#親子日常 合集

尋晚去完小童軍，接阿仔既時候佢同幾個朋友仔喺條街度喪奔狂跑跟住跌親，兩邊膝頭都損晒，痛到喊。

我︰Daddy抱你好唔好？
仔︰(搖頭)
我︰Daddy孭你好唔好？
仔︰(搖頭)

咁我拖住佢行返屋企，佢一路行都一路喊。去到一個路口，佢朋友仔同佢哋爸爸行另一面，我哋就行另一面，講完再見分別之後，我諗住拖住阿仔繼續行，點知佢扯住我。

我︰？
仔︰我要Daddy抱。

原來係唔想喺朋友仔面前示弱…咁我就抱到佢返屋企。

今日係星期一，我叫阿女嘅花名。

為父︰(花名)。
阿女︰NO！你唔可以叫！
為父︰點解啊？
阿女︰因為淨係星期六你先可以叫！

…佢又真係記得架喎。🤣

欲知前事請參看2月11號嘅post😂

尋晚阿女唔知係咪食得太飽，三更半夜起身嘔，今朝又少少肚屙，有微燒，希望冇乜嘢🥲

我個女既同學幫佢改咗個花名，佢又幫人哋改咗個花名，我見佢哋互相叫得咁開心，返到屋企之後，我問阿女我可唔可以叫佢個花名。

阿女︰淨係星期六可以。
為父︰一星期淨係得一日可以叫咋？
阿女︰或者你死咗果日都可以叫。
為父︰…

真係童言無忌…

今日喺阿仔口中學識英文版本既「點指兵兵，點指兵兵，點著誰人做大兵」，就係"Black shoe, black shoe, if you have a black shoe you are out"

應該冇聽錯😂 又學到嘢

最近阿仔聽到佢個香港同學叫佢爸爸做「爸B」，然後...

冇錯，我而家就變咗爸B了。

阿仔學校而家開始每個星期默一次書，都係啲英文單字黎，既然有一個星期時間準備，我身為虎爸當然每日都同佢默一次。

為父：（某英文詞）
兒：哈哈哈哈哈！
為父：你笑乜？
兒：Daddy你讀錯晒喇（指口音），都唔係咁讀，哈哈哈
為父： ...

從此之後，我全部默書都係用手機字典黎發音...

天氣一上返6、7度，哥哥就連褸都唔著，仲喺學校除晒啲打底衫褲，短衫短褲咁放學，仲一路行一路話好熱。

…

阿仔，你已經超越咗英國人，你係咪愛斯基摩人黎？

唔知係咪喺學校學，而家個仔成日同我講：「Thank you, bro.」😂😂😂

Manchester其實唔係成日都落雪，更加唔好話落大雪，所以同小朋友出去玩下係開心既，不過阿仔返到黎好似凍傷咗少少腳，而家搽咗凡士林同埋喺被竇度暖咗成粒鐘，又變返跳跳紮狀態喇👍

當我喺度做緊掌上壓既時候，阿女衝上黎坐喺我背脊上面：「Horse！Horse！You are my horse！」

朝早帶小朋友去踢波，自己喺場邊都搞到對鞋成腳都係泥😂

諗起細個果陣，爸爸或者媽媽請假帶我去做健康檢查或者學童牙科保健之後帶我去麥當勞食lunch我會好開心。尋日到我做老豆既角色，帶阿女去檢查眼睛，檢查完之後帶佢去wetherspoon食lunch，佢一聽到既時候開心到跳起（真係有跳），然後去到餐廳係咁開心笑笑笑，唔知點解好有一種懷念既感覺…

同小情人驗完眼之後去天氣匙羹食午餐

今晚好節目🤣

我同阿仔行緊返屋企，有舊狗屎響路邊。

為父指住：「小心唔好踩到。」
兒（認真語氣）：「爸爸千其唔好食啊！」
為父：「食咩？」
兒指住：「屎囉。」
為父：「...」

幫妹妹換衫時，除咗佢件衫之後佢個頭勁大幅度係咁前後點頭。

為父：妳做咩？
女：我啲hair touch到我隻back。

又中又英...好搞笑😂

同小朋友去睇玩具，呢件嘢完美演繹乜嘢叫做送都唔要😂

我踢咗咁耐波都未試過...究竟我個仔係點樣做到咁😂😂😂

平時有教小朋友唔好響metro link飲飲食食，今日同仔女一齊搭電車，途中遇到妹妹另一同學同佢嫲嫲…

同嫲(拎咗粒糖比同學仔食)︰食粒糖吖。
仔(好大聲)︰Food and drinks are not allowed on tram or on the platform！

