四十

 

唔經唔覺踏入左十一月。

 

其實周圍唔同既莊已經開始進入Promotion Period（即係上莊既宣傳期，類似叫人投佢地票，派下傳單，宣傳下自己政綱等等），日日響個campus入面鳩叫。間中都會見到肥仔賢同埋Amanda仲有佢地啲莊員響度嗌cheers。

 

Amanda一路好大動作咁嗌，對波一路震，痴線。

 

不過…其實好撚嘈，由於佢地成個campus周圍走，有時仲會去到hall附近鳩叫，我訓晏覺既時候仲會比佢地嘈醒。

 

不過我ok既，明白始終有人鍾意燃燒青春。你地唔好晨早六點幾嘈醒我就得了。

 

有一日響campus度撞見肥仔賢鳩叫緊，佢見到我就走埋黎同我講：「喂，就黎social annual dinner喇。我已經幫我地全組報晒名架啦!」

 

「吓？咁快？」我諗起阿熙：「阿熙唔一定有錢去架喎！」

 

「你有吖嘛。」肥仔賢答。

 

屌，真係當我係阿熙既提款機咩。

 

「屌你咩。一係我返去問下佢先喇。」我答。

 

「記得黎支持我地啲活動呀。」肥仔賢不忘補充。

 

「知啦，長氣！」

 

最後我地全組人（包括啲連名都已經唔記得既摺友）都參加左呢個annual dinner。

 

*

 

Annual dinner當日，落左堂之後我約左阿冰，諗住一齊出發。

 

阿熙話佢補完習就自己去集合地點。

 

順帶一提，佢今次自己比晒錢。

 

終於唔駛做提款機。

 

可能佢都唔好意思喇。

 

落堂之後，我換左件普通黑色西裝，之後就直接上左去阿冰間房。

 

阿冰換左件黑色晚裝，化左個淡妝，好靚。

 

女神唔駛化好勁既妝已經夠晒吸引。

 

佢一見我上到黎，就笑住問：「我靚唔靚呀？」

 

「Camp花喎，著乜都靚架啦！」我賣口乖。

 

「哼，口花花。」阿冰指住我。

 

阿冰今日其實都係同平時一樣咁好笑容，但係唔知點解我感覺到佢並唔開心，只係響度強顏歡笑。

 

最近已經有咁既感覺，但係今日呢種感覺特別強烈。

 

點解呢？

 

唔，或者，我睇得出，佢個笑容並唔係發自內心既笑容。

 

佢同Jason可能出現左啲更嚴重既問題。

 

Well，我都係估估下，可能純粹係阿冰唔夠訓。你估我真係識讀心咩？

 

我唔係林保怡，唔係讀心淫探呀。

 

之後我地一齊出發去門口，我地系既現莊book左架巴士車我地去舉辦annual dinner既酒店。

 

沿路行果陣雖然都係同阿冰有傾有講，不過細心留意既話，會發覺得到阿冰今日其實冇平時咁多野講。

 

咩事呢？好唔好開口問呢？

 

都係唔好…要講既佢自己會講架喇。

 

響集合地點會合晒所有人之後我地就上巴士。

 

奇怪既係，連果啲名都唔記得既摺友組mates都有到，獸父Simon依舊唔知去左邊。

 

而肥仔賢明明話過佢幫所有人都報左名。

 

啊，我明白了。

 

響肥仔賢眼中，獸父Simon應該唔係人，所以冇幫佢報到名。

 

…

 

應該冇咁既可能…

 

之後巴士起程去目的地，位於尖沙咀既某間酒店。

 

至於餐飯其實冇乜特別，都係一圍坐住食下野（我地組自己一圍），聽下啲professors響台上鳩噏，又抽下獎，最後搵人影相咁。

 

Amanda對波犀利到，個相機detect到佢對波係兩塊臉…

 

不過…

 

最令人期待既應該係之後既餘慶節目。

 

Annual dinner 有好多freshmen參加。系入面既同學唔同hallmates，hallmates就差唔多日日見，但系入面除左自己o camp同組既同學之外其他freshmen其實未必識，識都未必熟，最多上堂見到下，但係呢個annual dinner既場合總會有啲活躍既分子主動出黎做搞手，集合啲同學一齊去下場。

 

下場其實即係去酒吧飲酒。

 

你問我有冇興趣？

 

嗱，我從來唔飲酒，連啤酒都唔係幾好，所以我唔係幾想去飲酒。

 

但係！

 

我聽講啲大學生去bar飲野，醉翁之意不在酒，好多人係去尋歡。

 

成人既歡！

 

我大個仔啦，所以我好想去見識下。

 

當然純粹係見識啦，唔會走去扑第二條女既，我唔會對Jenny唔住。

 

搞手走到埋黎我地果枱，問我地：「我地一陣會一大班人去飲野，當大家識下朋友咁，你地join唔join？」

 

我望一望阿冰，佢正響度對住個杯呆呆出神，彷彿乜野都聽唔到咁。

 

「我去！」

 

「預埋我！」

 

「去！」

 

阿龍同另一個叫Fredrick既摺友（樓主終於肯賜個名比摺友啦），再加埋肥婆Yuki已經join左佢地。

 

肥仔賢同Amanda就唔去，我估應該因為仲要返去搞莊務既關係。

 

阿熙問我：「你去唔去？」

 

我想去。

 

但應承去之前，有樣野我想先確認一下…

 

我拍一拍阿冰，佢好似先突然驚醒咁：「咩事？」

 

我都話佢有心事。

 

呃我唔到既。

 

我話：「冇野啦。」

 

呢個時候唔應該叫佢落吧。

 

一陣佢唔開心起黎喪飲咁點算？

 

我未見過人醉，我驚到時阿冰真係醉左既話我唔識應付。再講，人係唔應該借酒澆愁。

 

Well，雖然到目前為止都只係我估計佢唔開心。

 

「唔去啦。」我對住阿熙講。

 

佢見到晒啱啱發生既野。佢望住我，嘆左一口氣，道：「唔好唔記得上次我同你講既野。」

 

係指上次講我要記住邊個先係我女朋友單野？

 

我仲諗緊既時候，阿熙極速轉左個興奮既表情：「不過你唔去，我都想去見識下！」

 

「我都去！」阿熙向搞手大叫。

 

阿熙都逐漸轉變了，好似越黎越想去識多啲朋友，參加多啲群體活動。

 

同一開始識佢果陣個摟打樣已經係兩個人。

 

「唔理你地啦，總之一陣有興趣既門口等啦！」搞手講完之後急急腳咁去左另一枱。

 

「喂，飲酒好貴架喎。」我擔心阿熙個荷包。

 

「嗯…」阿熙皺左皺眉，再嘆一口氣：「唉，屌那星，其實我啲錢…係有特別用途架，不過一次半次，應該o鳩k既。」

 

喂，冇錢就唔好去啦！

 

「特別用途？」我問。

 

「有機會再同你解釋。」阿熙又嘆一口氣。

 

（待續）