五十七
我落左巴士,收拾心情,緩緩咁行去阿熙擺酒既酒樓。
穿過商場,經過唔同既鋪頭,黎到一間專搞婚宴既酒樓。
我曾經以為以阿熙視錢財如命既性格,就算結婚應該都係求其響婚姻註冊處簽紙撩幾隻龜算數,估唔到佢竟然會擺酒。
佢結婚竟然仲搞得豪過我!(係呀,我而家結左婚架啦…序章果個唔係我媽媽,係我老婆。)
不過阿熙畢左業之後搵到份大公司既Management Trainee,一路做到而家都叫半個管理層,比起佢大學時期有錢得多。
佢老婆就做老師教中學,都有返咁上下收入…
相反,我諗我算早結婚,果陣同老婆都冇乜積蓄,所以佢結婚豪過我都好正常既。
我結婚果陣都係求其同老婆響婚姻註冊處撩幾隻龜,叫啲親朋戚友影幾張相,夜晚再係咁咦同班極唔熟既親戚響酒樓食飯算。
係食飯咋,唔係擺酒呀!
我果陣都想請晒啲好朋友黎飲呀!唔係想應酬班三姑六婆長舌婦親呀…
不過,最後一切從簡。
哎呀,離晒題添。
我望一望隻錶,都只係四點半左右,阿熙既證婚儀式響五點鐘先舉行,我都仲有唔少時間剩,所以我好慢條斯理咁慢慢行過去佢地婚宴個接待處,再施施然咁想慢慢拎張請帖出黎。
…
屌,唔記得帶帖。
「呃…唔好意思,我唔記得帶帖…」我對住接待處既大隻佬兄弟講,順手比埋封人情佢:「我係阿熙既大學宿舍同房…」
「比個名我得啦。」大隻佬好寸咁講。
乜阿熙啲兄弟咁寸架。
不過呢個大隻佬有啲面善…我係咪響邊度見過佢呢?
「12號枱,你可以入去坐住先。」大隻佬幫我點完名收埋入場費…呃…係人情先啱…之後同我講。
隔離有個靚女,應該係阿熙老婆啲姐妹,對住我笑淫淫咁講:「靚仔,過黎塊簽名布度簽個名先啦。」
笑得咁淫,呢條女一定係淫底!
…
痴線…無端端話人淫底。
我求其咁簽左自己個名之後冇撩條女就自走過去入口處度睇阿熙同佢太太既油畫,又真係幾靚(我指幅油畫)。
不過老實講,阿熙今年26歲但個樣得16歲咁款(比大左佢添啦),其實唔係好襯佢老婆個樣。
應該咁講,除非阿熙娶中學生,如果唔係根本全部女人對阿熙黎講都係一副大姐姐咁樣。
難聽啲講佢地其實一啲都唔襯。
阿熙應該要去媾啲妹妹仔,或者好Cathy媽媽既同房Jessie呢類型既蘿莉。
哈哈,不過,其實佢地開心咪得囉。
我一入到去,其實就唔算好多人黎左,可能大家都係七點幾差唔多開席先到。
黎觀禮既多數都係雙方既親戚。
離遠已經見到阿熙,佢趁未簽得紙住周圍同人傾計,不過同佢傾計既唔似係佢親戚。
「熙哥!」我一路行過去,一路向佢大叫。
「喂,屌你,仆街仔!」阿熙笑住手指指咁向我走過黎。
屌,就黎做人夫都仲係咁爛口。
「恭喜晒呀柒頭。」我還擊,叫佢做柒頭:「屌你唔搵我做兄弟,好嬲呀。」我開玩笑咁講。
「多撚謝先!」阿熙笑笑口:「咁我其他兄弟你一個都唔撚識吖嘛,費事悶撚柒死你啦。」
「講呢啲。」我其實本來想講:「唔驚啦,你下次結婚再搵我做兄弟啦。」
…
咁講阿熙唔知會唔會反面…
佢其實唔係真係咁玩得…
「你結婚果陣都冇搵我做兄弟啦!」阿熙抗議。
「喂,我去婚姻註冊處簽紙咋喎!點同呢?」排場都唔同啦,果陣我一切從簡。
「係啦係啦,你坐坐先,招呼唔到呀!」阿熙似乎準備離開招呼其他賓客。
我醒起一樣野想問。
「Reception果個大隻佬兄弟係乜水?點解咁熟口面既?」我問。
「哦,佢係我細個果陣踢青年軍啲隊友,而家成日入選香港隊,你會見過佢都唔出奇。」阿熙答:「我去準備一下陣間結婚簽紙啲野,你坐下先!」
嘩,乜個寸咀大隻佬咁大來頭架?
「好啦,期待你一陣間簽紙既雄姿!」我講笑咁講。
「屌你。」阿熙向我舉一舉中指。
喂,你啲guests睇住架…
我慢慢咁走向個台前面既幾排凳行過去,揀左個唔算太前既位坐低。
我望一望周圍,好似仲未有熟人黎到。我知今日除左o camp同組之外,阿熙仲請左當年嶺大足球隊既隊友同埋當年既hallmates黎飲,但一早過黎睇阿熙既證婚儀式既似乎得我一個。
咁我同阿熙係好friend既。
坐低左之後,我諗都係時候同大家交待下其他人既近況。
阿熙就響前面提過啦,但其實響大學時候佢似乎因為某啲原因同之前既女朋友分左手之後再同組媽Cathy拍過一段短時間既拖,但果段期間我硬係覺得係阿熙唔係幾開心。總之最後佢地都和平分左手,分左手之後都仲有以朋友既身份見面。
至於Cathy,畢業之後去左做空姐,感情狀況響佢同阿熙分左手之後老實講我唔太清楚。佢同阿冰都幾熟,但自從果次同阿冰「分手」之後,我同佢都冇乜交流,所以都八唔到Cathy既感情狀況。
獸父Simon呢?原來條禽獸當日比我錫完之後開始懷疑自己既性取向,之後摺埋自己閉關研究自己是咪基佬,所以我year 1果年先至成日都見唔到佢。佢最後自己確認左自己係同性戀,響基界幾吃得開,而家加入左啲NGO為同志平權而努力。
Alan同阿龍摺到連Facebook都唔update,我都唔知佢地而家詳細係點。淨係知道佢地普普通通打份工吧。
肥妹Yuki year 2開始努力減肥,雖然肥底既佢減極都唔係好瘦,但至少已經擺脫左癡肥既狀態先,對自己既健康有好處先啦,仲搵到個傻仔做男朋友。之後佢好似考到份政府工,做左朝廷既走狗。
肥仔賢畢業之後真係做左IT狗,個樣都係咁肥毒宅。佢響大學唔知幾時開始真係同Amanda呢個大波妹拍拖,可能都差唔多結婚。
Amanda呢?佢揀左肥仔賢做男朋友之後真係成個幸福小女人咁既樣(可能唔驚肥仔賢個樣有本錢出軌),普普通通咁打份office工,專心疊埋心水等嫁。
司徒今晚都會黎,佢一樣仲係咁麻甩,我地仲有間中出黎一齊踢波。感情事唔清楚佢,但佢成日掛響口講:「打飛機仲好過拍拖喇!」
至於我細妹,阿冰同Jenny…
(待續)