勁老尷…

妹妹仲細，去完廁所要人幫手清潔。

我烏低身幫佢抹，突然眼前一黑，然後伴隨阿女既魔性笑聲：「哈哈哈哈哈哈哈哈哈！」

我回過神來既時候已經比阿女用佢條裙笠住咗我個頭...

阿女坐咗響我隔離。

為父：我可唔可以錫妳一啖？
女：可以。
為父：但我而家唔想錫，可唔可以唔錫？
女：唔得，一定要錫。

🤣🤣🤣😊

兩兄妹而家鬧交最常見到既情形︰

兄︰Shut up！
妹︰(冷靜) I don't care.

期待見到更加多英式小朋友鬧交字眼。

教哥哥做功課，見到佢同一樣嘢教極都錯，最後忍唔住大聲話咗佢幾句，而家真係有啲後悔。

其實佢仲係好細個，唔識係正常，唔應該鬧，應該再耐心教多幾次。

立此post自我反省。

哥哥見到有桃食...

哥哥：我要食pat pat！
內人：...

朋友既小朋友叫朋友做「爸B」，我既小朋友叫我做「爸屎pat」...

呢兩條友越黎越無大無細...

為咗兩個小朋友食飯專心啲，我同內人訂咗套規矩：小朋友食飯時一落地就收晒佢哋碗飯唔比佢哋食（當然只靠嚇，冇真係咁做過），結果...

我企起身去電飯煲添飯...

兒：爸爸落咗地，唔可以再食飯！
為父：...

右手拎住袋重嘢，左手拖住阿女，行咗一段路。

女：「...」
為父見阿女悶悶不樂咁嘟長個嘴，問：「做咩事啊？」
女：「我想爸爸抱...」

噢...🥲

鄰居送咗個月餅比我（味道...嗯，唔係香港嘅味道）

女：爸爸，我幫你手吖？
為父：幫咩手？
女：幫你食埋個月餅囉！
為父：...
女：嘻嘻嘻。

雖然遲咗一日，但祝大家中秋節快樂！

哥哥響街度見到人哋帶住隻狗散步。

哥哥︰我想養狗養貓。
為父︰養狗好辛苦，同埋要好有心機去照顧佢哋架喎，Daddy Mummy都要返工做嘢，又要睇住你哋，好難再分心去照顧寵物。
哥哥︰唔驚，我做晒啲嘢咪得囉！
為父︰你得唔得啊？唔好得個講字喎！
哥哥︰梗係得喇，不過到時狗仔貓仔屙咗Poo Poo同Wee Wee你要幫手執晒同清潔晒佢哋，其他嘢就我做喇！
為父︰…

明明係星期日朝早，為咗帶兩個小朋友去學游水，都要咁早起身...🥲

今朝幫兩兄妹刷牙，就響我幫哥哥補刷既時候，妹妹係咁響我後面用佢個頭頂我大脾附近個位。

我擰轉頭望住阿女。

女拎住枝牙刷，滿口牙膏泡咁笑住同我講︰「爸爸，我頂你啊！」

為父︰「...」

內人：「快啲食埋啲飯，如果唔係冇得睇電視！」
女兒：「唔得，一定要睇電視！」
內人：「唔係一定日日都有得睇電視架！」
女兒：「唔係，我知道一定有得睇！」
內人：「總之未食完就冇！」
女兒：「一定有，因為係爸爸話既！」
我：「...」

阿仔屙屎屙咗好耐，嗌入廁所問佢做乜屙咁耐...

