死。
5. 其餘時間都冇乜特別深刻印象，反正都係要平時咁返工返學，最多煎啲糕黎食。
6. 返工就唔會有乜嘢特別事係關於農曆新年架喇，反而係小朋友學校會特登教農曆新年嘢，用英文教佢哋生肖，好似話今年係year of snake咁，仲有教小朋友整春卷。
7. 我唔肯定其他地方有冇，但如果香港特登包春卷都幾新穎。
8. 另外，啲local超市都有應下節賣啲「賀年食品」…可惜既係，佢哋係賣佢哋眼中既「賀年食品」，我試過喺Tesco見過一盒紅當當既即食炒麵…
9. 唔喺香港過新年，都慳返唔少利是錢，不過唔知係咪喺學校學返黎，阿仔今年識問我拎利是😂最後同老婆一人一封10鎊利是打發咗佢😂當然妹妹都會有喇。
10. 今年喺本地幫襯咗一間上咗星X新聞既香港人公司買年糕、蘿蔔糕，咁真心佢應該真係做唔切，我哋果晚收貨都係去到凌晨十二點，佢接唔接得切咁多生意我唔評論喇，但佢就唔係好似新聞講話呃香港人錢既，至少人哋要佢退錢，佢就真係退先，佢都唔係唔想做生意，只係我覺得佢應該係接得太多喇，真係做唔晒…至於味道，老實講真係唔錯既，下年佢仲整既話有機會覆啅。
11. 今年先至第一次去行英國年宵，我哋一家同埋朋友去咗曼城市中心「和你宵」，比起喺香港行花市，又係另一種風味。年宵入面有啲港式食品，本來想買，但太多人排隊，而且唔平，好似一碗牛雜要成12鎊，即係HK$120，我真係食唔起…
11. 今次好好彩喺「和你宵」遇到舞獅表演，小朋友睇得好開心，尤其是妹妹，佢應該係第一次睇。
12. 當然，唔少得去朋友屋企打搞喇，黎緊又會去「拜年」（雖然遲咗成個幾禮拜，哈哈），到時應該會有機會打下麻雀🤣
13. 我喺社交媒體都出過po，不過禮多人不怪，我喺度祝大家新一年事事順利、身體健康，恭喜恭喜！
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#英國生活日常 #專欄 #英國生活 #移英生活
#英國洗牙 #曼徹斯特 #和你宵 #Manchester
#移民英國 #農曆新年 #英國過新年
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938