2025年4月12日
上次講過，我一年前左右喺NHS補過牙，當時個感覺唔錯，亦都冇再出現喺香港時係咁甩填充物既情況出現，就好似個牙窿真係被填平咁。不過，補完牙之後，隻牙就一直keep住敏感，覆診時牙醫話正常，會慢慢散，9個月之後例行檢查佢都仲係講呢一句。點知，就喺一年之後既某一日，我隻牙突然就痛到仆街，搵咗私家睇，先發覺已經infected咗，最後緊急做咗杜牙根手術先至搞得掂…
1. 其實都冇諗過會寫呢個續集既，因為上次我喺NHS補完牙之後，整體上個感覺都唔錯，佢唔知係用咗啲乜嘢方法填塞咗啲嘢落牙度，比起之前喺香港補過兩次會好易就甩出黎，個填充物感覺好鬆好易甩咁，而呢度今次個補法就好實淨，補咗成年一啲都冇感覺要甩，啲填充物好似同啲牙融為一體咁。
2. 不過補完之後有個小問題，就係隻牙喺食凍嘢飲凍水既時候會好敏感，我本身唔太當一回事，因為影響真係唔大，有幾何真係食凍嘢，飲凍飲都可以就一就個位都可以唔經啲牙。
3. 當然我唔係諗住唔理佢，但係我上網睇過話補牙之後會有啲敏感，係正常現象，多數人會持續一個月左右，而我覆診既時候都問過NHS牙醫，最後得出黎既結果係屬正常現象。
4. 你講，咁我就信，冇特別理到佢。
5. 不過牙齒敏感果度，真係一直都冇退到，唔經唔覺過咗大半年（年度牙科檢查係隔一年，但補牙我係另外搵時間約，所以而家只係距離補牙大半年），我去咗例行檢查，向NHS牙醫表示隻牙補咗大半年喇喎，仲係一飲凍嘢就好敏感喎，係咪正常架？佢有幫我做好簡短既檢查，然後真係答我︰正常架！
6. 再，你講，咁我就信，冇特別理到佢。
7. 時間又過多幾個 月，喺完全冇任何預兆之下，突然有一晚我瞓瞓下既時候隻牙突然痛醒咗我，唔止痛咁簡單，係好撚痛！痛到真係完全瞓唔到！最慘係瞓醒之後果日係星期日，睇下果間NHS牙醫診所冇開，我如果要搵牙醫，只可以搵啲有做急症既私人診所。
8. 由於真係痛到仆街，真係一刻都忍唔到，所以都係決定星期日拿拿淋book一間揸車只係十五分鐘車程既私人牙科診所去睇。雖然成晚冇瞓，但係果日開車我一啲都唔驚會恰著，因為隻牙真係痛撚到仆街，點都唔會瞓得著。話就話拿拿淋book，不過我都真係有睇過啲Google Reviews，見佢幾百個評價，90%以上都係好好，咁我先決定去馬。
9. 不過第二朝約都唔係即刻有得睇，都要等到成晏晝三點幾先有得睇。
10. 間鋪頭由牙醫到姑娘都係啲印巴藉人士黎，不過啲態度好好，坐咗十五分鐘左右可以入去見牙醫，講咗啲症狀，做咗啲檢查照埋X光，佢話我隻牙上次補既時候啲填充物塞得太入，掂到啲神經，所以呢隻牙一年以黎都keep住敏感，呢個就係原因，而點解我而家隻牙會keep住痛，就係因為入面啲唔知乜嘢infected咗，所以會咁痛，而事而至此，佢比咗兩個方案我，一個係 成隻牙剝咗佢，一係就杜牙根。
11. 杜牙根好貴，不過醫生建議唔好剝，畢竟牙既嘢剝一隻少一隻，佢亦都好均真咁開咗個offer比我，話個手術點都要分兩日做，今日做第一part，收我100鎊，第二part可以留返比NHS搞。
12. 咁杜牙根其實NHS係包埋既，我後尾check過佢係包含喺band 2 treatment度，只係需要75鎊幾。我問佢整幾多錢，佢就話今日100鎊再另加450鎊，我諗諗下喺香港杜牙根都過萬蚊，呢個價錢算係好抵下，所以考慮咗都唔駛10秒就扑鎚。
13. 個牙醫都問多次︰「Are you sure？」我話係，因為諗返起上次喺NHS補牙補到我而家咁，我都係信呢間診所算。
14. 第一part手術我唔知應該要做到點先成功，做完、麻醉藥過咗之後，其實我都仲係痛，不過就果種痛就已經舒緩咗好多，同埋係間歇性咁發作。
15. 個牙醫同我去reception度book第二次手術，係兩個星期之後，咁我都冇乜問題就走咗。頭幾日都唔錯，不過大約係第四日夜晚又開始黎料，因為間診所號稱係24小時應診，我大約8點半左右叮咗個WhatsApp問佢有冇得睇急診，佢話有，約我當晚11點半做埋第二次手術，不過要比多150鎊…咁冇計喇，我真係痛到仆街，都要硬食架喇，仲要求神拜佛今次真係有效…
16. 十一點半準時到，成間診所啲返一個牙醫喺度等緊我…我以為去到即做喇，佢話做果個係另一個牙醫，同埋仲有個助手返緊黎，叫我等一陣。不過都唔係等咗好耐，佢兩個同事就返到。呢個開門比我既牙醫似乎係見習又或者係資歷淺少少既牙醫，而後尾入黎果個幫我做手術既似乎係senior啲既。連埋助手三個都係印巴人士，啲英文幾易聽。
17. 手術既過程唔詳講喇，不過今次杜牙根暫時真係好有效，係當晚返到屋企個傷口隱隱作痛，但已經唔係神經刺痛果種痛，而直至而家真係已經完全唔痛，連敏感都冇埋。
18. 我諗全部嘢手術費加埋診金，大約8XX鎊，即係大約八千幾港紙。當然，如果我真係等NHS都唔係唔得，但我google過，有人講起碼一個月先有得睇，而且手勢我唔敢講好唔好…因為我第一次補牙，就係喺NHS做，結果做到隻牙Infected…
19. 最後我又係google返黎，係我牙刺痛但未睇牙醫之前，google相關症狀搵返黎既，原po係台灣po，佢症狀同我一樣，都係敏感咗成年，佢話個牙醫同佢講，果一年之中點解會敏感，其實就係隻牙入面發緊炎，到佢惡化到咁上下，就會劇烈刺痛，而呢種發炎，係唔會自己好，只會越黎越差架啫，所以都勸下大家，無論你係咪喺英國住，牙痛，記得即刻去睇醫生…
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
#英國生活日常 #專欄 #英國生活 #移英生活 #杜牙根 #補牙
#英國洗牙 #曼徹斯特 #洗牙 #英國洗牙 #Manchester
#移民英國 #NHS #NHSdental
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以 上 https://www.penana.com/membership_plan?id=52938 或者 https://m.penana.com/stream?id=52938