仔：「因為我飲得唔夠多水，同食得唔夠菜囉！」

話說阿女去廁所都仲要大人幫。

佢去完廁所我幫佢清潔。

女：「爸爸。」
為父：「唔？」

女作狀用手響屁股仔後面拎啲嘢出黎，然後...

「屙屎落你頭到！」
為父：「...」
女（魔性笑聲）：「哈哈哈哈哈哈哈哈哈！」

阿女坐咗響大廳梳化，我響度隔離房打緊文。

女︰「爸爸。」

我走過去廳望住阿女。

女︰「爸爸，我好鍾意你。」

嘩…真係心都甜晒

有冇人睇到重點？🤣

阿女好孝順，留返啲士多啤梨比Daady Mummy食...

去伯明翰參觀咗好多人推薦既朱古力廠，但真心覺得麻麻地，入面有兩個值得玩既設施，分別係4D電影同埋室內坐個ride射槍（兩個加埋應該都冇十分鐘），但係都偏短。除此之外，入面仲有小朋友遊樂設施同埋比小朋友鳩唧鳩刮朱古力，仲有朱古力試食同埋啲小展覽。就咁聽係咪好似唔錯呢？咁點解我話麻麻地？屌你，兩大兩細成成1000蚊港紙啊🤣🤣🤣不過兩個小朋友開心，我都ok喇🥲

而家阿女間中仲會夜媽媽走過黎主人房要同Daddy Mummy一齊瞓

早兩日朝早我起身見到阿女瞓咗響我旁邊，忍唔住錫咗佢面豬登一啖

然後，我發覺老婆望住我。

為夫︰「？」
內人︰「又唔見你瞓醒會咁錫我？」

橙了…

帶小朋友去Trafford Centre玩水，個池其實好淺，啲水只係到小腿三份一左右。

哥哥一枝箭標走咗，我就拖住女行入水池。

女︰爸爸，拖實我。
為父︰好。

五分鐘之後，阿女熟咗個環境，玩得好開心，我跟住響佢後面。

女︰爸爸。
為父︰唔？
女指一指池邊出口︰爸爸你去果度。

橙。

次次星期六、日或者放假，起身既時候總係覺得身體變咗座山咁，因為次次都係比兩個爬山人士整醒，呢兩條友響我身上面係咁爬....

兩個小朋友拎住枝玩具魔術棒走到我同老婆面前…

妹︰Turn you to a baby！

我同內人即刻扮BB喊，哥哥接過枝魔術棒…

兄︰Turn you to a poo poo！

…

仲未夠︰
兄︰Turn you to a wee wee！

之後兩兄妹喪笑…

我個仔著住件曼聯波衫行街，經過一個賣花攤檔既時候，個老細走出黎，送咗枝菊花比佢，話：「你著住曼聯波衫，曼聯係一間偉大既球會（great club），所以我送枝花比你！」

我突然諗起我大仔啱啱出世既時候成日扭計，奶又唔肯飲、片又冇濕、抱又喊唔抱又喊，一喊就成粒鐘起跳，跟住有時真係頂唔順、比佢嘈到心都煩埋，會開口大大聲鬧佢，而家諗返都好戇鳩，佢咁細個，識鬼聽咩。不過果段日子都真心幾難捱，而家回望返，都唔知自己係點過既，但係果個畢竟係我個仔，回憶返果陣都係苦中帶甜。

好彩細女唔係咁，佢出世就已經成日露出甜美既笑容，而我個仔細個既時候，真係唧都唔笑…

難得星期日想瞓晏少少，結果小朋友七點幾就拎住支細結他係咁彈...

同阿女出門口，問佢想著邊對鞋。
女︰「Daddy揀。」
我︰「呢對好唔好？」
女︰「唔好。」
我︰「咁呢對呢？」
女︰「唔好。」
我︰「咁呢對嘞。」
女︰「唔好。」
我︰「咁妳想要邊對啊？」
女指住對粉紅色鞋︰「呢對！」
大姐，妳睇中邊對一早出聲吖，唔好要老豆估估下…
不愧係香港出世，細細就識做港女...

