2025年1月25日
過咗嚟英國三年多啲，唔係未見過落雪，不過今次落呢場雪，算係嚟咗英國之後最勁既一場雪，都體驗咗好多以前未試過既經歷，包括揸車跣軚…
1. 嚟咗英國都有三年，兩個禮拜之前果次落雪，應該係三年入面落得最金果次。
2. 頭兩年都有落過下雪，不過英國曼徹斯特同美國加拿大某啲地方唔同，零下5度已經係極限，而且可能係講緊得一、兩日係會落到成地積雪，即係地上面鋪咗一層雪，可以堆下雪人咁。
3. 嚟到第三年，終於嚟鋪勁既，有成個幾禮拜都係零下唔知幾多度，當然又唔係真係話好凍，可能去到盡都係講緊零下七、八度，但係就持續咗個幾星期，果陣甚至搞到英超比賽都有可能要延期(當然最後就照開既)。
4. 喺呢個幾禮拜入面，得閒就落下雪，小朋友非常開心，除咗可以成日去公園玩雪之外，啲local既小朋友真係有雪橇，會拎去公園啲山坡仔，大家一齊玩。我住果度啲鄰里關係都算幾和睦，一齊玩既時候見到啲唔同族種膚色既小朋友打成一片，其實都幾開心。不過第一日落雪我個仔玩得耐得滯，水鞋入晒水，懷疑有少少凍傷 咗，佢係咁話好痛，仲要痛到喊，不過好彩，佢匿埋咗響被竇度暖咗一個鐘左右，就跳跳紥咁拎住個波黎踢，所以我都唔知佢呢啲叫唔叫凍傷。
5. 唔止去公園玩，小朋友行返學既時候，仲會執起啲雪係咁掟，我個仔就係咁掟我。有時我帶佢哋返學或者出街既時候，我拖住妹妹行喺前面，個衰仔就喺咁整個雪球黎掟我，真係冇大冇細…(講笑咋，我其實比佢掟得幾開心，哈哈)
6. 不過認真既話，其實持續咗咁凍成個星期，對生活上面有啲真係唔係幾方便。
7. 首先就係揸車，呢度比起香港當然係凍好多喇，但係實際上又唔算係啲乜嘢好嚴寒既天氣，所以連埋本地人在內，我都冇見過有人係換雪軚(頭盔︰我冇見過啫，可能真係有既)。
8. 但係問題黎喇，大路或者公路，政府會搵人灑鹽，基本上係唔會積雪或者結冰，但係私人停車場同埋小路就唔同，基本上一定係積晒雪。其實就咁積雪，揸車既時候都唔算太跣，呢樣嘢我黎咗兩年都係有經驗，只有揸慢少少都OK，未試過溜前溜後。
9. 不過今年呢個幾兩個禮拜，啲雪溶唔到之餘，仲要結埋冰，我大鄉里出城咁，呢啲情況第一次見，而我都真係第一次體驗到乜嘢係揸住部車滑冰，唔止一次試過因為路面結咗冰而空轉，而且堂軚輕到不得了，揸車真係需要極度小心，就算轉彎時已經好慢，佢有時都係會跣住咁去，第一次出現既時候我嚇咗一嚇，之後如非必要都唔喺呢段時間揸車，好彩返工果度可以work from home，而且要返公司搭Metro都到，如果唔係真係幾麻煩。
10. 路面結冰呢樣嘢，其實連行路都會有問題，大人行都已經要小心，更何況係小朋友，佢哋最鍾意就係跑，跌落地都唔係問題，最多痛幾痛，最驚係佢哋跣落地之後跣埋出馬路，唔係誇張，見過有小朋友真係跌完落地之後好似溜冰咁跣咗出去一段短距離 先停，好彩都仲係行人路度，如果跣咗出馬路，都真係幾牙煙。
11. 仲有一啲情況就好彩唔係親身經歷，好似屋外水管結冰、爆喉、廚房去水管比凍到凝固咗既油塞住等等。
12. 不過打咗咁大篇嘢，好似煞有介事咁，其實只要小心啲(尤其是揸車)，我諗都應該OK既，至少我同我識既朋友入面大家都冇穿冇爛。講凍，其實著晒大褸，室內又開暖氣，並唔係真係咁難頂，最麻煩其實係道路結冰，我睇新聞，呢度係有啲路面結冰警告，提醒市民出去時要小心唔好跌親。
13. 落雪對啲小朋友黎講就真係最開心，見到佢哋玩得開心，其實我都開心既。
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#英國生活日常 #專欄 #英國生活 #移英生活
#英國洗牙 #曼徹斯特 #落雪 #snowing #Manchester
#移民英國 #下雪 #結冰 #路面結冰
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938