公公婆婆黎探我哋，佢哋鍾意睇倚天屠龍記，我個仔又跟住睇，最後而家佢晚晚刷牙都要整到成個下巴都係牙膏泡，話自己係太師父...（太師父即係張三豐）

尋晚同小朋友睇波，佢見到英格蘭入波開心到彈起同怪叫！唔止踢波，呢度啲小朋友真係好細個就會傾波，尤其是而家英格蘭入到決賽，佢哋既討論氣氛就更加熾熱！對我黎講，就梗係一件好事，至少同小朋友又多返啲話題吖嘛！

啱啱食早餐，阿女將自己份芝士火腿蛋三文治食到得返啲皮，然後好自然咁伸手拎我既三文治食，我問佢做咩，佢話：「食餡。」而家我望住佢隻碟上面啲方包皮，諗緊我係咪應該要當早餐食。

阿女唔知係咪食錯嘢，一朝起身嘔咗兩次，好彩公公婆婆響度幫手換衫沖涼換床單，之後阿女又瞓多陣，起身之後都算精神，希望之後冇乜嘢。

小朋友響童軍度拎咗個哨子返屋企，然後就由朝吹到晚...

阿仔真係將蜘蛛養響呢個外賣盒入面...

阿女一覺瞓醒見到我就嘟長個咀要我錫，好喇，我順下妳意準備錫落去既時候，佢用光速隊咗隻天殘腳上黎，搞到我錫咗佢腳板底，然後笑到格格聲...

衰仔有時做啲嘢又幾冧

見到阿仔撩鼻屎周圍彈，我就諗起自己響佢個年紀果陣都係彈，仲要直接命中我阿妹...

今朝幫女女梳洗完，隨手拎起條橡筋想幫佢紮辮...

「No！！！！！！」

同小朋友一齊畫（其實主要係我畫，小朋友上色😂），啲小朋友黎到英國都係鍾意Peppa Pig🐽

屋企兩隻馬騮成日拎我既拖鞋黎玩，搞到成日東一隻西一隻...

話說，星期六係一星期之中最忙既日子，因為兩個小朋友都要學嘢。

朝早，我帶仔去足球班，然後半個鐘之後，老婆就帶女去學體操，因為下晝阿仔又要學其他嘢，老婆又返唔切黎，所以阿仔既午餐，係由我負責的。

作為一個廚藝精湛既父親，我最引以自豪既菜式就係…………營多撈麵。(Costco有得賣，一箱40包)

最初阿仔知道有撈麵食非常之開心，原本都會焗下啲pizza、薯條、burger，但見佢咁鍾意食，我就專注一味，淨係煮營多(絕對唔係因為我懶)。

結果，佢由原本見到撈麵超興奮，到而家一見到啲撈麵就耍手擰頭作嘔咁款，只係花咗唔夠個半月既時間…

我幫阿女紮辮。

我︰「搞掂！靚唔靚？」

阿女摸一摸條馬尾，點頭。

妻經過，望咗一望︰「做咩將阿女搞到成個乞衣妹咁啊？」

從此，阿女唔再比我幫佢紮辮。

本來係買比小朋友去公園玩，而家變咗用黎響屋企捉烏蠅🤣

「做咩唔食晒啲包啊？」
「留返比Daddy食。」

今朝瞓瞓下覺，細果個好理所當然咁走上黎我張床，然後又好理所當然咁坐咗響我心口上面，我擘大眼問佢︰「你響度做乜嘢？」

佢依然係好理所當然咁答︰「坐。」

話說我有時會響屋企自言自語講埋啲無聊嘢，今日我就無端端爆咗句︰「無法無天無衫著！」

然後我個小朋友即刻跟住講︰「爸爸無法無天無衫著！」

啱啱幫小朋友打開個餅乾包裝袋，然後問︰「請半塊比Daddy食得唔得啊？」

「唔得。」

同小朋友一齊去Amazon啲locker拎禮物比老婆(英國今個星期日母親節)，一路同佢哋講千其唔好同媽咪講，比個驚喜媽咪，結果佢一入門口就大叫︰「媽咪，我哋買咗嘢送比妳啊！」

...

呢條友真係守唔到秘密…

發覺英國既小朋友同香港既一樣，去到某個年齡就鍾意講屎屎尿尿屎忽呢啲…